OPEN LETTER TO THE MIZORAM CHIEF MINISTER Ka Pu, Tun hnaia Chakma issue rawn alh chhuak lehah hian thil pathum rawn ngen duh che ka nei a. Mizoram pum tana tha tur nia ka ngaih avangin uluk taka min lo ngaihtuah sak tur leh buai zel kan pumpelh theihnan hma min lo lak sak nghal turin ka ngen duh che a ni. 1. Mizoram state in technical seat reservation kan neih hi min pe tuten min pekna chhan ang lova keini Zo hnahthlak ten kan lo pumhauh a theihloh leh kan entrance rules siam te High Court in 26th Sept 2000-a a lo hnawl tawh avangin he High Court judgement hi a awmzia kimchang zirlaite leh mipui nawlpui pawh min hrilhfiah turin ka ngen duh che a. Mizo te tan nilova Mizoram state tana pek kan nih avanga kan lo hriatthiam dan diklo hi huai takin, Mizo duhsakloh vang nilovin, I sorkar hian sawi chiang se thil tha tak niin ka lo hria. Kan ta vek tur nilo hauh vek tumna kan neih phah avangin awmze nei em em lovin kan buai niin a lang. 2. Indigenous chungchangah Higher & Technical Education Pu R.Romawian a department chan tho Art & Culture Deptt hnuaia Tribal Research Institution lehkhabu buatsaiha, Mizoram lei, Chakma hoten an rawn rah hmasakna ber kum chu 1872 A.D. khan a ni tih a lo inziah tawh reng laia Minister berin sorkar record pawh hre lova Mizo mipui te thinlung tina zawnga Chakma-te hi Mizoram mi an nih leh nih lohna leh, tribal an nih leh nih lohna kan hmu zo lo. Chakma-te STEE category-a dah an ni hi dan lo a nihna kan hre lo a lo tih khan a hna a tlinlohna lian tak a tilangin ka hria a. Tin, tul miah lovah I sorkar kaihhruai a tibuai bawk niin ka lo hmu. MZP ten indigenous awmzia hrilhfiah tura an ngen pawn dictionary leh Tribal Research Institute lekhabu bih lova Law Department te a hnawn kual tak zel avangin India Constitution Schedule 3 Part 5 tlawhchhana thu a tiam anga Minister nihna a kengkawh lo niin ka hria a. A hna a tlin loh avang leh sorkar rorelna a tihbuai nasat avangin Pu R.Romawia hi a mawhphurhna inhnukdawk tura hrilh turin ka ngen duh che a ni. 3. High Court berin kan STEE Rules-a Zo hnahthlak te tana seat kan pumhauh theihna tur a lo hnawl reng takah chuan, Court sang zawka kan thlen te a nih ngawt loh chuan, High Court thutlukna hi kan pawm tur niin a lang a. Tuna dan siamthat tumna awm pawh hi kan buaina tizualtu tur mai a nih dawn avangin kalpui zui lo turin ka ngen duh che a ni. He issue in a pholan - Chakma te hi Mizoram indigenous an ni nge ni lo? tih hi ngaihtuah a ngai ta hle in ka lo hria a. Chakma Law Forum, Bangalore ten an claim pakhatah Chakmate hi hmasang atanga Mizorama awm tawh an ni an ti a (Since time immemorial). Mizoram sorkar record ah Chakmate rawn luh hmasak ber 1872 kan tih si chuan an claim hi diklovin ka lo hria. Thuziak rintlak hmanga sawichian an theih leh theih loh zawtin an President Dilip K.Chakma chu Oct 2 khan email ka thawn a. Chu email chu open letter angin mizonews.net website in a lo publish bawk a (mizonews.net/op-ed/open-letter-to-chakma-law-forum-on-indigenous-issue/) Chhanna pawh thui angreng deuhvin an rawn nei a. Mizonews.net bawkin a rawn publish leh a ni. (mizonews.net/op-ed/chakma-law-forum-replies-to-laltanpuia-pachuaus-open-letter-on-indigenous-issue-in-mizoram/) Mizoram sorkarin ziak meuhva a chhinchhiah rawn khinletna a ni a. Chuvang chuan Mizoram sorkar vekin Chakma Law Forum rawn chhanna hi a lo zirchian a, a dik leh diklo lai tichiangin, Chakmaten Mizorama hmasang atanga awm tawh an ni tia an insawi hi sawibuai awm tawh lo tura tifel turin ka ngen duh che a ni. Kan ramah diknain ro a rel a, luipui anga a luan tak tak hi kum 5 kaltaa in sorkar in a lo auchhuahpui khan thinlung leh tih takzetin ka lo ring a. He hnam issue pawimawh takah hian chu in thuvawn takna chu hmuh beiseiin Mizote leh Chakma te tan pawha tha tur a nih vangin I hmalakna beiseiin ka rawn ngen che a ni. I rintlak, Laltanpuia Pachuau
Posted on: Tue, 14 Oct 2014 11:17:55 +0000
Trending Topics
Recently Viewed Topics
© 2015