2013/06/30 ======== 388. Tuā-tuā tiûnn-bīn lâng siōng tshìng. Tsē-tsē jîn-má lâi huan-gîng. 大大場面人上衝，濟濟人馬來歡迎， Kín-kín kau-pó tsip-huat līng. Sió-sió kim-gia̍h bián siunn khîng. 緊緊交保執法冗，小小金額免傷窮。 (2013/6/30)(「白狼」張安樂100萬元交保限制出境) (news.chinatimes/realtime/110110/112013062900625.html) 389. Tóng-tsìng tsîng-āu lâi piàn-uānn. Tsóng-kóng tsi̍t-kū uī tsò-kuann. 黨證前後來變換，總講一句為做官， Bô-siūnn tsìng-lâng tsim-tsiok khuànn. Lóng uī ka-tī tia̍k sǹg-puânn. 無想眾人斟酌看，攏為家己擉算盤。 (2013/6/30)(新聞：楊秋興：入國民黨不是為選市長) (news.rti.org.tw/index_newsContent.aspx?nid=433626) 390. Íng-sî thau hip hāi lâng sí. Mā hőng thau hip phah-kuann-si. 往時偷翕害人死，嘛hőng偷翕拍官司， Kuann-si hui-bûn pué bē-lī. Pn̄g-kuann khò-sè kàu tsit-sî. 官司緋聞掰袂離，傍官靠勢到這時。 (2013/6/30)(講「璩美鳳」) (https://facebook/photo.php?fbid=486493041430561&set=a.244645492281985.60663.100002096091290&type=1&theater) 391. Hun-in sing-ua̍h nā beh hó. Tē-it bē-tàng siunn lo-so. 婚姻生活若欲好，第一袂當傷囉嗦， Tshù-lāi kang-khuè ke-kiám tsò. Ji̍t-tsí hó-kuè bián tshau-lô. 厝內工課加減做，日子好過免操勞。 (2013/6/30)(回朱榮文「幸福的婚姻生活」笑話) 392. Lia̍h-lâng tshin-tshiūnn leh tsò hì. Tsit-tsióng tiûnn-bīn sè-kài kî. 掠人親像咧做戲，這種場面世界奇， Ta̍k-hāng tíng-tsin ē khì-sí. Si̍t-tsîng jû-hô tsin huâi-gî. 逐項頂真會氣死，實情如何真懷疑。 (2013/6/30)(新聞：黑道治國嗎 千警跑龍套 幫白狼作秀) (appledaily.tw/appledaily/article/headline/20130630/35117052/黑道治國嗎千警跑龍套幫白狼作秀)
Posted on: Fri, 31 Oct 2014 14:31:28 +0000
Trending Topics
Recently Viewed Topics
© 2015