Yanˍgonˍ Laˇhuˍ yaˇnehˬ awˬ chawˇ muiˬ ve awˬ moˍ (Yangon Lahu Youth Fellowship) awˬ lawn (2) Man mvuhˇ miˬ iˉ kaˆ tuˍ ve Hkriꞈyaˇ awˬ moˍ lonˉ 200 hkawꞈ biˇ ve bon paw-ehˇ htaꞈ 2013 hkawꞈ December awˉ lawˉ teˇ shinˉ htaˇ te kai tuˬ yoˬ. Bon paw-ehˇ lonˉ oˇ ve maˇ te sheˍ htaˇ, Laˇhuˍ yaˇ nehˬ teˇ hpaˍ teˇ geh mawˬ daꞈ ga tuˬ awˬ hkaˇ gu chehˇ ve tehꞈ ga shiˍ ve yoˬ. Hke te leh, awˬ moˍ tanˬ cawˬ la ve awˬ lawn ngeh chaw-eh kawꞈ hto maˍ laˇ gaˇ ve yoˬ. Awˬ moˍ teˇ moˍ cawˬ la ve lehˬ, teˇ geh kanˉ te kai ga tuˬ awˬ pon cawˬ la ve deˇ deˇ yoˬ. Laˇhuˍ yaˇnehˬ awˬ moˍ cawˬ la ve htawˇ, oˇve hka shuˍ yoˬ. Yanˍgonˍ venˇ lonˉ lehˬ uiˍ jaˇ. Kehˬ kaꞈ kehˬ jaˇ. Man mvuhˇ miˬ hkaˬ hpawˇ chi hpawˇ lo chehˇ ve Laˇhuˍ yaˇ nehˬ teˇ hpaˍ htawˇ, Yanˍgonˍ venˇ lonˉ awˬ hkaw lo liꞈ ca chehˇ henˇ la ve cawˬ maˇ jaˇ. Shinˉ nyiˬ gaˬ la htaˇ, maˇ-awˍ ve yaˇnehˬ oˇ ve teˇ hpaˍ lehˬ, Enˇsenˍ (Insein) lo cawˬ ve Laˇhuˍ bon yehˬ lo teˇ geh hpoˆ laˬ leh, teˇ geh bon lawˬ ve yoˬ. Saˍlaꞈma lonˉ Angela Pun leh Saˍlaꞈlonˉ Caˬmvuhˇ hui awˬ hoˉ te leh, bon lawˬ ve htaꞈ sheh kai piˇ chehˇ ve yoˬ. Liꞈhpu henˇ yaˇ leh liꞈ henˇ yaˇ teˇ hpaˍ ga ga piˇ chehˇ ve yoˬ. Yaˇ nehˬ oˇ ve teˇ hpaˍ liꞈ hkawˇ ka puiˉ jaˇ. Sheh kai puiˉ jaˇ. Laˇhuˍ hkawˉyehˬ ka hka laˇ ko kaꞈ, na sha jaˇ. Yaˇnehˬ oˇ ve teˇ hpaˍ lehˬ, liꞈ henˇ peuˬ hkawꞈ nawˉ, a shu yawˇ chehˇ taˍ kuiˬ lo kawꞈ koꞈ-e leh, kanˉ te ve yoˬ. Maˇ-awˍ ve lehˬ, chaw ceuˬ htaꞈ sheh kai ve awˬ hoˉ deˇ deˇ hpehꞈ la ve yoˬ. Laˇhuˍ yaˇnehˬ awˬ moˍ tanˬ cawˬ la ve awˬ hkuiˉ puiˍ awˬ lawn lonˉ lehˬ, loˍ ve chaw htaꞈ ga piˇ tuˬ awˬ pon hpehꞈ ve yoˬ. Naˬ la gawˬ la ve yaˇnehˬ teˇ gaˇ htaꞈ ga ga nyi haꞈ shaˉ piˇ tuˬ dawˇ law ve yoˬ. Venˇ lonˉ awˬ hkaw lo chehˇ leh liꞈ henˇ chehˇ ve pa taw, teˇ pawˆ pawˆ haˍ kuiˬ ga hpuˇ puiˉ ve yoˬ. Shu nyiˉ te baˆ te piˇ ve htaꞈ ga hkanˍ ve Laˇhuˍ yaˇnehˬ cawˬ maˇ la ve yoˬ. Naˬ la gawˬ la htaˇ, nyi haꞈ shaˉ piˇ ve chaw maˇ cawˬ. Awˬ gaˇ piˇ paˍ maˇ cawˬ hpehꞈ la ve yoˬ. Chaw ceuˬ laiˉ ceuˬ hpoˆ chehˇ taˍ ve pa taw, chaw ceuˬ teˇ ceuˬ leh teˇ ceuˬ awˬ kaˍ lo na maˇ ga daꞈ ve awˬ ceuˬ kaꞈ ga hpuˇ ga mawˬ la ve yoˬ. Haˍ kuiˬ laiˉ ceuˬ ga hpuˇ ve yoˬ. Chaw ceuˬ i ve pa taw, nyi ma dawˇ i gaˇ i ve awˬ ceuˬ kaꞈ cawˬ la ve yoˬ. Awˬ pa awˬ e awˬ viˉ awˬ nyi hui geh teˇ geh maˇ ga chehˇ ve pa taw, nyi ma dawˇ i jaˇ ve kaꞈ cawˬ ve yoˬ. Teˇ hpaˍ hpaˍ, haˍ ve awˬ ceuˬ chi ve teˇ hpaˍ htaꞈ hkanˍ maˇ gaˇ ve pa taw, a shu yawˇve yehˬ hkaw lo kawꞈ hpaw koꞈ-e ve kaꞈ cawˬ maˇ ve yoˬ. Tuꞈ ve haˍ ve awˬ ceuˬ oˇ ve teˇ hpaˍ htaꞈ ga hpuˇ ga mawˬ jaw taˉ peuˬ ve yaˇnehˬ awˬ hoˉ teˇ hpaˍ lehˬ, awˬ chawˇ chawˇ kawꞈ ga daꞈ tuˬ ve awˬ hkaˇ ca la ve yoˬ. Hke te leh, Yanˍgonˍ Laˇhuˍ yaˇnehˬ awˬ moˍ cawˬ la ve teˇ ceuˬ yoˬ. Awˬ moˍ awˬ tsuhꞈ teˇ ceuˬ ceuˬ cawˬ la cawˇ-aw tehꞈ yaˇnehˬ awˬ hoˉ teˇ hpaˍ dawˇ shiˍ la peuˬ hkawꞈ nawˉ, Saˍlaꞈ Maung Maung Tun (Aaron Tun), Saˍlaꞈ Paˍnehˉ (Paneh Walter) leh Saˍlaꞈma Na Faˆ (Augusta Nafa) hui awˉ lawˉ teˇ pawˆ mawˬ daꞈ leh, naꞈ uˉ te daꞈ ve yoˬ. Jehˬ daꞈ cehˇ daꞈ ve yoˬ. Awˬ kaˍ awˬ nu ve yaˇnehˬ awˬ hoˉ teˇ hpaˍ hpehꞈ ve Saˍlaꞈ ma Meˍsiˍ Taˉ, Saˍlaꞈma Aye Aye Win, Saˍlaꞈma Hla Khin, Saˍlaꞈma Ehˉmeˍ (awˬ meh hka peu-eˬ maˇ dawˇ nawˇ-o) hui htaꞈ htawˇ laiˉ pawˆ mawˬ daꞈ leh, awˬ moˍ te ga tuˬ jehˬ daꞈ ve yoˬ. Awˬ moˍ awˬ tsuhꞈ ve awˬ liˇ awˬ hkaˇ (Constitution) cawˬ la tuˬ, Saˍlaꞈ Maung Maung Tun awˬ hkaˇ gu peuˬ hkawꞈ nawˉ, yaˇnehˬ awˬ moˍ lonˉ htaꞈ tanˬ maˍ leh, awˬ moˍ awˬ tsuhꞈ cawˬ la piˇ ve yoˬ. Teˇ hkawꞈ teˇ pawˆ, yaˇnehˬ awˬ hoˉ awˬ suhˉ kawꞈ leuˆ taˆ leh, kanˉ te laˬ chehˇ ve 10 hkawꞈ gaˬ la peuˬ. (Awˬ moˍ awˬ hkaw lo Kawˍmiˍtiˍ awˬ moˍ kawꞈ pehˬ taˍ leh, kanˉ te kai chehˇ ve yoˬ. Awˬ hkawꞈ nawˉ awˬ yanˇ ga la htaˇ, Kawˍmiˍtiˍ ehˉ teˇ hpaˍ ve kanˉ htaꞈ kawꞈ hto maˍ laˇ tuˬ yoˬ). Awˬ moˍ awˬ tsuhꞈ te ga peuˬ leh, Kawˍmiˍtiˍ ehˉ teˇ hpaˍ cawˬ la peuˬ hkawꞈ nawˉ, Laˇhuˍ yaˇnehˬ awˬ moˍ chi ve lehˬ, loˍ chehˆ cuˆ chehˇ ve teˇ gaˇ htaꞈ ga ga piˇ ve yoˬ. Shu heˍ yuˬ beˬ yuˬ leh nyiˉ te baˆ te piˇ ve htaꞈ ga hkanˍ chehˇ ve Laˇhuˍ yaˇnehˬ teˇ hpaˍ htaꞈ htaiˍ hkawꞈ piˇ ve yoˬ. Hpehꞈ bawˬ dawˇ haˍ chehˇ leh dawˇ teuꞈ gaˇ teuꞈ hpehꞈ chehˇ ve teˇ hpaˍ htaꞈ awˬ gaˇ piˇ ve yoˬ. Shu chaw ceuˬ htaꞈ awˬ chawˇ muiˬ daꞈ ve teˇ hpaˍ te ga la ve yoˬ. Teˇ geh hpuˇ daꞈ mawˬ daꞈ leh, leˍguiˇ ve cawˬ la ve yoˬ. Liꞈ koˆ (Mvuhˇ mehˇ miˬ mehˇ) te tawˆ ga la ve yoˬ. Loˍ ve hpu tanˇ ca ga la ve yoˬ. Liꞈ hkawˇ baˉ te tawˆ ga la ve yoˬ. Aˉ poꞈ te hawˇ leh, hpu tanˇ ca ve teˇ hpaˍ te ga la ve yoˬ. Chi hke laiˉ hpawˇ lo ga piˇ ga tuˬ dawˇ law leh, awˬ moˍ chi ve htaꞈ tanˬ kawˍ taˍ ve teˇ ceuˬ yoˬ. Liꞈ henˇ chehˇ ve yaˇnehˬ teˇ hpaˍ hpehꞈ leh kanˉ maˇ tanˇ ve htawˇ, chaw ceuˬ awˬ pon kanˉ te chehˇ ve Laˇhuˍ yaˇnehˬ awˬ moˍ hpehꞈ ve yoˬ. Laˇhuˍ yaˇnehˬ awˬ moˍ chi ve kanˉ te kai chehˇ ve htaꞈ ga ga piˇ tuˬ loˍ jaˇ. Dawˇ nawˇ ve awˬ hkaw lo, bon lawˬ piˇ leh hpu tanˇ tanˇ piˇ tuˬ ve kaꞈ loˍ jaˇ peuˬ tehꞈ Laˇhuˍ yaˇ hka peu-eˬ ve htaꞈ kawꞈ shiˍ laˇ ve yoˬ. Laˇhuˍ yaˇnehˬ chi ve awˬ moˍ awˬ tsuhꞈ te la ve 10 hkawꞈ biˇ la chehˇ taˍ peuˬ. Laˇhuˍ yaˇnehˬ awˬ moˍ lonˉ hpuˇ daꞈ mawˬ daꞈ leh, Guiˬsha ve awˬ bon htaꞈ chiˇ mvuh tuˬ ve awˬ yanˇ htawˇ, teˇnyi aꞈ kehˉ teˇ nyi neˇ la peuˬ. Ngaˬ hui ve Yaˇnehˬ awˬ moˍ chi ve loˍ chehˇ ve hpu tanˇ shinˉ tanˇ teˇ hpaˍ htaꞈ htawˇ, ga ga daꞈ laˇ tuˬ ve htaꞈ yaˇnehˬ awˬ moˍ chi ve awˬ tan, teˇ pawˆ kawꞈ nawˍ laˇ ve yoˬ. (Awˬ chawˇhui htawˇ, hpu tanˇ ga ga ca laˇ sheˍ tehꞈ lawˬ laˇ ve yoˬ mehˍ). Hkriꞈ ve kanˉ hkaw lo, Hka peu-eˬ htaꞈ haꞈ ve, Saˍlaꞈ Maung Maung Tun
Posted on: Fri, 18 Oct 2013 03:35:22 +0000
Recently Viewed Topics
© 2015