Skul is bak! Agnes Merecido-Almagro [An On-line Extra] Niadtong milabay nga Hunyo 3, gisugdan na usab ang bag-ong tuig sa pag-eskwela. Gidugangan kini og kusog nga ulan sa ubang mga lungsod ug gidayonan sa bagyong Emong. Mao gayod kini ang yanong mahitabo inigsugod sa klase. Samtang ang mga ginikanan naningkamot sa pagkab-ot sa mga galamiton sa mga anak sa eskwelahan, ang mga magtutudlo nagsugod na pod sa mga buluhaton alang sa inadlaw nga pagtulun-an sa mga kabataan sa eskwelahan. Nahimo na kining liyok kada tuig hangtud mahuman ang tang eskwela. Sa ikaduhang tuig nga pagpatuman sa K-to-12 curriculum, nasabtan ra gayud sa mga ginikanan ang mga tumong ug tinguha sa Dep Ed nga mabansay pag-ayo ang mga estudyante sa ilang mga pagtulun-an pagka human nila sa Senior High School ug pwede na silang maka trabaho sa ilang nakat-unan batay sa ilang opisyo sa kinabuhi. Sa nilabayng tuig, wala kaayo nasabtan kining bahina ug daghan ang ilang mga kabalaka kay kuno madugay nang mahuman pagtungha ang ilang mga anak kay nadugangan ug duha ka tuig. Apan bisan pa niini, nagpadayon ang mga programa sa gobyerno pinaagi sa Dep Ed aron gayud mahimutang ang tanang mga kabataan sa tunghaan sa tiyempo sa klase, ug dili mausik ang ilang oras sa pag tambay tambay lang. Daghan na ang mga eskwelahan diri sa lungsod sa Siaton, ningsaka na gani ang uban sa mga lagyo nga barangay aron gayud ma edukar ang kabataan. Adunay tutulo ka distrito- Siaton East gidumala ni Dr. Ester A. Futalan, Siaton West 1 gidumala ni Mrs. Fe K. Zuniga, ug ang bag-ong distrito,Siaton West 2, gidumala ni Mr. Antonio Baguio, Jr. May plano pa nga himoong duha ka distrito ang Siaton East sa umaabot nga mga adlaw. Tungod niini, gidapit ug giawhag ang mga ginikanan nga pahimuslan kining higayon: kinahanglan nga mo eskwela ang atong mga kabataan aron masulbad na ang kapobrehon sa panghunahuna ug kalisod sa panginabuhi. Ang kalamboan anaa sa atong mga kamot ug sa atong kaugalingon nga pagpanglimbasog. Manghinaut gihapon kita sa maayong panuig ug panalangin sa Ginoo, ang tinubdan sa tanan.
Posted on: Sun, 07 Jul 2013 02:46:58 +0000
Trending Topics
Recently Viewed Topics
© 2015