Nifa Pathian Bia No (147 ) Ningzak Lo Tein Bawipa Pathian Cu Thangṭhat Tuah! Lai lei kan rak um lio ah biakinn chung i kutthler, kutbengh le lam tehna khi khrihfabu cheukhat ca lawngah kan rak ruah i, kan rak nautat ngaingai hna. Pathian thangṭhatnak ahcun dai tein um i cawlcang lo tein hlasak kha a ṭha bik ah kan rak ruah. Sihmanhselaw ramdang kan phak hnu i vawlei cung a ṭhangchomi khrihfabu kan zoh tik le Bible thuk deuh i kan pil tikah cun cuhlan i a ṭha bik i kan rak ruahmi kha a ṭha bik a rak si lem lo. Tulio zapi nih kan theih ngaimi hna Hillsong, City Harvest Church, New Creation, Bethel Church le Lakecwood Church pawl hna Bawipa an thangṭhat ning khi zoh tikah a nuam in thazang a tlung hringhran ko. Zeitindah ningzak lo tein kan thangṭhat lai? zoh tuah hna usih! ¤ Kut Thler & Bengh Buin Thangṭhat Tuah! Vawlei nuamhnak puai le stage show tehna kan kal tikah kut bengh le kut thler i hlasak le thapek cu kan ning a zak lo i, kan tha a tho in kan ṭang kho taktak. Bawlung chuih le paih zuamnak zoh i kutpengh le au cu ningzak ah kan ruat lo i, kan i biatak kho taktak. Asinain Biakinn chung i sertu kan Pathian thangṭhatnak ahcun kutpengh le kutthlir cu kan ning a zak i, a a kut bengmi le a kutthlirmi hmanh kan zahpi hna. Vawlei hlasak thiam pawl le bawlung chuih thiam pawl tha peknak le lawmhpinak ahcun kan kut le kan aw cu kan sian ngai nain, Khamhtu Jesuh Khrihf thangṭhatnak ahcun kan kut cu angki zal le bawngbi zal ah kan thuh ziar tawn hna. Cathiang nih Thlacam in a biakinn chungah nan kut hler u law Bawipa cu thangthat u! (Salm 63:4,134;2). Mi vialte hna lunglawm in nan zapei beng tuah u, hla dawhdawh in Pathian cu thangṭhat u! (Salm47:1) tiah a ti. ¤ Dir & Laam Buin Thangṭhat Tuah! Stage show kainak le zu inn ahcun laam le kui cu thloh khawh hmanh kan si tawn lo. Kawlram bawi pawl hmai ahcun kan Lai thilpuan ṭhabik i hruk in suimilam pahnih thum chung zong kan dirpiak hna i kan laampiak tawn hna. Sihmanhselaw kan Bawipa Jesuh Khrih thangṭhat ahcun minute 30 hrawng dir buin hlasak hmanh kan zuam lo i kan vuivai. Bawipa hmai i laam cu ningzak le zohchia ah kan ruah i,zei theilo cawnnak ngeih lomi le mi zei ruaramlo tuah dingah kan rel tawn. Cathiang nih Nan lamnak ah khan a min cu thangṭhat u!(Salm 149:3). Khuang le lam in thangṭhat u, tingtang le thong lawi in thangṭhat u!(salm 150:4). Cun David cu Bawipa hmai ah a thazang dihlak in a lam (2Sam 6:14) tiah a ti. ¤ Kan Thinglung & Kan Ruahnak Dihlak In Vawlei puai kalnak le zeidang nuamhnakahcun kan thinlung cu kan kalpi tawn hna i, nungak tlangval lenṭinak ahcun kan thinlung dihlak in kan um tawn. Sihmanhselaw Biakinn pumhnak le Bawipa thangṭhatnak ahcun kan pum lawng biakinn ah a um i, kan thinlung le ruahnak cu hmundang piah a rak vakvai diam. Pum lawng Biakinn ah a um i, thinlung cu rian hmun hna, inn chung hna, bawlung chuihnak hna le hmun dangdang ah a vak tawn Cathiang nih. Bawipa, ka lungthin dihlak in nangmah cu kan thangṭhat lai .(Salm 9:1,86:12) tiah ati. ¤ Kan Hmurka & Kan Aw Nupi siknak, vale sin zainak le fale hronak ahcun kan aw a chuak kho ngai i a thang kho taktak. Bawlung puai le vawlei puai ahcun kan aw a thang in a chuak kho ngaingai. Asinain biakinn Pathian thangṭhatnak ahcun kan hmurte lawng a cang. Mi cheu cu hmur cang lo zong an um rih. Mi nih kan aw theih ding a phangmi kan lo i kanmah hmanh nih kan hlasakmi kan thei kho tawn lo. Cathiang nih .Lawmhnak hla in thangṭhat u law a au in au u (Salm 98;4) tiah ati. ¤ Hawidawt hna, Van le vawlei a ser i nang le keimah a a kan sertu (Salm139:13) Lianngan bik Pathian, kan sualnak vialte a kan ngaithiam i thihnak in nunnak a kan hruairu le zungzal hell ram tla dingmi kha zungzal vanram ah a kan hruaitu Jesuh khrih cu kan nunnak dihlak thangthat hna u sih(Salm 103:1). Bawipa thangṭhatnak ahhin na lung i awṭawm ti hlah law, na ning zong zak ti hlah. Ahohmanh ṭihzah ding le hmaizah ding an um lo. Na kut le na ke, na lungthin le nan thazang dihlak in Bawipa cu thangṭhat cang tuah. Cathiang nih Mi vialte hna, Pathian cu lunglawmnak in thangthat u!(Salm 66:1). A nungmi Pathian cu ka nunnak dihlak in hla in ka thangthat lai (Salm 84:2).Kan nun chung vialte Bawipa cu hla in ka thangthat lai (Salm104:33) tiah a ti. Amen. Sang Nawl Gospel Revival Ministries Email: gospelrevival2012@yahoo Facebook: Nitin Thlarau Rawl Phone : 0045 51 27 85 68
Posted on: Thu, 23 Oct 2014 12:40:41 +0000
Trending Topics
Recently Viewed Topics
© 2015