Ongoongo a e Kaniva Tonga: Kuo fakapapau’i ‘e he kau polisi ‘a e tokotaha ne mahalo’i ki he fana ‘i he pongipongi Sapate kuo ‘osi ‘o mate ai ‘a e tokotaha ta’u 23 ‘i Sacramento ‘i San Francisco. Ko e tokotaha ‘eni ko Michael Sione Green ‘a ia ‘oku ‘asi atu ‘i he taa pea kuo fakapapau’i ko ia na’a ne tamate’i ‘a e tokotaha ko Melquiesha Warren pea mo fakalavea’i mo ha toe fefine hili ia ha ki’i fakatu’utamaki ‘i ha pakingi ofi ki he Hala Sixth mo e Jessie ‘i he taimi 2:10 henighengi Sapate ‘i he taimi ‘a San Francisco. Na’e hoko ‘a e fana ni hili ia ha ‘eva atu ha ngaahi kaungame’a ki he naitikalapu ofi pe. Hili ‘enau fepopoaki ‘aki ne hoko ha fakatu’utamaki kia Warrren mo hono kaungame’a fefine ‘i he pakingi. Hili ‘a e fakatu’utamaki na’e ‘asi ha fefine hange ha ‘ailani mei he Pasifiki fakafuofua ‘oku ‘i he ta’u 20 pea na’e pehe ‘oku ne ‘i he fute ‘e 6 hono ma’olunga pea kofu kulokula ‘o ne fakaofi atu ki he matapa ‘o e faka’uli ‘o feinga ke fakaava. Na’e hu heni ki tu’a ‘a Warren mei he kaa ‘o feinga ke fakamokomoko hifo e fefine ni ‘a ia na’e mahino ne ne ‘ita. Ko e taimi ia na’e ‘asi ai ha tangata ‘a ia ‘oku ‘i ai e tui ko Green mo ha me’afana ko e lau ia ‘a e kau polisi. Na’e fana’i ‘e Green ‘a Warren mo e faka’uli ‘o e kaa fakatatau ki he kau polisi. Na’e ‘ave loua ‘a e ongo fefine ki he falemahaki San Francisco General ‘o fakaha ai kuo mate ‘a Warren. ‘Oku ‘i he tu’unga fakatu’utamaki e mo’ui ‘a e faka’uli. Na’e ma’u ha mata’itohi fakaako ‘o Warrren mei he ‘Univesiti ‘o Kalifonia ‘i Sakalamento ‘i he Criminal Justice. Kuo fakapapau’i ‘e he kau polisi ko Green ‘a e tokotaha na’a ne fai ‘a e fana. Ko e tokotaha Tonga ia pea ‘oku ne fute nima ‘inisi 11 loloa pea ‘i he mamafa ko e pauni ‘e 230 pea kava mo ‘ululoloa hifo ki hono ongo uma. Pehe ‘e kau polisi ‘oku fu’u fakatu’utamaki ‘a Green. Pea ngali ‘oku ne faka’uli holo he Mercedes o e 2011 laiseni Kalifonia peleti fika 4UIP704 ‘Oku kei ngaue ‘a e kau polisi ke fakapapau’i ‘a e fefine na’e kau ‘i he fana.
Posted on: Sat, 23 Nov 2013 10:20:04 +0000
Trending Topics
Recently Viewed Topics
© 2015