UFO (UNIDENTIFIED FLYING OBJECT) Online hawidawt nan dihlak nan zarh dongh a ṭha cio ko lai tiah zumhnak ka ngei. Nan cungah Daihnak um ko seh! Tuzarh caah theihtlei tlawmpal hun langhter ka duhmi cu UFO timi a si. UFO timi cu zeidah a si? UFO timi cu Unidentified Flying Object tinak a si. Hi kong hi Scientist tampi nih kherhhlainak an tuah lengmang nain, fiangte in a langhter kho bal lo. Ka hmu a timi zong mitlawmte lawng an rak si. Asinain kan mitthlam ah kan cuanter tawnmi cu Video le Novels cauk chungah an langhtermi UFO pawl kha an hung cuang tawn ve. Thinghnah aihninh ahcun thli a hran caah a si. Thli a hrang timi cu Thli kik le thli lum umkalnak ruangah a si. Kan mit in cun kan hmu lo. Cubantuk in UFO kong timi chimrel a si. Cucaah chimrel awktlak in thil a cantertu a um caah a si ti cu a fiang. Cucu Universe chungah a ummi cucu a si tiin fainter khawh lomi tinak caah UFO tiah min an bunhnak zong cu a si. 1952 kum American Vanlawng ralkapbu nih UFO tiah an bunhmi min a si. A hramthokbik an hlathlai lio ahcun UFO cu zeitin langhter ding zong an rak ruat kho lo. 1947 kum June thla ah Sipuazi lei mifim pakhat zong a si mi, Vanlawng mawngtu zong a simi Kenneth Arnold nih Flying Saucer (or) Flying disc tiin an langter. 1947 kum June thla 24 ah Kenneth Arnold cu a Vanlawng in Washington ah a ummi Mount Rainier tlang cung a zuan lio ah, a tleutukmi thil zuang pakua nih tlang cungah an zuan ve nak kong a chim. Arnold nih a chimnak ahcun a phengmi Pakan he an i khat tiah a langhter. Nichuah lei in an langh ka ahcun Thlapa kawmcheu he an i lo. Cun a von zuang in Compei ti he an i lo ii, an tlau lai ahcun a bomi bantuk an um ṭhan tiah a chim. Hi kong he pehtlai in American mifim tampi nih hlathlainak an thok colh. Cun ramdang zong in mifim tampi zong nih hlathlainak an hun zulh ve. Cuticun UFO kong he pehtlai in ruahnak tampi an chuahpi cio. July thla (4) ah Uniter Airlines rianṭuan pakhat nih a tleutukmi thilri pakua hna cu American ram Idaho cungah an zuan lio a hmuh ṭhan. A hmuhning hi Arnold nih a langter khawhnak in fiangdeuh in a langter khawh deuh. American Researcher pakhat a simi Ted Bloecher nih a capar ah Arnolh nih a hmuhmi thil kongah minung tampi nih theihduhnak an ngeihnak kong a langhter. A hnu ahcun Thawngzamh kip ah UFO nih cahmai a hun lak. July thla ah New Maxico ram Rosewell ram cu UFO nih an pah dengnak kong fiangte in an langhter tikah minung tampi an khua ruah a har chinchin. Cun 1960 kum ah Bloecher cu Canada ram, Washington DC le American ram States tampi ah UFO 853 hrawng an zuannak kong a langter khawh ṭhan. Cuticun UFO kong kherhhlainak cu an ṭhawng chinchin. Asinain cheukhat an hmuhmi hna cu Space chungah Arfi a kang ii a tla mi hna a si lai tiah zumhnak an ngei. Maury Island Incident 1947 July 7 ah a si. American ram chung a ummi Maury Island ah a ummi Harold A.Dahl le a fapa, an Uico hna cu Tilawng in khual an tlawn lio ah, UFO (5), (6) hna an zuan lio an hmuhnak kong an langhter. Dehl nih cun UFO ah ongkua pa (4) a ngei. Cu a kua cu vancung a dummi zong a lang ṭhiamṭhiam tiah a chim. A cheu UFO cu an dir ii, ongkua an ngeimi cu Metal hang hna an chuahter ii Tilawng zong a rawk tiah a chim. Cu ka ahcun a fapa cu ai hliam ii an uico te cu a thi tiah Dehl nih cun a chim rih. Asinain a hnu ah a ṭawn chommi a sinak kong a chim ṭhan. Cuticun an duhning poah in a rak chimmi zong an um cio hoi. UFO Evidence Asinain UFO kong hi a hlanchan liopi in an hmuhnak hna tampi hmuh khawh a si. BC 329 lio ah Alexander the Great rallam a kal lio ah theih lomi Thilri pahnih ruah lo pi in an chuah ii an tleunak nih an raltuknak Rang le Vui hna a cerh hna ruangah hmai ah kal kho lo in a tuah hna tiah kan hmuh. 1676 kum March thla ah Englang ram Astrologist pakhat a simi Edmun Halley cu kherhhlainak a tuah lio ah a hmuh mi a si. Ruahlo pi mui lakpi ah Thlapa ngaw hrawng a simi a tleumi thil pakhat a hmuh. Cu thilri kal thawng cu Lung hniar tete lak ah lamkal bantuk in a thawng a thang. Cun 9600 miles per hour rate in a zuang tiah kan hmuh khawh. 1492 kum October 11 ah Christopher Columbus cu Atlantic Ocean ah UFO tiah ruahmi thil khuaruahhar pakhat a hmuh ve. Vancung thli lak ah a zuang. A caan a tlau. A caan ah langṭhan tiin a um lengmang tiah a chim. BC chan, 1400, 1600 kum lio ah Van cung a zuangmi Vanlawng ser an si rih lo. 1949 kum August 20 lio zongah Las Cruces, New Maxico, United States zong Pluto Planet a hmutu Clyde Tombaugh zong nih a Hring Eng pahmi UFO pakhat cu a hmuh. 1969 kum January thla Ni 6 ah American President Jimmy Carter zong nih UFO thil khuaruah har pakhat a hmuh ṭhan. Thlapa ngaw a simi a tleumi thil khuaruah har pakhat Minute 10 chung hrawng ka hmuh manh tiah a chim. AREA 51 Area 51 hi Vawlei leng thil a ummi kong thil tampi kherhhlainak thiltampi an langhternak hmun pakhat a si. American cozah nih a thlite in Vanlawng thar hna, Missiles hna le hriamnam thar hna mipi sinah langhter hlan ah an rak test nak hmun a si. Min cheu hna cu Dreamland, Paradise Ranch, Home base, Water Town strip, Groom Lake hna le a hnu ahcun Homey Airport tiah mi tampi nih an theihmi hmun a si. Rianṭuantu dah ti lo in a dang mizei hman luh khawh lonak Hmunking pakhat a si. American ram nitlaklei Nevada State ih thlanglei ah a um mi a si. Lag Vegas in 83 Miles a hlatnak hmun Groom Lake khua a ummi a si. 1950 kum thok in American ram U-2 Spy vanlawng hna le Ralkap vanlawng hna, hriamnam meithal hna an hmanhlan ah an rak testnak hmun a si. Nuclear Experiment voi 928 an test mi chungah voi 739 cu Area 51 pawngah a ummi Nevada Test Site(NTS) ah an tuah tiah theih a si. A hnu deuh ahcun Area 51 cu Space chung a ummi thilri hna kherhhlainak tuahnak le thilkhuaruahhar hna le UFO hna zohnak ah an hman. 1970kum le 1980 kum karlak ah JP7 bantuk a simi Jet vanlawng hna cu vawlei khor an cawh ii an rak ser. Asinain ṭih a nun tuk caah an Computer hlun deuh hna cu an kang dih tawn ti a si. Hellen Frost timi nu ih a vapa Robert zong cu sernak le kherhhlainak ahcun Meikhu in a thi tiah 1996 kum tazacuainak an ngei. Cucu Biacaihtu nih a fiangmi thil a si lo. Cun hi hmun cu pawngkam rawhralhnak he a luatnak hmun a si tiah a cohlang lo. Asinain mi nih theih lo mi Chemicals chiatnak tampi a chuah pi hrimhrim ti cu an zumh. Area 51 ah a bikmi an tuahmi hna cu, (1) Vawlei leng i a ummi thilnung hna information pawl fimnak a si. New Maxico ram Roswell a cangmi UFO kong siseh, an hmuhnak kong an chimmi vialte fimtawlnak an tuah ii, cun thilthar hna, tuahsernak , chuahpinak ah a hman. (2) Ram dang in a rakrami hriamnam hna kherhhlainak (3) Khua caan (Climate) kong hlatnak ah thilthar kawlnak (4) Teleportation hna bantuk Technology hna ṭhanchonak caah rianṭuannak hna a si. Ahrap lawng hi midang nih theih khawhmi a si i zeitin an tuahtimi cu rianṭuantu dah ti lo cun mizeihmanh nih theih lo dingin an rak tuah. Area 51 cu a thlithup tuknak a si tikah mi tampi nih Capo saihnak zongah an hman tawn. “ Kei hi Area 51 ah rian ka ṭuan da kaw” tiah capo in an chim tawn tiah theih a si. UFO Video Kong UFO kong he ai pehtlaimi Video kan zoh ahcun 1996 kum ah an rak piahmi “Independence Day” timi a si. Will Smith nih a biapi bik zukcawl in ai thlakmi a si. Vawlei cung Movies chungah vawlei cungvialte pehtlaihnak Network cu ruahlo pi in khuaruahhar mi Thli nih a rak naih. Cun Vawlei pawngah a ummi thilri hna zong nih kan Vawlei pi an rak naih. Thate in an dothlat tikah Vawlei leng a ummi thilnung hna vawlei pi hi lak ding an i timhtuah timi an theih kong a si. Hi Movies cu Oscar laksawng zong a ngah ii, a dang laksawng 26 zong hmu mi Science lei Movies Film pakhat a si. Cun pakhat cu Resident Evil ah zukcawl a simi Milla Jovovich nih ai thlakmi “ Fourth Kind” timi Movie a si. 2009 kum ah an chuahmi a si. Movie kong ka zoh ahcun 1972 kum lio ah UFO an rak hmuh. Cucu The First Kind tiah an ti. Cu ticun UFO a um taktak ko tiah an langhternak cu The Second Kind tiah an langhter. Cun UFO timi cu thilnung dang he an i pehtlai timi kong cu The Third Kind tiah an langhter. The Fourth Kind cu UFO chungah a ummi thilnung hna nih Vawlei ah an tlonglen ve tinak kong kha a si. Alaska ramṭhen ah kum tin minung an tlau leng ti a si. Cucu FBI zong nih a hlat kho lo. An tlauning hi a rangmi Bupa (OWL) an hmuh hnu ah an tlau lengmang ti a si. Cucu Psychologist Emily Tyler nih a damlo mi a mizaw hna sinah a hmuhnak kong a si. A hnubik pakhat cu 1982 kum ah a lar ngaimi ET The Extra Terrestrial a si. Hi Movie hi cu Vawlei leng in thilnung ngakchia pa te E.T cu Vawlei ah a phan ii, Vawlei lengah kal kho ṭhan dingin an bawmhnak Movies a si. UFO kong hi mitampi an chim lengmang ko nain nihin tiangah fiangte in a langhter kho tu an um rih. Theory zong in an langhter kho rih lo. Ruahnak sawhsawh in a tang rihmi a si. Micheu nih an ruahnak in, “ Jesuh Khrih a chuah lio ah ni chuahlei mifim pathum hna lamhruaitu Arfi kan timi zong kha UFO a si” tiah an ti. Cun Bawi Jesuh a thih lio ah ruah lo pi in Chunmui a tlungmi zong kha UFO a zuangmi nih an rak kulh tiah an chim. Tuzarh caah….UFO kong hi vial in sirih seh… Happy Weekend! Bawipa nih in Umpi ko Hna Seh! LCF-Youth Singapore Page Admin
Posted on: Sat, 16 Nov 2013 10:02:54 +0000
Trending Topics
Recently Viewed Topics
© 2015