Me bredrin Wesley Deosaran tag mih in dis post what bring back so much memories ah riding maxi before de sun come up from Siparia tuh go tuh school in Sando. In my day dat was mainly two badd up ole Mitsubishi Rosa bus- Sensation piloted by Slick Rick with the man what call Birdie as de conductor and Jus Cool run by Gerry what was de baddest fadda in de lan and who en need no tout tuh hustle passenger. Both dem maxi had hard pong tuh shake out de wax from yuh ears and make sure yuh reach tuh school wide awake which was important since yuh leaving home at half five AM tuh reach for 8.....oddly enuff aside from me, de Sensation/Jus Cool krew produce two other media newbies who ride shots with we in dem days....Heritage Radio voice Rodney Elahie and Newsday sportswriter Jonathan Ramnanansingh...hell , if Lil James and Adwyn was on FB it would be like ah mid 1990s reunion. It had ok buh lesser maxi eh...like Due South, ah 12 seater run by Uncle Chuck what look forbidding and scary but would NEVER leff ah schoolchile on de side ah de road...passage money or no, and Kojak who run ah next big bus and used tuh drive like ah maniac buh who was ah cool test too. Den it had de scamps like Flowers (de name ah de maxi) which was ah 25 seater driven by ah pedophile with ah taste for young boys (ah shud make ah priest joke here but I more mature now....ah tink)....Flowers meet ah oddly poetic end when he try tuh grope ah schoolboy and de youth kick up ah storm and de driver dead from stress ah week later...anyhow...I digress...now that ah tink back, it had any reason why school gyal did NOT want tuh run down maxi driver and tout? Mih image of de quintinsental driver is ah fellar in ah bandana with plenty gole teeth and chains like Mr. T what dey does call Big Daddy or Moose or someting and he does change gear without clutch and drive until de speedometer needle spin out...plus de indicator stalk cease up from never being used in stops....De conductor hadda name Sugars and he dress up in de latest stylez and have ah wad ah fives and singles big tuh choke ah elephant buh wat really is bout $150 all told...but as any self respecting schoolgyal go tell yuh, is de SIZE ah de wad and not de value wha count. ...plus any maxi dat DOH have eardrum shattering hard pong, what doh overload by 20 or so and what DOH have ah dashboard air freshener smelling up de place like ah old school disco jess ent have my respect... m.mixcloud/morganbeach23/the-maxi-dub-chronicles-volume-ii-1991-1992/?utm_source=redirect&utm_medium=shorturl&utm_campaign=cloudcast
Posted on: Wed, 26 Mar 2014 00:54:23 +0000
Trending Topics
Recently Viewed Topics
© 2015