Wento btshrabo el shay read this post its worth reading :) #alex #brides اسمي مريم وعندي (أيوة ناوية اقول سّني علنا) عندي 33 سنة. باكتب النهاردة عشان اعترف للشعب المصري، رجالة وستات، شباب وبنات، انّي تقريبا مش وش جواز.أيوة، أنا مش وش جواز. اللي يعرفني كويس هايعرف ان الكلام دة مش بكيفي، أنا طول عمري بادوّر ع الحب ومتنيّلة فيه بستّين نيلة، بس آن أوان الاستنتاج المنطقي بقى. أنا مش وش جواز رغم انّي زمان كنت ماشية مع التيّار وباعمل زي ماللي حواليّا بيعملوا وبادوّر على أي جواز وخلاص حتى لو كان صالونات، وييجي واحد يقول عليّ “دي بتحط ماكياج.” مش وش جواز عشان مع مرور السنين والانتظار لقيت ان في حاجات تانية كتير ممكن تتعمل شبه استحالة تحصل لو اتجوزت في البلد دي. مش وش جواز عشان عندي كرامة مش ناوية اتنازل عنها، ولا ناوية حد من غير أي مناسبة يعمل نفسه الريس عشان تكوينه البيولوجي مختلف عنّي. مش وش جواز عشان بطلت اقتنع اني ناقصة عقل وان الباشا هو اللي هايبقى كامل الأوصاف. مش وش جواز عشان مش ناوية استحمل النفاق والازدواجية. وصراحة النفاق والازدواجية دول موقّفين حالي…وحال ناس كتير… البنت اللي يا عيني بتبقى ماشية جنب الحيط وتشيلها من هنا تحطها هنا بنت مملة وسلبية ومالهاش شخصية وتحرّض الراجل انه يبص برّة،والبنت اللي ليها شخصية وقوّية وتعرف تبقى انسانة مستقلة وليها رأي ورؤية للحياة، المصري مايقدرش عليها ومش هايعرف يعمل عليها الحركتين بتوعه ويترسم انه راجل. مش وش جواز عشان شغل النصب والاحتيال بقيت اكشفه أول ما واحد بيفتح بقه بالكلام. مش وش جواز عشان للأسف البرمجة بتاعتي اتفكّت وبقيت مش شايفة انّي عايزة ابقى أم، ومكتفية اني اتجوز بس عشان يبقى معايا شريك حياة. مش وش جواز عشان نادر قوي اللي يعرف يعني ايه منصب شريك حياة. مش وش جواز عشان مش غاوية ولا ناوية اني اقضيها طبيخ، انا عندي حاجات أكتر وأهم بكتير عن اني اقضيها في المطبخ.أنا مش وش جواز عشان عايزة انسان طبيعي، يبقى في بيني وبينه حاجات مشتركة، حد يبقى بجد عرف يتخلص من افكار رجعية وعرف هو مين وعايز ايه، وعرف اني انسانة زيي زيه ماينفعش يطلب مني حاجة هو ما يقدرش عليها. أنا مش وش جواز عشان قرفت من القرف. أنا مش وش جواز عشان اللي يعرفني كويس بيقول لي اني ما ينفعنيش غير خواجة، وانا مدمنة للبلد دي مش عايزة اسافر اصطاد عريس، ومش عايزة غير واحد مصري ابن تيت يعرف يهزّر معايا بلغتي وتبقى ليه نفس روحي… عايزة راجل ما يضايقوش نجاحي وطموحي. ولا تبقى عينيا ف وسط راسي عشان عارفة ان عين اللي خلفته زايغة. ولا عايزة اتجوّز واحد ممل ابقى عايزة اتطّلّق منّه بعد الجواز بعشر أيام. مش عايزة واحد حبّة يعمل فيها شيخ وفجأة يبقى فاجر. عايزة واحد يبقى بجد متفتّح ومايجيش فجأة يحسسني ان سي السيد لبسه. مش عايزة واحد مايستحملش قد ايه انا شخصية مركبّة بس بسيطة ف نفس الوقت... مش عايزة واحد بارد، مش هاستحمل واحد بارد... أنا ممكن اقعد اكتب للصبح، بس بجد بجد، واضح اني مش وش جواز
Posted on: Fri, 13 Sep 2013 07:40:26 +0000
Trending Topics
Recently Viewed Topics
© 2015