Ma kade ungelathi ephejini lethu elidala elavalwayo,lapha ekhaya siyabhala indatshana zokuzijabulisa siziqhenya ngolimi lwakithi.Funda le: IMPILO YAMI ESONTALA,EKEZI(part 1) Ngangiwaqhululile ngisesihlathini elalenile,ngilele ngikhangele wena owabona umvundla nxa elele esikhundleni sakhe.Ngangingeke ngiwavale amehlo hlezi nginyenyelwe yizinanakazana lezinye inyamazana eziyingozi ezihamba ngomnyama.Ngangiyizwa inyoka inuka ngitsho ukuthi lapha eqinisweni kwakungaphephile.Ngisizwa lempisi zikhala lungitshaye lungisaphaze uvalo phela ubugwala kimi babuzibusela.Yebo kambe ngasengiqalile ukujwaqa nami sengikwazi ukuzibika emantombazaneni,ngisanda kuthomba kodwa ngangisasemncane ukuthi ngingalala eguswini elilezixuku ezinje,njalo indawo yakhona yayiyenile utshani bulingana lami.Kuyizinanga zodwa.Ngangikhala ngiciphiza inyembezi okungaphelileyo,zasezizehlela nje kuyibuhlungu benhliziyo yami ukuthi kanti ngiphilelani kanzima kangaka?. Ngiququbele njalo ehlathini engangingazi ukuthi kungasa ngikhona,ngiphonguthi konke kuzabasezandleni zikaMvelinqangi kuyabongwa kusile,ngibalekela ulaka lukababa.Ubaba yindoda ebihlonitshwa kakhulu esigabeni sakithi endaweni yaseSontala.Emuzini owawumkhulu nje ulezindlu ezinengi ezotshani,kwakuhlala buphekiwe bewuthanda umuzi wangakithi abantu.Ngangicabanga ngendlela ubaba ayengikhuthe ngayo ngomkhonto ukuthi ukulahla inkomo kwakungathukuthelisa umuntu ngalindlela.Ensukwini wayengitshaya ngencukuthu ngithi ngiyakubona lami ngiyabe ngisuka ngithi ngiphambanisile.Elomkhonto lona lahle langixotsha ekhaya.Ngangiphila ngokuhlukunyezwa ngingakutholi ukuphumula lapha ekhaya.Ubaba wayesehlala ekhaya sehola impentsheni ehlezi,kodwa wayelendlu koBulawayo lapho bekuhleli abanye abantwabakhe,okwangenza ngafuthelana kakhulu ngesenzo sikababa.Wayelochuku kimi kuphela,lokho kwangitshiya lemibuzo engapheli.Nxa ngithi ngikhalela kumama njengomuntu olesihelo ngimbone laye ukuthi iyamsinda akafuni kuyisho kodwa ngimbona ukuthi ukhalela ngaphakathi kuyamudla laye indlela engangiphathwa ngayo kodwa engelamandla laye.Yangihlupha indlela engangiphiliswa ngayo ngitshaywe kungonakele lutho,ngibizwe ngomntanomthakathi,kungimangaze lokho ngoba ngangisuka ngibizwa ngubaba ongizalayo.Babekubona omakhelwane kodwa kwakunyeywa kuphelele ezinkunini lasemfuleni kungafiki endlebeni zikababa ngoba wayelolaka kuhle kwemamba ehlokozwe izihlalele ebhalwini.Wayesatshwa ekhonwa nguKhansela wakithi uNduro,ngoba bakhula bonke. Kwabangelimnyama ke kimi,ngalibala ngokuthiya inhlanzi edamu lakonaRoja elalikoTaylors.Nxa ngithi phaphama inkomo sezihambile,ngazama ukulalelisa amaklogo inkomo zathi kade usibeke nga?ngazizwela inyeza nje ezazikhala zivunyelwa ngamaxoxo ayesekhafuleni ledamu.Ngayicabanga incukuthu yami,ngithi ngeyami ngoba ngangikwazi ukuthi ungayibona isenyulwa entungweni zomkulu sekutshaywa mina ngaphansi kwenyawo.Ngakucabanga konke lokho ngoba kwakumele kuvukwe kusiyalinywa.Ngibhudule ngisabhudula lutho ukuzibona inkomo,ngasengicabanga ukubuyela ekhaya ngoba kwasekuhlwile.Uvalo lwalungidakaza kodwa ngaziduduza ngoMadevu lezikwaya ezimbili engangizibambile ngithi ngizasindela ukuthi ngijimbile kanti angibuzanga elangeni.Ngathi nje ngifika ngambona emile phandle ebambe iqolo ebheke la ngivela khona,ngatsho ngenhliziyo ukuthi sengiyosinda sengisinda kodwa namhla ngitheze olulofezela ngokwalo.Avele athi nxa ngiqhamuka,"so Mlamuli uthi uzancenga bani ngenhlanzi zakho kusasa amanye amadoda bayabe bevala izindima thina sitshiywa ngumdaka,uzangibona kahle"wangikhutha ngomzaca womtewa ngabalekela kumama owayelokubhula umlilo nxa sethe wavuka ubulwane bakhe ubaba,kwabaliphupho kungalelwe lapho engambona sesiza ephethe umkhonto yikho engabona khona ukuthi akusasinekwa yimpi yamaNdwandwe loZwide ke le.Ngokuphazima kweso,ngingabonanga ukuthi sewuphosile watshaya eceleni kwami,yikubaleka kwami ngaze ngayokuwa kuSimukwe emfuleni, emagetsini amakhulu epulazini lomlungu uTaylors.Ngamiswa lakho yikuthi ngasengihlanza igazi ngokugijima kakhulu,yikho lapho sengibona ukuthi ngangigijime ibanga elide,ngahlala phansi ngiphumula. Ngalala ke lapho ngiqamelene lamatshe ngingazi ngaphansi kwawo kulani?ngizwa kunuka inyoka lungitshaye lungeqe uvalo ngoba ma linile izulu inyoka nxa iseduze iyanuka.Ubuthongo angibuzwanga ukuthi bangithatha nini ngaphaphama ngivuswa ngelinye iphupho elangithusayo,nxa ngithi gaga ngibona abafana bakoDibha bengihanqalazele,kwathi mhlaba ngiginye,umhlaba wathi nami ngilezami.Ngangibesaba ukufa abafana labo ngoba babesitshaya nxa silusile.Kodwa lelolanga angitshaywanga ngabona onguye omkhulu wabo ehlengezela inyembezi ebona isimo engangikuso okwenza lami ngagcina sengikhala ngibona ukuthi impilo yami ayimnandanga labantu sebekubona lokho.Wangithatha ke omdala engisa kuKhansela ubaba uNduro,abanawakhe wathi abaqhubeke ngokuyadinga obabhemi.Wanikina ikhanda kaningi uKhansili,wathinta isikhwehlela kancane.Ngatsho ngenhliziyo ukuthi inkulu engizayizwa la ngitsho loShaka mncane kuyo.Afome umdala umlomo wakhe uvevezela lize ligcine liphumile izwi athi"mntanami ibuhlungu impilo oyiphilayo njalo ukuphumula ngeke ukuthole uzaphila njengesigqili loyihlo njengoba umbona ukuthi nguNtando kayiphikiswa,uNtaba kayikhonjwa.Wena ungumuntu wokufika kuleliyakhaya,ulivezandlebe unyoko wabuya lawe umncane."Wama ukukhuluma umdala engijolozele efuna ukubona ukuthi ngiluthatha njani udaba lolu,ngafisa ukukhala,kwangaphuma lizwi ngaphetha ngokunyenama ngoba ukukhala kwasekuyinhlalayenza kimi.Ubuhlungu engasengibuzwile base bubuningi kakhulu,yikho ukusukuma kwami ngithatha ihloka likaNduro ngiluqondise ekhaya ngejubane. *Wait for Part 2 sesifuna ukwazi ukuthi lalithwalelwe bani ihloka?* ***GOLIDE
Posted on: Sat, 17 Aug 2013 03:13:55 +0000
Trending Topics
Recently Viewed Topics
© 2015