episod 189 | Randau Jedon Enggau Nanta (corrected copy) Udah seduai ulih duduk berimbai, Jedon minta ampun Nanta kategal jaku jai indai iya ngagai Nanta. “Enda ibuh disebut meh nya sulu. Utai udah lakka udah,” saut Nanta. “Nya meh indaiku ka datai ke ulu tu, ngemetul utai ke udah,” ko Jedon. “Manah amat meh nya enti seduai apai ka datai. Ukai datai tegal jaku ke udah telanjur disebut tang datai enggau senang ati. Ngerapatka kaul antara kitai,” saut Nanta. “Enda aku tentu kiruhka hal nya sulu. Dalam sayauka anak, macham meh utai disebut. Sigi baka ia. Ke penting ba aku ianya nuan. Nuan agi ka. Nuan enda mudah melengka.” “Aku enda bejaku enggau indai aku sampai iya pulai,” ko Jedon. “Badu baka nya nuan sulu. Mali enggai ngelayan apai indai,” ko Nanta ngajar Jedon. “Jai manah, apai indai meh sida.” “Nuan tu syg.. enda nemu pedis ati ke?” ko Jedon. “Pedis ati pan nadai reti. Mina ngemediska runding diri. Tua udah besai tuai, tua meh ngaga pemutus ka diri. Sida apai indai enda tau dibuai. Ujung-ujung ngampun sida meh tua. Manah agi terus ngampun sida tekala nya awakka pikir tua enda merinsa,” ko Nanta nyaut Jedon. Tuai pikir iya. “Ya, aku nemu nuan matang pikiran. Enda ngalahka diri tegal jaku orang,” ko Jedon, tuchum merening mua Nanta. “Runding nuan bequaliti. Bernas,” tambah Jedon; enda nemu mansutka nya dalam jaku Iban tulen. “Anang muji aku sulu. Enggaika tinggi idung aku legi,” ko Nanta tuchum ngagai Jedon. Betundi seduai. Begagaka pangan diri. “Aku malu,” ko Nanta. “Maluka nama nya sulu?” tanya Jedon. “Maluka diri enda nemu ngena jaku Iban tulen, taja aku dilabel Iban menua ulu,” ko Nanta, nyangkut mimit ka jaku indai Jedon ngagai iya. “Nadai aku ninga nuan bejaku Iban enda betul deh sulu,” saut Jedon. “Enda kena, pia. ‘Betul’ nya lekajaku Melayu,” ko Nanta nundi iya. “Tapi jaku Iban moden endang udah berchampur. Iban bukai pan ulih meretika nya,” ko Jedon, mantah iya. “I know,” tambah Nanta. “Vocabuary Iban mesti dikerembaika kitai enggau nginjau jaku orang bansa bukai ti udah selalu dikena kitai ngelamatu. Tang kitai patut naka ulih ngena jaku tulen Iban, semadi nadai, baru tau nginjau.” Nyau munyi “professor linguistics” iya ke nimbal Jedon. “Kati dalam jaku Iban “ I love you,” tanya Nanta. “Ehsih.. nya pan nuan enda nemu,” timbal Jedon. “Aku sayauka nuan.” “Salah,” timbal Nanta, “Aku ka ka nuan.” Dipandam Jedon bau Nanta. Ketawa seduai. Rakah-rakah. “Ya, nuan amat sayauka aku,” tanya Nanta, nundi Jedon. “Amat sayau,”ko Jedon nyaut iya. “Enti amat, nah..sium mulut aku.” Ketawa lekik-lekik Nanta nundi sulu ati iya Jedon. Ketawa sida Alex, Sawai enggau indai Nanta ka seduai ke enda ngetu betundi dia. Tang dalam gaga ka Jedon, udah dia, Nanta agi berasai beperang dalam jiwa, ngemenangka diri ngelaban jaku jai, jaku ransi, ke beenggaika iya Iban enda menyana. Diau di ulu enda nemu utai. Kerja begaji pan nadai. Munyi ko tulis iya dalam Notebook: “enti rinduka nuan nya baka perang enggau segenap ke bisi enggau segenap senyata ke enda menyana ku ka jamah penapat inat.. tuju aku satu ngemenangka diri dalam perang besai nya.” ~ >> (besambung)
Posted on: Sat, 26 Oct 2013 05:10:30 +0000
Trending Topics
Recently Viewed Topics
© 2015