touch with nature - TOUCH WITH GOD! Zing ni a rawn chhuak iar iar a, tlang panga ni rawn nem bet tang tang tu Thlanrawkpa a awm loh avangin a rawn chhuak phut lova, muang fan reih rawihin a duawmna a rawn pho lang a ni. Zing ni chhuak chuan ka bul vela hnim hnahte, zing daifimin a tih huh hnep te chu a chhun tle set set a. Ka bul vela tlangte chu mak tham khawpa mawiin zing nichhuak chuan a chhun tle set sut mai. Engkim thuneitu leh siamtu a awm - PATHIAN! Chu tlang chhipa ka thut reng lai chuan ruah a rawn tla sep sep a, chhimbal mawi zet mai hi a rawn zam kalh mai a, hnimhnahte chu an che det det a, tiauchhum rawn zing chiai chiaite chuan a rawn bawh chek mai bawk a. Heng leilung mawina zawng zawng hi amaha lo indinchawp theih a nih loh avangin siamtu chu a awm ngei ngei ang - kan rin PATHIAN! Ni a lo tlangsang a, ka pindan tukverh atang chuan ka thlir reng a. Nipui lai a ni a, ni a rawn sensa a, hnim pawh to lohna zawn chuan ka mit a la riau mai a. Ka thlir reng a. Tiau vaivutte chu a vir liai liai a, a bul vela lehkha them leh thil zang deuh te chu a len khu leh chem chem thin. Virthlileng chu a rawn thaw deuh hak a, ka tukverh khawngkhar a rawn chhem hawng thuai a, tukverh puanzarte chu a rawn chhem phe hlawp hlawp a. A rawn tlehna tial tial a, thlipui a rawn thawk a, ruahpui vanawn chuan a rawn zawm zat a. Ka thutna a rawn thehhuh vek tawh; mahse, ka thlir ngaiin ka thlir reng a, chu savate chu. Savate mawi zet mai, zing nichhuak mawi zet mai ka thlir laia mawi em ema rawn hram, savate mawi tak ngei mai khathli leh ruahsur karah damkhawchhuah tumin hmun him lam a pan a, mahse thli leh ruah a nasat em avangin thichhawng a let reng chu ka hmu a. Engkim tan hun ruat aawm a, hlim hun a awm a, lungaih hun a awm a, pian hun a awm a, thih hun a awm. Chu savate khawngaih thlak tak chu a hun a thleng ve ta a ni, a thih hun chu! Chung zawng zawng ruahman tu leh engkim chunga thuneitu leh roreltu a awm - PATHIAN! A zawi tial tial a, thlipui leh ruahpui pawh chu a bang ta.Chhum zing mup mup pawh a rawn kiang tan a, ni chuan he khawvel leilung mawi tak mai hi a rawn chhun eng leh t sut mai! Chhimbal a rawn zam kual leh raih bawk a. Lungngaihna chhum chu lo zing thin mahse beiseina kawl a lo eng leh thin! Chung zawng zawng ruahmanna siamtu chu PATHIAN THO!
Posted on: Sun, 01 Sep 2013 07:22:49 +0000
Trending Topics
Recently Viewed Topics
© 2015