TUOLSUNG CHANCHIN Vol.8. Issue No.28 14-20 Oct. 2013 ** Pu Lalnunmawi Biete, Gilgal Muolhoi a um chun Hyundai company a mi i10 a thar hlawk el chu a lo inchawk der tah. Chun, Pi Kimting Singson, Asst.Labour Commissioner khawmin motor thar hlawk Renault Pulse chu Inrinni hin Muolhoi khawpui a hung lutpui. Ama ruol hin Pi Hnemi Tuolor khawm EFCI CNHP Board meeting-a fe khawm damtakin a hung tlung. Ei lawm pui hle. ** Tarik 23/10/13 Zingtieng Dar 11 hin Fiangpui PCI Biekin a Rev. Lalremsiam Ngamlai le Nk. Ramhlunvari, D/o N.D. Thanga Nampui hai chu kohran danthienglim in Rev. James Muona Kungte kuta damsunga dingin ‘tiem tlat e’ tiin kutinsuina nei an tih. ** ICI Assam Hills Presbyteries Nuhmei Pawl Conferernce, Tuolpui khuoah tarik 18 – 20 Oct. 13 sung hin nei an tih. Speaker Ms. Darthangmawi , WCO chun ‘I ram hung tlung raw seh’ ti thupui hmang in thu le hla inruolsiekna nei bawk an tih. ** Tarik 20 Oct (Chawlni zan) hin EFCI Pastor Lalthatvura Kungte, in Fiangpui PCI Biekin ah NEICC programme huoihawtna hnuoiah Pathien thuhrilna nei a tih. ** Pu Eldad Neingaite le Pi Rebecca Lalhrietkim hai kara nau pasalte hmel lawmum takel chu Haflong Civil Hospital ah an lo nei tah. ** Nk. Rebek Khawbung D/o Phaihluothang chu thisen hai chen pekin hospitala a lut nawk a, damtaka hung suoka kohran lai rawngbawl thei vat na dingin tawngtaina’n lo san ei tiu. **Oct. 17 khan Pi Runu Ralsun W/o Lalzarmawi Hmar chu International Hospital ah Appendix operation hlawtling taka an thaw thu lo dawng a nih. ** HPU in Silchar lampui hlui siemthat a phut. Ei chengna khawvel hi nitin in hma a sawn pei a. Mitin le hnamtin in iengtinam hmasawn kan ta! tiin thang an lak nasa hle bawk a, kaikuongpa khawmin ka umna ‘Li’ hi inthuk rawse tiin thang a khaw ve a. Hmar nauhai khawmin a kar chang chun harsatna ei tuok hlak a, sienkhawm harsatna chu tuor peiin iengtinam hnam in hmasawm ei ta! ti hi HPU, NC Hills chun an ngaituona le a thiltum tak chu a nih. NC Hills a Hmarhai bubitna Retzawl-Amranagar Road hi Indopui-II (1939-44) laia British haiin lamlien an lo rawl an ta a. Hi lampui hi Silchar to Haflong infe pawna lam umsun chu a ni hlak a, chubakah Hmar khuo hieng - Doiheng, Arda, Khawhmunlien le Vapuol hai ta dinga lampui tangkai tak a ni a, Sawrkarin a uksak naw leiin khawsung in enkawlna sin thaw zawm thei an ta naw leiin hieng khuo hai hi rausan in a um zo ta a. Hmar hai ta dinga Hringna lampui (lifeline) pawimaw tak ani leiin N.C.Hills Autonomous Council CEM kuta hi lampui siemthatna dingin HPU in Memorandum a submit a. MAC hai le a bikin Pu Ngamrothang Hmar, Chairman NC Hills A/C in hma a lakpui na zarin CEM, N.C.Hills A/C khawmin nasatakin hma a lakpui a. Tuhin JCB pathum hmangin sinthawin a um zing a. Pu Ngamrothang lem chu dt.11-10-2013 khan Arda khawkhel chen ava en thlithlai. Tuhin CEM chun January thla sung ngeia Silchar infepaw thei dingin riruong a siem a nih. Hieng anga Hmarhai ram delna development um mek hi a mipui hai khawmin a lo dawngsawng dan thiem ei tiu. **17th Oct/13 khan 16th Special Conference HSA NCHills & Karbi Anglong Jt. HQrs chu nei a ni a sun huna hin election nei a ni a, chutaka thlangtlinga um hai chu : 1. Pu H.Sangkhum Riengsete – President 2. Pu Lalhmarthang Tuolor – Vice President 3. Tv Dewitz Lalthanglien Thiek – General Secretary 4. Tv Lalrothang Thiek - Assistant General Secretary 5. Tv John Mark Pena - Finance Secretary 6. Nk Thapuichawng Khawral - Treasurer 7. Nk Shilo Parate - Secretary Education 8. Tv Lalrohnun Pena - Secretary Social & Cultural 9. Tv Simeon Lalthlamuong Thiek- Secretary Public Relations 10. Pu Lalrawngbawl Hmar - Secretary Information & Publicity 11. Tv Lalthuoisang Thiek - Secretary Games & Sports. Chun zan huna Pu Siekkhohen Tamhrang a lekhabu ziek ‘Hmar Tlang Lungdi’ chu Upa (Dr.) V.L. Tluong Bapui, President, Hmar Literature Society Assam chun tlangzarna a nei. Chun Meritorious award sem ani baka malzai mawi tak tak ngai thlakna le Choreography mawi takel inentirna nei a ni bawk. ** Tarik 18th October/13 khan Mahur Sporting Club huoihawtna hnuoiah R. Langthasa Memorial Playground ah 2nd Challenger Cup 2013 Football Tournament chu tan a lo ni tah. ** Tarik 13 October/13 khan Pi Ngurrozam Tuolor, Muolhoi chun natna um talo chatuon ram ami lo inlawisan tah. Ama hi nuhmei pawl le kohran ah mani mawphurna sukdik ngei ngei tum hlak mi a nih. Tarik 14 Oct/13 zantieng khan Pastor H.K. Bena in nikin nia thonawk dingin a lo vuiliem tah. Lusun tuoktuhai Agape Board chun a tuorpui hle. ** Tarik 18th-19th October / 2013 khan Saikawt Churachandpur ah 11th HYA General Conference-cu,m-Cultural Festival, 2013 nei a ni a, NC Hills Jt. Hqrs a inthawk khawmin President Pu Laihlitho Thiek a hang thang ve thu lo dawng a nih. ** Tuta kar Ningani khan Haflong Civil Hospital ah Nirmal Langthasa, EM. i/c Health in Blood Donation Camp hawngna a nei. Ama hi Pu Ngamrothang, Chairman, NCHAC in a thlawp. Hi Blood Donation camp hi Territorial Army Day le inzawma Assam Rifles Haflong Sector Hqrs. huoihawtna hnuoia nei a nih. ** Muolhoi Val-upa huoihawtna hnuoia um ding, Hla kutpui, vengbuk inruolsiekna neina ding le inzawmin vengbuk tin haithang nasatakin an lak sup sup ta a, Muolkhawpui chu “Aw mi sang tamtak’ ti hla ri in a nghawr hning tan tah. Hi le inzawm hin vengbuk fai le thienghlimtak inruolsiekna um sa’ng a ta, lawmman thatawktak buotsai a nih. ** October 18&19, 2013 sung EFCI 89th Executive Council chu Shillong-ah nei a ni a, hi huna hin Dr. Rev. Ruolneikhum Pakhuongte chu acting Moderator-a hmang a nih. N. C. Hills Dist. anthawk khawmin Upa L. Khuplien, Chairman Presbytery, Rev. Vanlaltlana Thiek DS le T/Upa L. H. Buongpui, Council member-hai an zu thang thei. Chun, hi hun le inruol hin P/Pastor Interview nei a ni nghal bawk a, ei Dist. a inthawk mi 6 lai chu an zu thang ve, an hung hlawtling ngei ei beisei pui bawk.
Posted on: Mon, 21 Oct 2013 16:10:08 +0000
Trending Topics
Recently Viewed Topics
© 2015