Apai umang enggau anak: --------------------------- Lebuh maya deka cuti sekula, dia bala sida anembiak sekula ti diau ba buding balat andal ati deka pulai becuti ba rumah panjai laban ti deka betemu enggau apai indai sereta bala menyadi ti bukai. Ari nya tadi, bala sida apai indai ti diau ba rumah panjai pan kinsung deka ngambi bala anak ba buding sekul. Nyadi sida ti diau ba ulu ai deka nurun tumu sebedau ari cuti sekula. Sida ti meruan bisi duit, diau ba pasar besai mih. Nyadi sida ti agi mekang belanja deka diau ba rumah temuai ti bisi disediaka ba belah ofis perintah. Baka sida apai umang, suah amai diau ba rumah temuai. Gaya pendiau bemalam ba rumah temuai ukai nya semanah baka diau ba hotel. Ni ko enggau mih laban ti deka ngambi anak iya Umang ti baru primari tiga. Umur Umang ti 9 taun nya agi bedau nemu ngemulaika diri baka sida ti udah besai umur. Baka selama iya lebuh maya lemai ari, apai umang deka ngemai Umang bejalai ba belah pasar sebedau seduai pulai ke menua tumu pagila. Lebuh seduai benung bejalai,dia Umang bisi bejaku enggau apai iya. Umang: Apai...peda nuan ba dinding churak mansau nya. Bisi nuan meda? Apai Umang: Auk..bisi aku meda nya Umang. Nama utai ko iya? Umang: Nya mih manuk guring ti nyamai diempa. Dikangau urang KFC.. Kala aku makai nya suba lebuh maya ba buding ti diberi kaban aku. Maya nya apai iya udah terima gaji kereja batang. Apai Umang: Manah amat kaban nuan nya anak... Maya sekula, anang enda manah enggau pangan diri. Umang: Apai...aku berasai deka makai KFC nya agi. Ulih nuan meli ke tua lagi apai? Apai Umang: Kati tua ka meli nya lagi? Pelabaku enti urang bejaku ribai enggau aku, sigi enda nemu aku nyaut lagi anak. Umang: Bakanya iya pia? Enda ngawa ga apai...enti aku dah besai pandai sekula sereta nemu jaku ribai, ulih aku meli ke tua ila apai. Apai Umang: Manah mih bakanya anak. Pandai besekula awaka enda tinggal ba arus pemansang. Anang baka aku, nadai pemandai. Aram Umang, pulai tua ke rumah temuai. Udah aku meli asi bungkus ke tua maya lemai tadi. **Apai Umang enggau anak iya pan begadai gadai pulai ke rumah temuai. Pengingin ati Umang deka makai KFC enda datai. Iya pan enda mejal apai iya meli pemakai laban iya nemu penyuntuk ti ditempa apai iya. Ba runding iya, udah cukup manah apai iya datai ngambi iya. Datai ba rumah temuai, seduai pan makai asi bungkus ti udah dibeli lemai tadi. Pengudah seduai makai, Umang pan beratur nipan gari seduai apai laban ti deka bekejang tumu pagila. Umang: Ka kini nuan apai? Apai Umang: Ka ke kedai meli gula sereta kupi... **Apai Umang bejalai pansut ari rumah temuai sereta nyidi jalai muntang nuju ba pasar malam. Lebuh maya makai tadi, enda berasai ai mata apai umang labuh ngenangka jaku kelaung dipadah enggau umang laban ti enda ulih ngemai anak iya makai ba KFC. Enti nitihka ati ka mih iya ngemai Umang makai ba KFC tang duit ba kerepai mina nguan kena seduai pulai. Laban ti enggai ngasuh anak iya puni puang nyawa, dia apai umang meli manuk guring ba pasar malam. Apai umang pulai ngemai manuk lalu meri enggau umang. Mua umang tampak amai gaga tajapan apai iya enda ulih ngemenuhka peminta anak iya. [Moral ba jerita tu iya nya ingat mih penatai sereta pemerinsa ti udah diasai lebuh maya kitai udah tinggi tucung ba atas bukit]
Posted on: Mon, 05 Aug 2013 12:40:30 +0000
Trending Topics
Recently Viewed Topics
© 2015