Mizo Christian Fellowship of Singapore (MCFS) ho hian thuchhuah tha tak an rawn nei. Hmeichhe lam chan deuh a ni. Singapore a house maid a awm i tum a nih chuan chhiar chiang la, i chhungte awm lai leh awm mek an awm a nih chuan chhiar pui bawk ang che. Singapore-ah Mizo housemaid-te (awmpui) kan pung chho ve zela, harsatna tawk te kan awm tak fo avangin MCFS-in Mizo mipui te hriat atan heng a hnuaia mite hi a rawn chhawp chhuak a ni – 1. Myanmar (Burma) passport hmangin kal loh tur. Myanmar passport siamsak theia inchhal mimal emaw agency in tawng a nih chuan Police hnenah report tur. Hei hi dan kalh a ni. Mizoram mi ni si Myanmar passport hmanga Singapore-a hnathawk ten harsatna an tawhin intanpui a har thin hle. Myanmar sawrkar leh Singapore sawrkawrin an hriatchhuah chuan thubuai lian tak siamsak an ni ang. Singapore hi dan khauh tak ken kawhna ram a ni a, thil dik lo tite chu sawrkarin a dim lo hle. Bawlhhlawh a bawma paih loh vang ringawt pawha sum tam tham tak fine (sum chawi tir) theihna ram a nih avangin dan zawm mai a finthlak fo. Tin, Myanmar sawrkar pawhin passport chungchanga thil dik lo tite chungah hian na taka action lak theihna dan a nei ve bawk. 2. Singapore-a domestic worker (house maid/awmpui ang chi te) hna thawk tur hian kum tlinga ngaih chin chu kum 23 a ni a, kum tling ngeia kal thin tur. Kum tling si lo, kum tling anga inziah hi sawrkar dan bawhchhiatna a ni. Tin, harsatna an tawhin inchhan a buaitlak hle. Entir nan kum 16 mi kum 23 angin a inziak tlat a nih chuan, mi puitling tak kum 23 anga cheibawl a ni. A tlangpuiin la nau lutuk hi chu anmahni pawh an insawi chhuak zo lo thin a, fimkhur hle a ngai a ni. 3. Maid (awmpui) hna thawk tur hian rilru puitling tak pua hrehawm ber pawh tuar huama inbuatsaih a tul. Maid (awmpui) thawk tur reng reng inphah hnuai tak leh ingaitlawm taka mi thuhnuaia kun turin rilru siam lawk tur. Chhiahhlawh chan chang tura inhuam a tul. Mizorama awmpui kan en dan leh Singapore miten awmpui an en dan hi a inang lo hle tih hriat a tha. 4. Natna benvawn nei dama inngai tawh, hna hahthlak thawha na leh mai thei chi te tan kal loh a tha ber. Entir nan Lung na, Tuberculosis (TB), Kal na (kidney lam tha lo), Zun in etc. lo vei tawh ang chi te. 5. Nu leh paten an fate passport-a an hming ziah dan, passport number, pian ni, thla leh kum chhinchhiah vek tur. Mizoram leh Singapore-a agency te hming, address (branch hrang hrang nei an nih chuan an branch hming hriat tur), phone number leh email ID te neih ngei ngei tur. 6. Maid-a (awmpui) kal ten agency-te hnen atangin an dikna chanvo (Rights) an zawt chhuak ngei ngei tur a ni. Hetah hian agency laka an rights leh Singapore thlen huna an rights te agency hnen atangin chipchiar takin an dil tur a ni. (Entir nan- house maid/awmpui chuan thla khatah ni li day off a nei thei, chaw kawpuar a hmu ngei tur a ni; mut/taksa hahchhawlna hun a nei tur, employer-in an awmpuite kut an thlak thiang lo, employer ten Mizoram lama a chhungte a biak an phalsak tur a tih ang chi te leh a dangte). 7. Nu leh paten in fate emaw in naute Singapore-a hnathawk mekte hnenah an rilru tih nat emaw, a hnual zawnga tawngkam hman loh hram tur a ni. Anmahni tawkah rilru hahna an ngah a, chhungte atang lehzela nawrna an neih chuan an lungngaiin an beidawng thei a, mahni nunna lak mai duhna thinlung te an neih phah thei. Rim taka hnathawk vek an ni a, a sum ang zawng pawhin phut chin tawk thiam a tha. 8. Singapore-a hnathawkte hian an hna mil ang zel work permit an nei a. Lehkhathiam (Graduate chin) pawh Singapore ah house maid (awmpui) anga an lut a nih chuan hna dang dap a rem tawh lo. Singapore Ministry of Manpower (MOM) ah record a awm vek tawh avangin house maid/awmpui hna chiah an thawk thei. Lehkhathiam hna zawng duh tan maid agency kaltlang ni lovin agency dang emaw online atangin emaw hna a zawn theih. Hnathawka kal duh ten chinchang fiah taka zir lawk thin a tha. Fimkhur turin Mizo mipuite kan ngen tak meuh meuh a ni. Hrechiang leh zual duh tan hengah hian zawh fiah theih a ni - 1. F Vanlalhruaia ( +65-90446264) 2. Laldinpuia (+65-93607885) 3. Lalchhandami Tochhawng (+65-90576354) 4. Lalhriattira (+65-96200897) MCFS email - mcfsingapore@gmail ah zawhna a thawn theih e. Lalchhandami Tochhawng Secretary MCFS MCFS
Posted on: Fri, 18 Jul 2014 06:14:41 +0000
Trending Topics
Recently Viewed Topics
© 2015