MORNING REPORT : 07.07.2014 THAWHTANNI (Zonet Zing Daifim 7:30 a.m.) Police Report : Tukinah Lunglei Police Statioln tih loh kan biak thin pangngai Police Station dangte chu kan be kim thei a, kan hriat theih chinah nizan lamah thil thleng duhawm lo sawi tham a awm lova. Lock Up ruak 4 a awm a ni. Aizawl Police Station ah tang 8 neiin mipa 7 leh hmeichhia 1 an ni a. Mipa zinga pakhat leh hmeichhe awmchhunte hi No. 4 ti thin an ni a. Mipa zinga 1 chu mi scooty a hmansak, engmah sawi si lova ni 2 hnuah pawh a la pekkir loh vanga man a ni a, rinhlelh man 1 leh remand 1 awmin a la bang 3 te chu rui chunga lirthei an khalh vanga man an ni hlawm. Vaivakawn PS ah zurui chunga buaina siam vanga man mipa 5 an kawl a. Bawngkawn PS ah tang mipa 4 kawlin 2 te chu zuruih vanga man an ni a, midang 2 te chu kar kalta Zirtawpni, July ni 4 a thi a hmuh Pi Vanlalsiami thih chungchanga rinhlelh man an ni a, a pasal pawh an la kawl tel. Champhai PS ah rinhlelh man mipa 2 kawlin Serchhip PS ah family case a tantir mipa 2 bakah Kulikawn PS leh Zonuam Out Post ah te pawh family case a tantir mipa 1 ve ve an kawl a. Lawngtlai PS ah mobile phone bo chungchanga rinhlelh man mipa 1 an kawl bawk. Excise Report : Aizawl District Excise & Narcotics ten Inrinni khan Phunchawng leh Rangvamual ramah zu check beihpui an thlak a. Zu bilh lai tin 3030 tichhiain rakzu litre 120 leh Bel 27 an man a ni. Hospital Report : Nimin tlai dar 5 atanga tukin dar 7 thlengin Aizawl Civil Hospital Casualty ah emergency case 120 an nei a, mitthi an nei lova. Nizana Civil Hospital Casualty pantu zingah hian road traffic accident vanga hliam thui ngai neuh neuh ang chi 30 vel awmin an tam ber a, ruh tliak pawh 2 chu an awm. Pumna leh kawthalo luak an thahnem hle bawk. Uiseh 4 awmin zurui medical 10 an awm bawk. Khum ruak a awm lova; Emergency & Labour Room ah Inrinni zing atganga tukin dar 7 thlengin nau piang 22 an awm a, mipa 12 leh hmeichhia 10 niin an zinga mipa 5 leh hmeichhia 2 chu zai chhuah an ni a, vawiina nei tur 5 an awm bawk. Synod Hospital Durtlang ah nizan khan emergency case 19 neiin heng zinga 9 chu admit an ni a; mitthi an nei lova. Nizana Synod Hospital pantu zingah hian puitlingah Malaria PF leh khawsik an tam a, naupangah kawthalo luak an tam bawk a, puitling zingah hian road traffic accident vanga hliam tenau nei an awm nual bawk. Hospital pumpuiah khum ruak pahnih khat bak an nei lova, Casualty ah damlo 1 kawlin Cabin leh ICU pawh a full a ni. Lawmna Ward ah nau piang mipa 1 awmin vawiina nei tur 7 an awm bawk. Aizawl Hospital leh BN Hospital ah te nau piang 1 ve ve neiin Cabin an full ve ve bawk a. Care Hospital leh Adventist Hospital ah te khum an full a. Nazareth Hospital Ramhlun North ah te, New Life Hospital leh Grace Nursing Home ah te Cabin an full bawk. Hospital biak theih loh kan nei thluah a, Lunglei Civil Hospital pawh kan be thei lo a ni. Power Report : State Load Despatch Centre (SLDC) atanga thu kan dawn danin, nimina phai lam atanga kawlphetha kan hmuh tlem lai ber chhun dar 12 ah 47.58 MW kan hmu a, kan hmuh tam lai ber nizan dar 7:30 a kan hmuh zat 67.28 MW niin Tualchhunga siam chhuah 8.35 MW nen kan hman zawng zawng 75.63 MW a ni a. Load shedding siam lovin eng pek theihna chinah chuan an pe kim a, Line chhia report a awm lo bawk a ni.
Posted on: Mon, 07 Jul 2014 02:13:58 +0000
Trending Topics
Recently Viewed Topics
© 2015