SERMON Vol.8. Issue No.19,5 - 11 August,2013 A SIETNA LA SIEMTHA TU - Rev. Dr. L.S. Khawbung Chuongchun, nangmaa inthawka la hung insieng dinghai chun hmun hlui sie ta hnunghai chu rem nawk an ta, suon tamtak lungphum chu hung um nawk i tih. Chuongchun, nang chu, ‘A sietna lai siem thatu’ Mi umna ding lampuihai siem thatu tang an ti che (Isai 58:12) Thu kam keuna : ‘A sietna lai siem thatu ti thupui hi Kohran dang danghiai khawmin thupuiin an lo nei hlak ta a. Ei rama ngei khawm EFCI Kohranin thupui pawimaw takin a hmang a. Hi thupuia inthawkin ei ram le hnam ta dinga thupui lungrila invawi tharhai ka nei leiin ka hung ziek suok hlawl a nih. Ram politics-a tha naw le tirdakum ei hril hlakhai hi kum tinin a pangngaia a um zing a ni chun Pathien nauhai (Kohranhai) hin ei thaw ding ang ei thaw naw tina ning a tih. Ei rama politics hi a sie a ni chun Pathienthu lu taka inlang Hmar kohranhai hi Pathien thuin ami hnenaw tina ni bawk a tih. Ei ram rorelna fepui dan (political system) hin a hmangtuhaiin mani tieng chau ngaituoa sawrkar sin inthawtir tumna lungril ei put leiin sin tha thawna dinga sum le pai lak bingna hi pawi tawkna tienga ei ngai naw a hi hi thil hi pawi tak a nih. Siemthat sinthawtu ding hin Kristienhai naw chu khawvel ta dingin Pathienin buotsai dang a nei nawh 1. Siem that chu iengang am a ni a? ‘Siem thatna’ ti umzie chu thil a ni dan ding ang ni phak ta lo, suksieta um tah, ngai inawtir nawkna tieng le chuongang tungding nawkna dinga mimal le a nawlpuia hmalakna hi a nih. Mihriem hi Pathienin a siem dan phunga um ta lo, suksieta um tah, tungding nawkna dingin Pathienin a Naupa neisun a pek a, a Naupa chu mihriem suola tluhai siem that nawk dinga hringa pek a. Chu Pathien sinthawna chun mihriem tlusie ta hnung chu siemthar nawkin ei hung um ta a nih. Chuongang bawkin politics khawm hi a thaw naw ding ei inthawtir a, a thaw ding inthawtir lova ei hmang chang hin thil pawi nasatakin a hung tlung hlak a nih. Thil dang danghai khawm a nina ding indik taka siem tha nawktu dingin Pathienin ama anga a mi siem mihriemhai hi siem thatu ni dinga ko ei nih. 2. Khawlaia inthawkin am siem thatna chu tan ding: ‘Siem thatna’ sin chu mani senga inthawkin tan ding a nih. Mani tieng insiem tha si lovin khawvel siemthat tum ei tam hle a nih. Indiknawna tieng theida vieu anga inlang mani ta ding a ni phawt chun, thil indiknaw ti a hriet ngei ngei khawm lo pawm thei ei um hlak bawk. Amiruokchu, tukhawmin an mi zui naw ding khawm nisien, kei chu an dik chu tia zui or thaw ngamtuhai chu siemthatu dinga ring ngam ding mi chu a nih. Indik dan chu ei hriet vawng a nih. Hriet nawna hin mi a suokbuoi naw a, ei hmur le hnarin a phal nawna leia hriet nuom nawna hi ei suok intangna chu a nih. Khawvel siem thatu dinga Pathien nau dittak ei nina hi ei lungrilah a um hmasa phawt ding a nih. 3. Tulaia politics infuknaw le thanaw ei ti hi iem a um zie? Politics ei ti hi ama ngawt chu a sie naw a, ‘politics sie’ ei ti chu, a hmangtuhai indiknaw le an hmang thiem nawh tina a nih. Rorelna indiknaw ei ti khawm hi roreltu indiknawna lei a ni lem. Chem hi ama ngawtin tukhawm a sat ngai nawh. Kohrana mi popo tha vawng naw inla khawm Kristien ram delnaa Pathien Biekin le maicham vela um ngai lo mihai kuta ram inrelbawlna ei sie el chun thil tium a ni ding a nih. Chun rorelna tha khawm lo nei ta hrim inla khawm mipui tieng siemthatu nina lungril nei naw ei tam chun rorelna ei thuoikawi hlak a nih. Mipui ngaidan an tumtak naw chun roreltu huoisen ei mamaw zuol ding a nih. Siemthatu ni dingin indiknawna rorel kal ngamtu ei mamaw tina a nih. Mi zawmthaw, hmathlirna tieng hrim hrim hrilpui thei lo, tuta zuk chen nghal ding ngaituo mi ‘Tu pawl khawm nisien sem ding nei tha’ ti ngawt buoipui hlak mipui lai hin ei tam chun, roreltu tha le hmathlirna neituhai ta ding chun, rorelna tha chun hmun nei naw nih. 4. Siem thatna chu ieng tak hi’m a ni ding? ‘Siem thatu’ ding chun an dik chin chiea lungawi thei hlak mi ei tam a ngai phawt ding a nih. Indiknaw taka a ngirsuok ding a ni khawm a, ama chaua indik ngam, indiknaw taka thawtuhai an ngir suok ding a ni khawmin indikna thlang ngamtu ei tam a tul nih. Roreltu indiknawhai kara mi indik tumani, a thungna iengkhawm sawisel le hril ngam lova a thung hlak chun, chu pa or chu mi khawm chu indiknawnain a zui ve nghal hlak a nih. Indik tum mektuhai laia indiknaw dinga hung nawrtuhai laia a tlawm chun, chu mi or chu pa chu a tlawmin an dik naw nghal a nih. Ringtu chu suksuol naw ding a ni ringngawt naw a, an dik nawna lai sukdiktu ding a nih. Mi’n thuneina insangtak a nei ti an hriet kur a, a thuneina chu iengthawna ding am tia hmang hlak chu Pathienin an en zing hlak a nih. Pathienin mihriem kuoma a phut chu “indiktaka thaw a nih” (Mika 6:8). Indik le indiknaw kara hin tuilairapa um thei a ni nawh. A ni chu a ni el a, a ni naw chu a ni naw ni el raw se, ti hi Isu inchuktirna a nih. (Matt.5:37). Ringtuhai suol thlipuiin nasataka a mi nuoivelnaa hin (ringtu chu) thunga ei to tawk tawk hin suol ei inthuruolpui hlak a nih. Siemthat ngaia um Ram le Hnam nun a um mek lai hin tan bik le tan naw bik neia um a remchang naw a. Italian hla phuok thiem, lekhabu inlar tak “The Devine Comedy” ziektu Danta Aligieri chun “Nun thlaksietnain hnam a fak a, siemthatna sin thawtu ding mamaw laia tan ngam nei naw mihai ta dingin hremhmun a lum lai taka um an nih a ti hlawl a nih. Politics siet ding veng le a siet hnung siemthat nawkna sin chu Kristienhai hin ei mawphurnaa ei lak thei hma po chun ei ram delnaa rorelna hi ei taah ei ngai nawh tina ning a tih. Thangthar la hung umpei dinghai ta dinga lampui sattu le sukruolna sin hi kristien thlarau mi nina hin tlung phak sien nuom a um khawp el. Amen.
Posted on: Sun, 18 Aug 2013 07:26:16 +0000
Trending Topics
Recently Viewed Topics
© 2015