2014/03/17 ======== 2366. Iân tshim iân tshián sī thian-bīng. Nā siūnn-bē-khui sim-kuann gîng. 緣深緣淺是天命，若想袂開心肝凝， Khuànn lâng iu-tshiû thiam put-hīng. Tsuánn-iūnn jím-sim lâi tshiau-sing. 看人憂愁添不幸，怎樣忍心來超生。 (2014/3/17) 2367. Tshiū uānn sin-sann tsháu puh-ínn. Hân-tong kuè-khì sī tshun-thinn. 樹換新衫草發穎，寒冬過去是春天， Pah-hue phang-bī pun lâng phīnn. Ia̍h-á phang-á lóng-lâi tshînn. 百花芳味分人鼻，蝶仔蜂仔攏來瀳。 (2014/3/17) 2368. Hing-khám làu-làu kûn té-té. Iau-kiau iù-siù phuê-bah pe̍h. 胸坎落落裙短短，妖嬌幼秀皮肉白， Thian-sing-lē-tsit bián pháinn-sè. Sîn-sian khuànn--tio̍h mā ji̍p-bê. 天生麗質免歹勢，神仙看著嘛入迷。 (2014/3/17) 2369. Senn-sîng pì-sù uē bô tsē. Tshit-sù jia̍p-peh pháinn koh ke. 生成閉思話無濟，七四廿八歹閣加， Nā-beh tsò kua hiâm siunn té. Thiam jī ke sû pâi bē tsê. 若欲做歌嫌傷短，添字加詞排袂齊。 (2014/3/17) 2370. M̄-kuán the-jî ū ti-kak. Tshoo-tshân kā i tàn-hiat-ka̍k. 毋管胎兒有知覺，粗殘共伊擲hiat捔， Huí i hîng-thé phuà sim-pak. Khó-liân uan-hûn lo̍h tē-ga̍k. 毀伊形體破心腹，可憐冤魂落地獄。 (2014/3/17) 2371. It-hu-tong-kuan siōng tshia-iānn. Khiā tī kiô tíng uē āng-siann. 一夫當關上奢颺，徛佇橋頂話āng聲， Bô-lâng ū-tánn kah i piànn. Nā pí ióng-bíng tē-it miâ. 無人有膽佮伊拚，若比勇猛第一名。 (2014/3/17) 2372. Siann-sè hōo-lâng kiann phuà tánn. Tshian-kun-bān-má tsi̍t-lâng tann. 聲勢予人驚破膽，千軍萬馬一人擔， Tshiú gia̍h tsuâ-mâu tshì-kiâm-tsiánn. Ing-miâ hōo tsiú bú tîng-tânn. 手攑蛇矛試鹹淡，英名予酒舞重耽。 (2014/3/17) 2373. Tsi̍t-lâng hōo tsú kòo iù-kiánn. Sì-khoo-liàn-tńg tsiàn Tsô iânn. 一人護主顧幼囝，四箍輾轉戰曹營， Phuê-bah tsò tūn m̄-tsai thiànn. Tn̂g-pán-pho tsîng thàn miâ-siann. 皮肉做盾毋知疼，長坂坡前趁名聲。 (2014/3/17) 2374. Ka-lí ū-lâng khí biō pài. Tn̂g-pán ui-miâ thong-lâng tsai. 佳里有人起廟拜，長坂威名通人知， Tshiûnn-tíng khàm hiā tshāi bē tsāi. Bé-kha that--tio̍h tó kui pâi. 牆頂崁瓦tshāi袂在，馬跤窒著倒規排。 (2014/3/17) 2375. Sènn-miā tin-kuì tio̍h tsun-tiōng. M̄-thang tshoo-tshân sim-kuann hiông. 性命珍貴著尊重，毋通粗殘心肝雄， Kan-tann beh sóng m̄ su-liōng. Thinn-tē sui khuah pháinn khuan-iông. 干焦欲爽毋思量，天地雖闊歹寬容。 (2014/3/17) 2376. Tsū-tshing tuā-kok sǹg siánn-huè. Uē-sing bô-hó thâm-nuā huê. 自稱大國算啥貨，衛生無好痰瀾huê， Khui-thang phuì tshut kóng tsài-huē. Guā-kháu muá-bīn tsuân tāu-hue. 開窗呸出講再會，外口滿面全豆花。 (2014/3/17) 2377. Hok-siā bu̍t-tsu nā sia̍p-lāu. Ta̍k-ê tsún-pī ba̍k-sái lâu. 輻射物質若洩漏，逐个準備目屎流， Kàu-sî uè-suè ta̍k kháu-tsàu. Tsò-kuann ê lâng sing làu-phâu. 到時穢涗逐口灶，做官的人先落跑。 (2014/3/17)
Posted on: Wed, 26 Nov 2014 17:00:56 +0000
Trending Topics
Recently Viewed Topics
© 2015