Kidhar ho, mai pahuch gayi SMS ka zamana tha, TRAI ka capping rule lagne me abhi kuch time baki raha hoga. Tuu-tuu har Im not working, Im still youth wale phone ka national anthem tha. Network companies bhi petrol diesel ki subsidy kam karwa kar texting ko promote kar rahi thi. Apne naye naye phone me message padhta hua Bittu bus ki khidki ke bahar dekhne laga. Ab auto me hota toh jhaadte huwe bol bhi deta bhaiyya jaldi chalo , ab yaha sarkari driver tha, sunta kaha. SMS pe tuu-tuu ka silsila naya nahi tha, par romanchak abhi bhi tha. Truth-dare ke bahane classmates ka number toh le liya tha, par texting ka maza sirf inhi mohtarma ke sath aya. Waise tha Bittu bada sidha, sach me, kuch galat nahi bakta tha, kyuki kya hai sanskaar values ufaan mare huwe hai ajkal. छोड़ो me bhi extra h laga deta tha, bhale hi Goodmorning Gm ho jaye. Bijli wale load shedding kam karte thai, ye wordshedding jada karte thai. Ghar se jab naha dho kar nikla, tabhi sabko shak ho gaya aj safed ghode ki sawari karne nikla hai launda! Peeche se mummy ne khana khane ki awaaj lagayi, khud hi samajh gayin bekar me lagayi. Bade bhaiyya calendar ki aur taadte huwe bole bijli ka bill kyu nahi bhara, par Bittu aaj khude bijli tha! Raat hi mai plan bana tha movie dekhne ka, angrezi wali. Kaan toh tabhi khade ho gaye thai Bittu ke, ye kaho din me football nahi khela hota toh so nahi pata raat bhar. Mohtarma me kuch baat thi! Bittu bhi bade interest se chat-iyata tha, Charlie Sheen ke jokes bhi Indian filters me chhaan ke paros deta tha mohtarma ke liye, unka bhi :) aa jata. Aalam ye tha ki jokes se lekar p-block ke reactions, sab coverage me aa gaye, baki classmates ke muqable inka tariff jada mel khata tha. Kai baar Papa ke curfew se thodi bahut golibaari kam ho jati, lekin fir samjhauta ho jata tha, aur fir se battery din me do baar charge hone lagti. Phone ki be, Bittu seedha hai, yaad hai na? * Agla stop mano Fardeen Khan ka career ho, dikh hi nahi raha tha. Ab tak do calls aa chuke thai, mane baat gambhir thi. Khushi bhi thi, ki call kiya, mane main balance se paise kharcha kiye mohtarma ne. Agar dil garden garden hota hai, toh aaj Amazon ho gaya tha, sala Flip bhi bahut kar raha tha. Hunger Games khatam baad me, hunger pet me pehle aa gayi thi. Socha aaj McD nahi, KFC jayenge. Baato ki supud supud ke sath Oreo shake suduk suduk hone laga. Movie ki sameeksha itni tagdi hui,ki Taran Adarsh neend ki goli lekar so jaye. Bittu filhaal Katniss aur mohtarma me congruency dhuund raha tha. Akhir me, similarity pe jakar baat bani! Kambakhat AC laga huwa tha,warna fan ki hawa me hairlocks sambhalna grand canyon se jada deep hota hai. ** GB Road ki ek baat badhiya thi ki footpath asli tha, aur lamp post English era ke nakli. Do youth ko sath chalte huwe uncle -aunty log ne bhi khub surveillance kari; shayad auto wala humdard tha esliye hi kaha छोड़ du ke sath mol bhaaw ko razi ho gaya. Mohtarma hataash na ho, toh Bittu taiyarr ho gaya. Lets better walk suna toh jaise atheist se theist ho gaya Bittu. Bus stop pe pohoch chuke thai, ab alag alag number ki pakadni thi. Tumhare liye kuch hai sunayi pada toh laga, bhagwaan apni pe aa jaye toh sach me chappar phaad deta hai! Bag me hath daala aur surprise ke liye aankhe band karne ko bola. Jab kalaiyi me kuch feel huwa, ankhe kholi toh benzene ring ke samaan structure baad me dikhe, 12 number ki.... Bus pehle dikh gayi. Sambhal kar, gote khata huwa bus me ghusa apna Bittu, khakhee uniform me conductor ne 14 rupye ki ticket kaat di. SMS pe curfew lage na lage, ab ceasefire lag gaya tha :) via Anurag Verma
Posted on: Sun, 10 Aug 2014 15:08:29 +0000
Trending Topics
Recently Viewed Topics
© 2015