أنا بأحمد ربنا اني انتخبت مرسي السنة اللي فاتت، ولو رجع بيا الزمن تاني في نفس الظروف برضه حانتخبه صديقي المورسيفوبيك (الخائف من مرسي) لو سمحت احفظ لسانك وماتشتمنيش وكمل للآخر. صديقي المورسيفيلياك (المحب لمرسي) لو سمحت ماتفرحش وتزقطط بكلامي وكمل للآخر. ببساطة لو كان شفيق نجح كانت السنة اللي فاتت اتكررت بمعظم تفاصيلها، ماأظنش كان حاجة اتغيرت من أول اقالة المشير للدستور المعكوك بصورة مختلفة لحد اخلاء سبيل مبارك وولاده. والناس كانت برضه حاتدعو للنزول 30 يونية لاسقاط شفيق، وتمرد كانوا برضه حايلموا استمارات، وكان زمان مؤيدي شفيق برضه عاملين مظاهرة انهارده عند المنصة وبيقولوا على تمرد مش دستورية ومخربة وكل الكلام ده ومش بعيد يعملوا تجرد. وفي النهاية كان الناس حاتنزل يوم 30 يونية وكان حاينزل معاهم جماعة حايقولولهم انهم عندهم الحل وفي ايديهم نهضة مصر، بالرغم انهم كانوا قاعدين مع شفيق في السر وكانوا بيحاولوا ياخدوا منه كراسي في الوزارة أو حتى رئاسة الوزارة، بس طبعا هو كان حايرفض بسبب الغباء والكبرياء. بس يا سيدي، فالجماعة دول كانوا حاينزلوا الشباب بتوعهم مع الناس بالرغم ان البوب بتاعهم حيقول اللي حاينزل حاينزل باختياره الشخصي ومافيش تكليفات بالنزول. المهم تنجح 30 يونية والناس مايلاقوش قدامهم غير الجماعة اللي دلوقتي بقوا ثوريين، تاني، وساندوا الثورة، تاني، فيقوموا ينتخبوهم...وتتكرر السنة اللي فاتت بتفاصيل مشابهة، بس حايكون التخلص من الغلطة المرة دي أصعب. يعني ببساطة نجاح مرسي كان أفضل السيناريوهات عشان الناس تتعلم بسرعة، والكلام اللي كان حياخد منهم سنتين عشان يعرفوه، عرفوه في سنة. خلاص، اللي عاوز يقول حاجة يقولها
Posted on: Fri, 21 Jun 2013 23:22:27 +0000
Trending Topics
Recently Viewed Topics
© 2015