"الأسطورة تقول: انزل." ...الواحد هيتكلم ب شيء من الحيادية: انت ك-شخص إخواني/سلفي، لو جيت نزلت يوم ٣٠ و لقيت واحد مصري زيه زيك بيهتف ضد الرئيس اللي انت بتأيده، هتقتل الشخص ده؟ هتضربه؟ هتستريح نفسيًا كدة؟ هتقول ل ربنا "انا قتلته يا رب عشان شتم سيدنا محمد مرسي"؟ طيب هو مش فيه حديث بتاع سيدنا محمد عليه الصلاة و السلام بيقول فيما معناه "لو اتنين مسلمين حاربوا بعض، ف القاتل و المقتول في النار"؟ طب مش فيه آية قرانية بتقول فيما معناه "لو طائفتين من المسلمين حاربوا بعض، يبقي نصلح بينهم، و لو مرضيوش يتصالحوا، يبقي المفروض نحارب اللي ب-تبغي علي الأخري لغاية ما ترجع لربها؟" طيب هل حضرتك يا سلفي/إخواني عملت كدة؟ هل جربت تصلح بين المسلمين اللي زيك؟ هل اتبعت سنة سيدنا محمد عليه الصلاة و السلام؟ هل اتبعت القرآن؟ ولا انت اخترعت اسلام جديد بيحركه محمد بديع و خيرت الشاطر و حسين يعقوب و وجدي غنيم؟ لو جينا نبص للطرف التاني، *اللي معارض الرئيس* هل حضرتك لو نزلت هتفت ضد الرئيس و لقيت واحد مؤيده، هتقتل الشخص ده؟ طيب انا مقتنع جدًا ان مرسي غلطان من يوم ما مسك، و ان هو أسوأ شخص حكم مصر، بس هل معني كدة ان انا اقتل كل شخص مؤيده؟ طب يا اخي هو عاجبه، انت إيه اللي مضايقك؟ هو راضي بالظلم و الخراب، يبقي هو اللي ياكل خرا.. انت ملكش دعوة تحجر علي رأيه. و مش معني كدة ان هو صح، بس هو الموضوع زي فريقين كورة، هل هتقتل اللي قدامك عشان بيشجع فريق ضدك؟ *حتي لو الفريق ده عارفين كلنا انه أقذر فريق في العالم*. من الاخر، لو افترضنا ان كل واحد مؤيد للرئيس قدامه ٥ معارضين، ف في الاخر هو مصري زيه زيك.. يعني لو قتلته هتبقي قتلت واحد من بلدك ليه نفس حقوقك و واجباتك بيحمل نفس جنسيتك. -حتي لو هو مؤيد حكم أقذر ناس في العالم- الموضوع عامل بالظبط زي الديانات؛ هل انا ك-مسلم من حقي اقتل كل من هو غير مسلم؟ أكيد لأ. ده بالعكس، ديني بيقول لي أتعامل معاهم و اشتغل معاهم، و سامح لي احيانا اني أتجوز منهم كمان. انا مثلا، رافض ل حكم الآخوان، مع العلم ان فيه ناس كتير من قرايبي و اصحابي مؤيدين للإخوان، و ناس تانية مؤيدين الثورة ب-شدة، و ناس تانية مؤيدين حكم مبارك، احيانًا كلهم آراءهم بتستفزني و احيانا ببقي مش عاوز اعرف وجهة نظر حد فيهم، بس هل معني كدة اني هنبسط عادي لما أشوف حد منهم بيتقتل و اقول "أحسن، ماهو كان مؤيد الاخوان"؟ او "أحسن ماهو كان فلول"؟ الموضوع عامل زي الدايرة.. يعني معتقدش ان فيه شخص واحد في مصر ملوش علاقة مع كل انواع الناس دي و يعرفهم كويس و بيحبهم *من الناحية الشخصية بعيدًا عن السياسة*. ف معني كدة ان احنا وصلنا مرحلة ان لازم حد هيخسر حد عزيز عليه، في سبيل حاجة مجهولة الله اعلم هتحصل ولا لأ. السؤال بقي، هل موضوع الدم بقي سهل أوي كدة؟ سهل اني اقول "اقتل كل الاخوان اللي في البلد"؟ سهل اقول "اقتل كل الملحدين و الشيعة اللي في البلد"؟ لو هو بالسهولة دي، يبقي مرحبًا بكم في قانون الغابة، و يبقي منزعلش لما نلاقي مسلمين بيتقتلوا في بورما كل سنة بسبب التطرف. و خلينا فاكرين ان دي "فتنه" و سيدنا محمد عليه الصلاة و السلام قال ان وقت الفتنة المفروض الشخص يخليه في بيته. فيه ناس كتير فاكرة انها لو نزلت و ماتت يوم ٣٠ يبقي هما كدة ماتوا شهداء... يا ريت الناس دي تقرا كدة امتا الواحد بيجوز انه يتقال عليه شهيد. احنا مش ربنا عشان نحكم و نقول الشخص ده شهيد ولا في الجنة ولا في النار، الموضوع كله عند ربنا مش عندنا. انا عن نفسي مش نازل يوم ٣٠ يونيو، عشان مبقاش شاركت في اشعال فتنة اكتر ما هي مشتعلة. اللي عاوز ينزل. و بالنسبة ل مرسي، ف أكيد ربنا هيخلصنا منه ان شاء الله و من أمثاله اللي عاوزين يولعوا في البلد، من غير نقطة دم واحدة، عشان ربنا عدل، و اللي بيحصل في مصر ده ظلم. اهم حاجة يبقي عندك يقين في ربنا! و لو فكرت مع نفسك و لقيت انك مقتنع انك تنزل يوم ٣٠، انزل و ربنا يوفقك عشان انت عندك هدف عاوزه، بس لو حصل لك حاجة، متلومش غير نفسك و خليك فاكر انك هتبقي زي اي واحد مات في الثورة، علقوا صورته كام يوم و اتعمل له اغنيتين و مع السلامة. *ملحوظة: الكلام موجه ل كل شخص مسلم، مسيحي، ملحد، ثوري، فلول، إخوان، او ليبرالي.*
Posted on: Mon, 24 Jun 2013 22:30:29 +0000
Trending Topics
Recently Viewed Topics
© 2015