Aizawl Taekwondo Academy medal leh trophy lak lawm Mizoram Amateur Taekwondo Association hnuaia Aizawl Taekwondo Academy chuan tukin dar 7:00 khan Electric Veng YMA Hall-ah tun hnaia neih Kolasib-a 10th Mizoram Open Taekwondo Championship-a Sub Junior Runners Up leh Best Discipline team trophy bakah an player-ten medal 16 an lak lawmna hun an hmang. He hun hi Pu Lal Thanzara, MLA bakah Pu C.Lalrambuatsaiha, President MJA, Pu K.Lianzuala, Chairman, KVI Board, Pu Rualkhuma Colney, Pressident MATA, Pu VL Sawma, Sr.Vice President, MATA, Pu Joseph Thansanga, Gen.Secretary, MATA ten an hmanpui. Pu Lal Thanzara chuan Mizorama Sports Discipline zingah Mizoram Amateur Taekwondo Association chu an players leh hruaitute thlenga midang tana entawntlak leh hlawhtling tlak an ni tiin an kal zelna tura duhsakna a hlan a, 10th Mizoram Open Taekwondo Championship-a medal latute hnenah lawmpuina thilpek buatsaih chu a hlan. Mizoram Journalist Association President Pu C.Lalrambuatsaiha pawhin thu sawiin Aizawl Taekwondo Academy coach/Instructor Lalmuanawma hnenah lawmpuina a hlan a, Feb.8-9 chhunga Bhutan khawpui Thimphu-a India tana medal latu mi 7 te hnenah Mizoram Amateur Taekwondo Association chuan lawmpuina Rs.5000/- theuh a hlan bawk a ni. Aizawl Taekwondo Academy (ATA) hi kum 1989 khan Pu Vanlalsawma, tuna MATA Sr.Vice President hova din a ni a, MATA hnuaiah Black Belt leh Instructor chherchhuak hnem ber a ni a, Blackbelt 30 chuang zirchhuak tawhin State leh National level-ah medal 400 chuang an la tawh bawk.
Posted on: Sat, 05 Apr 2014 03:30:47 +0000