TUALTHATTU CHU THOSILEN! (He thu hi a sei deuhhlek avangin phone atanga chhiarte chuan a pic-ah hian in click dawn nia...) Tlai khat chu kan chaw ei laiin mikhual kan thleng hlawl mai a. Amah chu ka putea zokhaw lam mi a ni. A khua leh hming chu thup mai ila, amah chu pa invawng fel tak, hrisel hmel ver vawr tak a ni a, kum 40 leh tih vel lek a ni nghe nghe. Fur lai a nih avangin thosi an hlauhawm riau a, zana kan mu tur chu kan mikhual pindana khumah chuan thosilen a inzarloh avangin ka nu chuan a thosilen lei thar, thosilen dang suk a ngaih huna lo zar thlak atana a dahthat chu a rawn phawrh chhuak a, duhsak takin ka putea chu a zar sak a. Dar 10 velah chuan ka chhungte chu an mu reh thap tawh a, keipawh ka thil buaipui lai a laklawh lemlo bawka, lunglenna leh enghelh pawh nei lem lovin ka mu ve nghal thuai a. Rei ka suangtuahna khawvelah chuan ka cheng lo, ka hriat hauhloh chhungin tawnmang rama cheng tur chuan ka lo muhil ve thuai a. Zing dar 6 leh a chanve vel a niin ka hria, ka room lehlam chiah, kan mikhual pindana ka putea mutna atanga ka nu tap ri ka hriat takna kha. Thawhphan pawh nei lovin hmanhmawh takin ka khum atang chuan ka zuangtho zawk a, ka pindan lehlam chiaha ka putea mutna pindanah chuan ka va tlan lut nghal a. Ka thil va hmuh tak chuan min thawng a, mak ka ti a, rin harsa ka ti ngawih ngawih, ka putea chu nat lawkna pawh nei lovin a lo thi der mai a ni. Chu chu fiah takin ka hmu a, tumah zawh leh chuan ka ngailo. Kan chhungkua chu kan hrilhhai tlang tak zet a ni. Reiloteah ka nu tap thawm hriaiin kan thenawm khawvangte chu kan inah chuan an rawn tlan lut nghal tak tak a. An ni pawh an hrilh a hai a, an mit an khap te chuan zawhna tamtak an khap tel ni vekin ka hria. Ka pa chuan engmah hriat kan neihloh thu leh an zing tho ka nuin thingpui pek a va tum chu a lo chahthlak fel der tawh thu a lo hrilh hlawm a. Chumi ni la la chuan nimin lawka rawn thleng ka putea chu an khaw lamah phurh haw a ni a, mahse a haw leh dan erawh a dang ta. A nupui fanaute chuan an hmangaih an pa chu mittui nen an lo hmuak a, an hmela hriatthiamlohna leh lungngaihna nasa langchhuak chu hmuh hrehawm khawp a ni. An hmangaih an pa chuan ‘Mangtha’ pawh ti lovin thlafam a chan san a, kir leh tawh ngailo turin piallei thuahriat hnuaiah a zal san dawn chu a ni si. A fate ka en chuan ka mittui a sur lo theilo. Ka putea chu an la mamawh ngawih ngawih a ni tih hai rual a ni si lo. “Aw, thihna zet hi chu, ava runthlak thin tehlul em…” ka ti rilru vawng vawng a. A hnua ka pute nupuiin a sawi leh danin ka putea chu thisensang nei a lo ni a. Chumi avanga a taksa chaklo thut chu zo lovin, a boral ta ni berah kan ngai. Chu lo han puh tur dang kan hre chuanglo. Ka putea boral atang thla hnih a liam leh tawh a. Zankhat chu Champions League final khelh a ni dawn a. Ka thianpa chu kan ina en tur leh rawn riak nghal turin a rawn thawk phei a. Kan tan lam a in ang a. Kan tan te an chak avangin hlim tak leh thlamuang takin dar 3 rik hmain mu turin khum lam kan pan a. Ka thianpa chu kan mikhual pindana mu tur a nih avangin ka room atang, “Mangtha aw,” tiin ka han au a. “Mangtha love. Kan la inhmu leh ang chu. Muttui zawk le...” a rawn ti a. A tuk zingah chuan ka nuin chaw ei dawnah mi rawn kaitho a. Ka inphihfai sawk sawk a, chaw ei dawhkan chu ka va kil ve nghal a. “Marema a haw tawh em ni?” zawh bik pawh nei lovin ka han ti a. Ka nu chuan, “A lo riak ve em ni? A lo riak tih pawh ka hre hleinem. A la tho hauhin ka ring lo mai. Chaw te han ei ve nghal se, va kaitho rawh,” min ti a. Muangchangin Marema mutna pindan lam chu ka pan a. “Hey, tho teh,” ka sawi a, hre awm pawhin a lang lo. A mutui hle a nih ka ring a, “Tho teh,” ti tuarh chungin ka pawm kang lawp a, ka thlah leh rual rualin khumah chuan a bawk thla leh thlawp a. A zawi hauhlo tih ka hria. Ka kuai let a, a hmel leh mitmeng chu(h)?! “Nu, pa, Marema awmdan hi...” ka ti tuarh a. Ka pa chu rang takin a rawn lang a. “Engnge thil awmzia?” ti chungin Marema chu a rawn bawihsawm a. “A mar a awm hauhlo,” ka pain a tih ri chu ka mumang hriat ruai ruai! Ka nu leh ka pa ka auh tirh khan ka thianpa chu a thi tawh tih ka hria a. A thi tawh a ni satliah mai lo, a khawng vek tawh a ni! A va hrilhhai thlak tehreng em! Ka pa hi kohhran upa a ni a. Chuti ni suh se ka putea thihna khuma Marema a thih ve leh avang chuan mi rinhlelh kan kai ngei ang. Marema ruang chu a chhungte`n postmortem an remti lova. A ruang nia an inbanga signboard intara “Lalremruata, Thih chhan - Lungphuchawl” tih inziak mawlh mai chuan ka ngaihtuah a ti thui. Engah nge ka putea thihna khuma kher kher? Chutah thihdan inang chiah lehnghalin! A mak a ni. Kan mikhual pindan chu eng thlarau sualin emaw a chenchilh a ni han ti dawn ila tunhma pawhin mi chi hrang tamtak an lo mu fo tawh thin a, eng harsatna leh buaina mah an tawk ngai si lo. Mahse an thihchhan thuah erawh chhuanlam tha tawk an chhungte`n an nei ve ve a, ka putea chu thisensang nei a ni a, Marema chu ruihhlo ti ve thin a ni thung. Mi thenkhat chuan OD-a thi a nih an ring ru a. Mahse ka hriat chinah khami zan khan Marema khan eng ruihhlo mah a ti-in a rui lo! Ka mutsan hnua a lo tih leh tih loh erawh ka hre lo. Rilrua ka vei ruk chu ka chhungte pawhin an lo vei ve tho a lo ni. Zankhat chu ka room-a ka awm laiin ka nu a lo lut a, “Mama, mikhual pindanah i pa riahluh a tum ania!” a rawn ti ngawt a. Chu thu chuan mi deng zawk mai. “Engnge a tulna?” ka lo ti vat a. “I putea leh Marema thihna thuah khan mikhual pindan khian inhnamhnawihna a neih a ring tlat a ni,” a ti a. “A atthlak lutuk,” ka lo ti tuarh a. Ka nu chu a phu zawk nghe nghe. “Mahse kan dang thei chuang lovang,” ka nu chuan a han ti leh a. Ka ngawi vang vang a, chhan mai ngaihna ka hrelo. Ka hlauh anga mikhual pindan avanga thihna chu lo thleng ni ta se ka pa chu ka chan ve dawn tihna a ni. A theihloh! “Ka pa chu a riak lut lovang, a tul leh keimah ka riak lut anga a ni mai,” ka han ti a. Ka nu chuan, “Inbengdai teh. I pa chuan hrilhlo tur chein min ti a. Kan dang thei dawn chunglo. Tih theih kan neilo. Zankhuain i beng lo chhi la, lo ngaihven ru reng ang che,” a ti a, hlauthawng takin ka nu chuan min chhuahsan ta a. Kan in hi ka pa thawhna department quarter a ni a. A tun hma chanchin kan hre lova. Kum 5 dawnlai chu kan awm tawh. In erawh kum 15- a upa a ni thung. Chutih chhung chuan thil tam tak lo thleng thei reng a ni. Mikhual pindanah pawh chuan mi tamtak an lo mu tawh ngei ang a, chung ho chu hriat vek sen an ni lovang. Ka hriat chinah chu pindan atang chuan ruang pahnih a chhuak ta a. Chu pawh thih dan inangin! Zaninah chu pindanah chuan ka pa riak dawn chu a ni a, ngaihtuah a tam duh kher mai. A inkhawm a rawn ban hlim atang ka pa chezia chu ka lo chik ru viau a. Eng emaw chuan a mawlh ve ni ngei tur a ni, a tawng tam lo hlein ka hria, ka ngaihbel vang pawh a ni thei tho. Dar 9:30 velah ka nu chu ka room- ah a rawn lut leh a, “I pa chu mu turin a lut tawh, bible a akeng lut a,” a rawn ti sa sa a. Ngaihthalo fe-in ka nufa chuan hun eng emaw chen kan thu dun char char a. Zan a rei hnu chuan ka nu chu mu turin ka nawr lui tal a. “I mutthilhsan ang tih ka hlau em mai,” ti chungin hreh takin min chhuahsan a. Chumi zan chuan chhin khat mah ka chhing lo. Dar 4 velah zunram thiar turin ka va chhuak phei a, ka nu chu kan thutkhawmna pindanah a lo thu reng a. Hrilh leh chuan ka ngai lo, a mitmeng atang chuan chhin khat mah a chhinglo tih ka hria. Mangan hmel zetin min lo en a, “Va kaihharh tawh mai ka tum a, room kawngka a kalh tlat,” a lo ti a. Ka hlauthawng ve ta viau mai. Zankhuain ka mutna atang chuan thawm ri hriattur a awm lova. Tui taka muhila kan ngaih laiin ka pa chu?! Ka ngaihtuah zui ngamlo. Mikhual pindan kawngka chu ka chum a, “Ka pa, ka pa,” tiin ka han au a. A reh vawng vawng mai. Kan nufa chuan kan mangang ta takzet a. Ka nu chuan, “Mama pa, mama pa,” tiin hlauthawng leh thlabar tih hriat zetin a lo au ve bawk a. Rei fe hnuah, “Ummmm...” tia ka pa aw kan hriat chuan kan thaw huai mai. Kawngka chu a rawn hawng a, “Engnge ni ta vak vak? A la hma viau hi,” phak chuap hian a rawn ti a. Keichu engmah sawi lovin bathroom lam panin ka kal nghal daih a. Ka thinlung chhungril erawh a hlimin ka thla a muang veng veng mai. Mikhual pindana thlarau sualin thla a zar thina kan rinna ti tawp turin chu pindan chuan mi chi hrang hrang a lo mikhual leh hnu pawha eng harsatna leh buaina mah a awm takloh avang chuan ka putea leh Marema thihna chu a ve tur renga ngaihna ka nei ta a. Kan awmna quarter-in thuruk eng emaw a nei nia ka lo rinna pawh chu paihthlak a ni ta a. Nikhat chu High School kan kal laia ka thian kawmngeih ve deuh mai Sangau lam mi Zotea hi kan inah a rawn thleng a. Kan zan mu tur chu, “I mutna tur pindan atang hian ruang pahnih a chhuak tawh ania... I duh chuan ka bulah emaw sitting room-ah i mu zawk dawnnia,” ka ti fiamthu a. Nui hak hak chungin, “He khawvel atang hian ruang nuai za tam a chhuak tawh a, i duh chuan planet dangah i pem dawnnia,” min ti let ve a. Hlim takin kan in mangtha a. KTP-a kan group drama chan tur ka ziah lai a nih avangin zan rei tak thleng ka meng a. Zanlaia mikhual pindan atanga ka thawm hriat avang chuan ka suangtuahna khawvel ata ka harh chhuak chiang kher mai. Ka room atang chuan ka tlan chhuak a, ka thianpa chuan pindan chu a lo kalh lo hlauh a, hmanhmawh takin ka tlan lut a. Light ka hmeh en hnuah thosilen chu ka va vai keu pawp a. Ka thianpa hmel leh awmdan chuan min ti thlabar kher mai. Thaw tha theilo tih hriat takin harsa ti takin a thaw hrawk hrawk a. A chang leh a rawn kang leh lawp lawp thin a. A mitmeng chu a pual vek a. Nasa takin a hmel chu a siam chhe bawk bawk a. “Zote, i harh em? I harh em?” ti chungin ka sawi a, a rawn harh mai dawn hauhlo. A rawn tal nasa zual sawt a, ka dawt hneh nganglo a, ka inthiarfihlimsan a, ka pa ka va pun ta a. Kan pafaa Zotea kan buaipui lai chuan thlabar leh hrilhhai fein kan kiangah ka nu chu a lo ding ve a. “Hetiang ringawt chu a ni thei dawnlo, i nu Sangpuii va pun chhin teh,” ka pa chuan mi ti a. Hmanhmawh takin kan in atang chuan ka tlanchhuak ta a. Nu Sangpuii chu nurse senior a ni a, sister-a a kaisanna pawh rei ve fe tawh a ni a. Kan vengbawrin damloh nikhuaa hmanhmawh thila kan koh phar reng reng a ni. Nu Sangpuii nena kan let leh chuan Zotea chu a lo zal der mai a. Hlauthawng takin, “A chatthla ta em ni?” ka nu leh ka pa hnenah chuan ka ti a. “Chatthla lo, a muhil a nih hi,” ka pa chuan a lo ti a. Ka thaw huai mai. Nu Sangpuii chuan, “Engtinchiah nge a awm a?” a han ti a. A awmdante chipchiar zawka kan hrilh hnu chuan kaithawh reng reng tha tlangin kan hria a, kan han kaitho chu a rawn thlabar hmel ngang mai. “Engtinnge ka awm?” a rawn ti hu a. Kan lo ngawi thap a. Nu Sangpuii chuan, “Engtinnge i awm zawk a?” a lo ti a. “Mumang rapthlak lutuk ka nei a,” a han ngawi deuh dat a, “Rapthlak tak a ni. A tak lah chu a ang hle lehnghal. He pindan chhunga thil thleng vek hi a ni,” ti chung chuan a hawi kual ruai a, “Sawta tang sawn a chhuak leh a,” tiin ventilation lam chu a kawk a. “I hriselna a tha em?” Nu Sangpuii chuan a lo ti a. “Ka thosilen hi a rawn keu a, pawnchhe rimchhe deuhin ka ka a hup a, talchhuah ka tuma, ka thei silo... Eh... aa.. aw, ka hriselna chu tha e. `ti ila TB treatment la lai ka ni a,” a tawng bah nuai a. “I thisen a hniam a ni ang, i enchhin ang aw... A nih hi... I chau a nih hi... I damdawi te chu i ei tha em?” Nu Sangpuii chuan a ti a. Amaha mut tir leh chi a nihloh avangin ka mutpui ta a. Hemi zan hian a ni thil mak deuh mai ka chunga a thlen ve tan tak. Ka thianpa chu thlamuang takin a muhil taa ka hriat hnu chuan ngaihthatlohna pawh nei lovin mutthilh ve mai ka tum a. Ka muhil ve tan dawn diar diar tih chuan ka beng bulah hian aw hian, “Harh rawh, muhil suh,” a rawn ti tuarh a. Ka harh chiang kher mai. Ka hawi kual nghal ruai a. Light ka off loh avangin pindan chhung chu ka hmu thei vek a, mihring tumah reng ka hmu si lo. Ka mumang mai a ni ang e tiin hahdam tum takin ka mu tha leh sauh sauh a. Mut erawh a chhuak mawh ta khawp mai. Mahse ka taksa a chau ngang a, darkar khat dawn a liam leh hnu chuan ka lo muhil leh ta a. Aw bawk chuan, “Inti harh rawh, thih ila duhloh chuan harh rawh,” a rawn ti tuarh a. A chiang kher mai. Chu aw chu ka bengchhe ri leh ka mumang mai a ni lo. Ka hlau a, ka hmulthi te hial a ding sung sung a. Ka hawi kual vel ruai a. Engmah lah chu ka hmu der si lo. Ka ngaihtuah chian poh leh ka mak tih a zual tulh tulh a. Chu pindan chhung chu ka tih ta ngawih ngawih mai a. Khawvar hlan ka nghakhlel hle mai bawk. Sana ka en a, dar 4 a lo pel tawh a. Khua pawh a var har dawn tawhloh hi ti rilru chungin ka hlauhna chu theihnghilh ka tum lui a. Khuma chuan ka thu mu ran a. Ka thianpa lam ka han hawi a. Ani chu eng em a ti ta lo a nih dawn hi ka ti rilru a. Ka en vang vang a. Reilote hnuah ngaihthatlohnain min rawn tuam ta hulh hulh a. Khum atang chuan a zuanin ka zuang chhuak a. Thosilen kaihna te chu ka pal chat nuai a. “Pa, Zotea hi.... a thaw tawhlo.” Ka thianpa, ka thian tha tak, min ngai em em tu chu ka pang si chialin a chatthla veleh ta. A va rapthlak zozai tak em! Ka kiangah, ka kiangah ngei a mu a. Mitthi ka mutpui a ni tih reng ka lo hre si lo. A hnua ka ngaihtuah let leh phei chuan muhil lo tura min rawn au tu kha ka thianpa Zotea ngei kha nia hriatna ka nei ta tlat a. Ka ngaihtuah let leh ringawt pawhin ka hmulthi a ding sung sung a. A pawi ka ti takzet bawk. Kan mikhual pindan atang chuan kumkhat chhungin ruang pathum a chhuak ta! Tu tih nge? Zotea thih zana ka thil tawn chu ka pa ka hrilh a. A hmela mak tihna lo lang chhuak chu hmuh hmaih rual a ni lo. Ka pa chuan an thawhpuite hneh atang chu quarter chanchin hmasa lam a lo chhui chiang a. Chu quarter atang chuan ruang pahnih chu a lo chhuak ve tawh a. Mahse kan awm ve hnua ruang chhuak ang erawh chu a ni lo. Chu quarter atanga ruang chhuak hmasa te chu natna tuara thi vek an ni a. “Engpawh nise heti ringawt chu a ni thei love. Quarter dang luah kan hotute ka`n dil ang e,” ka pa chuan a ti a. Thla hnih hnuah chu quarter, ka putea leh ka thiante pahnih boralna chu kan chhuahsan ta a. Kan in thar chu kan awmna hmasa aia mawng leh tlabirh daih a ni a. A ina pawh a rawp tawh zawkin zim pawh a zim zawk a. Mahse kan in hmasaah chuan thlamuangin ka muhil thei lo a ni si a. Chu kan in thar chu lawm tak leh thatho taka kan luah a tul a ni. Thla thum zen zawn kan awm chhungin eng harsatna mah kan tawk lova. Kan quarter luah hlui pawh chu kan chhuah hnu lawkah midangin an rawn luah veleh a. Eng harsatna mah an tawh ve lemloh avangin ngaih pawh a tha ta viau a. Mahse keini pawh kum 5 kan awm hnua harsatna tawk ve chauh kan nih avangin ngaih erawh a tha fumfe chuanglo. Tuna kan awmnaah hian mikhual pindan ahranpain kan nei leh a. A hma ang bawkin pindan thuk leh thengthaw lo lai ber chu mikhual pindanah kan hmang leh a. Ka nu hi nu dawihzep ve fe a nih avangin ruang pathum lo chawi tawh tu khum hmasa chu kawl zui zel a duh lova. Mikhual pindana khum pawh chu a thar a siamtir ngat a. Thingtlang mi kan nih avangin mikhual kan nei zing hle a. Kan mikhual pindan pawh chuan mi chi hrang hrang a mikhual leh zut tawh. Zan khat chu dar 9 velah ka nu te khaw lam atang mikhual kan thleng a. Pafa berh hmel fe hi an ni. A fapa tlangval zawk chu a hnathawhnaah lunglumin a ke-ah a delh a, a malpui ruh a tliak a. Chumi enkawl tur chu Aizawlah a chetsual ni la lain an rawn chhuk a ni. An pafain khumah chuan a leng lova, a pa zawk chu chhuatah a mu a. Hetih hunlai hi ka lehkhabu ‘Tianhrang Thlan’ ka ziah ngawrh lai a nih avangin ka meng rei thei hle a. Ka tlaivar thak thak chang pawh a awm fo a. Zing lam dar 2 a ri tawh, ka riltam inhnawhpuar tuma ka pindan atanga ka va chhuak chu mikhual pindan lam atang chuan thawm ka hre ta a. “Mama, Mama, engtinnge i awm? Harh teh, harh teh,” tia inko chul ri hi ka hria a. Hmanhmawh takin pindanah chuan ka tlan lut a. “Ka pa Vul, engnge thil awmzia?” ka va ti vat a. “A thaw theilo niin ka hria, a tal awrh awrh mai,” thlaphang tih hriat tak hian a lo ti a. “Lalpa leh!” Ka phun chhuak sap a ni. Zotea awmdan ang chiah kha a ni. “Lo kai harh rawh, khum atang khan pawt thla rawh. Ka pa ka va kaitho ang e,” ka ti a. An pindan atanga ka pa rawn chhuak chuan, “Engnge thil awmzia?” a rawn ti a. “A in tan leh ta,” tih ringawtin ka lo chhang a. A hrethiam a ni. Ka sawi awmzia chu a hria. Hmanhmawh taka mikhual pindan lam a pan chu ka zui ve nghal a. Kan damlo chu thutthlengah kan mut tir a. Kan zavai chuan kan vil ran a. “Mutthilh tir loh tur, tumah kan muhil tur a ni bawk hek lo,” tih chu ka pa nena kan thupui a ni tawp mai. Engmah hre velo ka nu chuan a damlo chau mai a nih a ring a, in thara kan awm tawh avangin ngaihthatlohna pawh a nei heklo. A taksa a chau bawk nen, a lo muthlu leh thin a, ka pa chuan a kai harh thuai zel a. A hrilhhai thin kher nghe nghe. Chumi zan chuan tumah chhin khat pawh kan chhing zui lo. A tukah chuan ka pa nen thu pawimawh tak sawi dun tur kan nei a. Kan pahnih chauhin thutthlengah kan thu dun ran a. Han sawi mai tur erawh kan van dun viau mai si. “Kan in luahin a zirloh vang chu a ni hauhlo mai,” ka pa chuan a ti charh charh a. “Kan chhungkua hian Pathian pawi kan sawi nge Setana pawi kan sawi zawk? Hriatthiam a va har tehlul em!” tiin a thaw halh halh a. Kan harsatna chu vai kian dan ka hre bik si lova, ka pa rilru hah hui pap pap chu ka khawngaih hle a. “Engtia tih chi nge ni le?” ka han tih chuan ka pa chuan a lu a thing a, a thaw halh a, “Mikhual thlenloh a him ber! Hetiang chuan mi nunna kan la hnem lutuk dawn,” a ti a. “Eng a?! Ka pa, tu nunna mah kan la lo. Kan kuta thi, kan thah an ni hleinem,” ka lo ti tuarh a. “Mahse kan inchhunga thi an ni tlat si! Engah kher nge hetiang thil...! Eng thil phiangsenin nge kan chhungkua hi min chenchilh le?!” ka pa chuan hui pap pap chungin a ti a. “Engpawh nise Pastor hnenah kan chhungkua min tawngtai turin ti ila a tha ang?” ka pa chuan a han ti leh a. Beidawng takin, “Ka pa, i rinna a chaklo zo ta em ni? Ka pa, kohhran upa Pathian mi hman kha i ni ta lo em ni? I tawngtaina aiin Pastor tawngtaina chu a nung zawk bikin i ring a maw? He thil hi Pathian hremna emaw, Pathian rawn thlen a nih ka ring lova. Pastor tawngtaina chuan thil tha a thlen bikin ka ring lo. Ka pa, i chakna i hloh zo ta em ni?” ka lo ti bah nuaih a, ka sawi tum ber pawh ka hre biklo. Diktak sawi chuan ka rilru buai ve takzet a ni. “Mama, keimah leh keimah pawh ka in ringhlel ta hial mai! Thil thleng hi a pangngailo a ni,” a ti dat a. Kan mikhual te chu thutthlengah kan mut tir a. An ngaihthatloh hlau chung chungin keipawh thlutthleng pakhatah ka mu ve zantin ta a. Eng harsatna mah kan tawk zui leh ta lem lo. A mak ngawt mai, kan inchhunga thil thlen dan chu. Kan mikhualte haw hnu chuan ka pa chuan mikhual dang thlen leh a remti ta rih lova. Hreh tak chungin mikhual tur an awm pawhin kan lo hnar thin a. “An nunna atan a hlauhawm a ni tih an hriat chuan kan chungah lawmthu an sawi zawk ang,” ka pa chuan a ti mai thin. Nikhat chu Salem Venga ka thianpa Biaka`n zanah kan ina nupui rawn ruk a tum thu phone-in min rawn hrilh a. Ka thianpa chu tih beidawn ka hreh si a, hreh tak chungin ka remtih sak ta a. Ka nu leh pa hnena lo sawi lawk chi a ni si lova. Ngaihthalo zetin an lo lan hun ka lo nghak ngawt ngawt a. Ka beisei ang ngeiin zan dar 9 pelh hnuah an lo lang a. Kan in atang chuan ruang a chhuak leh ang tih mawlh ka hlau a, ka thin a phu dut dut reng a. A nupui ruk nen chuan mikhual pindanah chuan riak turin an lut a. Ngaihthalo zetin ka thlir liam a. Kan in hmasa ang lovin ka room atang mikhual pindana thawm ka hre pha tawh si lova. Zankhuain thutkhawmna pindanah ka awm phah a. Nupa nun an hmang te chu an han uar laileng khawp a. Mahse an thawm hriattur a awm hrim hrim chu ka tan thawvenna tham a tling a ni. Zan a rei tulh tulh a. An thawm a reh ve ta. Nupa nun an hman laia an uar tehlul nen an han reh meuh chuan Ngurthanpari te nufa Lalhrima khaw lam pan ang maiin an reh zui ta a. Zan a rei tulh tulh a, ngaih a tha mawlh lo. Rilru a va hah duh thin tak em. Hlauthawng tak inthiamlo ru tak siin kawngka chu ka va kik a, “Biaka, Biaka,” ka han ti a. Reiloteah kawngka chu a rawn in hawng a, “Engnge ni ta?” a rawn ti a. Han sawi leh mai tur ka hre ta silo. Mikhual pindana puan te chu sin belh tur angin ka la ta vel mai mai a. Khawvar nan darkar 4 dawn lai nghah a la ngaih avangin ngaih erawh a la tha zan lo. Ngaih ngam lo deuhvin sitting room-ah chuan ka mu tlaivar ta zak a. A tuka dam taka an pahniha ka hmu leh chu ka hlim kher mai. Thla 4 lai a liam leh tawh a. Ka pa nena kan rilru hahna pawh a kiang tan a. Mikhual pawh kan nei veleh ta zauh zauh a. Thinthiin kan mutthilhsan ngam veleh ta a. Zankhat chu ka ni te nupa inentirtur kan mikhual a. An nupain mikhual pindanah tawt angreng takin an mu a. Chumi zan chuan thlipui leh ruah a thawk chiam a. Mikhual kan neih zan a ni kher nen, ngaih a ngaih a ngam leh ta zan lo. Mahse hritlang awmna ka neih lai a nih avang leh ka hna ka thawhrim em avangin ka chau hle a, hma taka ka lo muhil a. Mumang ka lo nei a. Ruah sur bur bur kara thli taw vuk vuk chuan ka room tukverh chu a rawn theh hawng thuai a. Chuta tang chuan ka putea leh ka thiante pahnih Marema leh Zotea chu an rawn lawn liam ta mai a. Ka hlau lutuk chu ka te tuarh a. Tlanchhiat ka tum a, mahse ka che thei der lo. Ka khur zawih zawih a, “Thih ka la duh lo. Ka harh a ngai. Ka harh a ngai,” ka ti mawlh mawlh a. Ka mumang a ni tih hre mah ila ka thil hmuh chu a chiang viau si. Ka khur zawih zawih a. An pathum chuan ka lam panin an rawn kal a. A hnung bera kal Zotea chuan eng emaw hi a rawn pawm bawr tun a. An pathuma ka hmaa an rawn din chuan a thil kenin Zotea chuan min rawn vawm a, ka hlau chu ka tap hial a. A mi rawn vawmna chu ka han en a, thosilen a lo ni a! Mak ti deuhin ka en a. “Kha kha hal la, tumah kha thil avang khan an thi tawh lovang,” ka patea chuan a rawn ti a. An mahni chu ka han en a, an hmel chu ka hmu chiang thei hauhlo, mahse anmahni an ni tih erawh ka hrechiang si. Ngawi rengin an inher a. An lo luhna atang chuan a lawn liam leh ta a. Khawpui ri puak thuai chuan min ti harh zawk a. Ka room tukverh inhawng atanga thli rawn lut chuan min chhem sawk sawk a. Ka hmai ka han dap a, ka biangah ka mittui luanna a lo la huh phung a. Ka ngaihtuah a, ka mumang chu a tak tak a ni. Tunah chuan hlauhna em em pawh ka nei tawhlo. Ka tihtur chu ka hria. Tukverh chu ka va khar a. Ka let leh lamah ka room chhuata ke hniak huh dup te chu ka hmu ve chauh a. “A tak ngei an ni!” An thosilen rawn ken chu kan mikhual pindana ka nu zar lai mek a ni tih ka hria. Hlipa hal nghal tumin ka room atang chuan chhuah ka tum a. Kawngka ka hawng chiah chu thlaphang zeta ka nu rawn luh tum nen chuan ka in tawk a. “Engnge thil awmzia?” ka lo ti thuai a. “I ni te nupa...!!” Ka tlai leh ta a ni. Thihna Dawihlo ‘Thosilen’ chu khawchhak sumdawngin ka nu a rawn zawrh a ni a. “Pawisa pawh kan neilo,” ka nuin a lo ti chung pawh chuan, kan boiler ar vulh a hmuh chuan ar nena inthleng a dil tal a. A man a in hen tawk viau thoa a hriat avangin ka nu chuan a lo inthleng pui a. Chu thosilen chuan nunna tamtak a la ta a ni. Ka nuin a zar tuma kan mikhual ka putea, ka thiante Marema leh Zotea te`n an thihpui a, kei leh mi pakhatin kan nunna kan chan phah thelh bawk. Mikhual dangte leh Biaka te nupa erawhin ka nuin a suk avanga a zar loh lai an nanga, an vannei ta a ni.
Posted on: Wed, 28 Aug 2013 01:59:30 +0000
Trending Topics
Recently Viewed Topics
© 2015