Aided School ojabingli 6th Pay mamirarfa mara - Okendro Imphal, Dec. 22 : Manipurli leida khalei Aided school bingwui oja bingli 6th Pay scale makhamiwui pongli aja khuikã kahai Manipur Legislative Assembly wui sessionli public interest matter sada Houseli ngasan kharum tharan Keishamthong kendrawui MLA L.Ibomchana khuikakã tuipongli Education Minister M.Okendro na ngahankã khamili Aided school wui ojabingli 6th Pay scale mikhavai ot panglak singkãda lei. Chotlala chotta ojabingna atam hunnakhava ngarai khamili taiada phongshok haira. Ana phongshok luia, Government Aided school bingwui oja bingli 6th pay scale miran kahaina. Shorkarna approve sakahai ojabingna samphang da khalei tolop chi approve makasa ojabing eina ngarum kahai wuivang ojabingwui kachangwui tolop teoda samphangda khaleina. Hiwui pongli Department hina Aided school wui ojabingwui 6th Pay scale mimi khavai finance departmentli chiho haira. Finance Department nala pheisa mishap khaleoda ngalangda mishok haora kajiwui tuipongla leihaira. Manipur shorkar wuishong einala state cabinet kazip akha February 13 li khuikã laga kathing haida khaleibing khuishok hailaga masaida khalei postbing chipuisang khavai ngaranna da phongshok haira. Arui aided school 604 lei kala hiwui oja mashingna 1749 na. Hiwui tungli post vacancy 332 leida lei. Hangda khalei vacant post bing hi chipuisang khavai wuivang Director, Education (S) na kathan committee akha semhaira. Kathak atamli masaida khalei otpam bing hi chipuisang khavai ngaran haora jihaira. Hieina ngasoda kum 2015 wui 14th Finance Commission rãhai akha leida khalei statewui non-planwui pheisa hi planwui pheisa ngasã ngasakta khavat khaleibing hi kateokhalala phãsang khavai state cabinet wui kazipli khuishok khavai ngaranra jihaira. Hitha haoda Aided School wui oja bingna chotlala chotta atam hunnakha ngarai khamili taiada Minister na phongshok haira.
Posted on: Tue, 23 Dec 2014 05:31:24 +0000