Meri zindgi ka real event ... just read Mujhe delhi ki halki roshni wali subah bahot pasand hai, dhool aur dhuyen ke beech delhi ki mashroof si subah. Log kehte hain delhi jitni failti ja rahi hai yahan pyar utna hi simta ja raha hai. Sab apni naukri se itni mohabat kar baithe hain ki pyar vyar to bas kitabon main ya cinema ke dhai ghanto main simat gaya hai, kabi bhoole se kisi coffee shop main ho gaya to ho gaya, varna chance hi nahi. Lekin ek subah mujhe dikha wo kitabon wala pyar, kitabon ke panno se bahar, naam to nahin jaanta undono ka lekin dekhne se betahasa mohabbat maloom hoti thi. Wo apne waqt pe dwarka station par chale aate, aur bheed main khade chamakte rehte, kabhi lagta ki jaise maine unhain jaanta hoon, bas isi liye maine unka naam Mr. & Mrs. Verma rakh diya. Haan Mr. & Mrs. Verma. Train ke aate hi Mrs. Verma Mr. Verma ka bag unke kandhe par taang deti aur unka haath pakde train main baith jaati, safar suru hota aur Mr. Verma ka newspaper khul jata, aur Mrs. Verma ke bag se nikalta mehroon uoon ka gola jisse wo bunne lagti ek mehrooni colour ka sweater, safar yun hi gujarta raha, aur uoon ka gola chota hota raha, din, hafte aur maheene gujarte gaye, kabhi sweater ka gala bunta kabhi kamar, aur ek din mehroon sweater ka baayan baju bhi sil chukka tha, kaafi khus lag rahi thi wo sweater ko dekh kar. Par…. fir na Mr. Verma dekhe aur na Mrs. Verma, kai din beer gaye, lekin ek din dekhe Mr. Verma akele, main apne aap ko rok na paya, aur unke paas pahoch gaya, aur pehli baar Mr. Verma se baat ki, “Hello, do you remember me?” aur thodi der ke baat Mr. Verma bole tum wahi ho na jo roz train main ghoorte rehte ho. Fir tain aayi aur main train main un ke saath chad gaya aur pucha ‘kya hua, aaj aap akele’ wo lady jo aape ke saath aati thi aaj nahi aayi. Par Mr. Verma se koi jawab nahin diya, station gujarne lage Uttam nagar gaya, janakpuri gaya, fir dubara puchne par wo bole yaar mujhe maaf karo main waise hi bahot paresaan hoon “she passed away” wo bimaar thi, aur thodi der main train rajouri garden pahoch gai, log utarne lage aur chadne lage, mano jaise zindgi ek train ki traah ho, kuch logon to aage jaana hota hai aur kuch logon ko beech main utarna hota hai. Maine poocha exactly hua kyat ha, to jawab aaya “ Dekho yaar wo bahot ziddi thi, Cancer tha usko, mere mana karne baawjood wo roz subah mujhe office the chodne aati thi, aakri station par utar ke wapas ghar chali jaati thi, esi bahane bas wo mere saath waqt bitana chahti thi, main mana bhi karta tha, par wo manti nahi thi, aur halaat aise thye ki main Job chhod bhi nahin sakta tha,” Ye baat sun kar mujhe pehli baar laga ki kitabon wala pyar kitabon se nikal kar bahar aa gaya, jab koi kisi ke saath ek ghanta gujarne ke leye itna kuch karta hai, ye ek emotional si story thi par main roya nahin, aur tab tak na roya, jab baat karte karte mere dhyan Mr. Verma ke seene par gaya, aur ye ehsaas hua ki Mr. Verma ne wahi, mehroon color ka sweater pehna hua tha, jiska daayan baju aaj bhi nahin sila tha…………..
Posted on: Wed, 31 Jul 2013 07:46:39 +0000