40,000 estudyante, nakabenepisyo sa scholarship program sang SoCot KORONADAL CITY-MALAPIT na sa 40,000 ka mga "poor but deserving" nga mga estudyante sa South Cotabato ang nakabenepisyo gikan sa Kabugwason Paglaum Scholarship Program (KPSP) sang provincial government sang nagligad nga siyam ka tuig. Suno kay Alex Basco, executive director sang KPSP nga padayon ang paglapad sang program kun sa diin naka-produce na ini sang 569 ka mga professionals kag pila sa mga ini ang naga-serbe na sa provincial government. Ginpahayag sini nga 123 sa mga scholars ang nakakuha sang bachelor degrees samtang 446 naman ang nakatapos na sang non-degree ladderized courses. Ginpahayag ni Baso nga nagapain ang provincial government sang indi magnubo sa P15 milyones tagsa ka tuig para sa pagpatuman sang nasambit nga programa. Gikan sa amo nga pondo, P9 milyones ang ginapain sa tuition fees and allowance sang mga estudyante nga nagakuha sang degree courses kag P4.5 milyones naman para sa mga nagakuha sang ladderized courses. Subong nga tuig, naglab-ot sa 363 ang mga scholars sang provincial government kun sa diin 231 dire ang nagakuha sang degree courses samtang 125 naman sa non-degree ukon ladderized courses. Magluwas sa scholarship program, ginapatuman man sang provincial government ang KPSP-Grant-in-Aid scheme nga nakabulig sa 38, 720 ka mga estudyante. (Girlie Narciso-Solis)
Posted on: Mon, 05 Aug 2013 00:24:00 +0000
Recently Viewed Topics
© 2015