Apresiable Sra. Hassel i otro adresadonan, Awe mainta Sr. Cuero a informá mi ku el a terminá su wèlga di hamber ayera pa diferente motibu, di lokual unu ta e hecho ku e ta kere ku su petishon di WOTS lo wòrdu tratá seriamente. Su desishon ta bon biní. Si ta konsedé Sr. Cueru su petishon di WOTS, e lo wòrdu trasladá na Venezuela, anto e ora ei Sr. Cuero lo no por trese e problema aki dilanti mas na Bonaire. Sin embargo, esaki lo no solushoná e problema mes. E problema aki ta DISKRIMINASHON kontra imigrante. Esaki ta manifestá su mes na diferente manera, asina diferente detenido a konta mi (no solamente Cuero). Fuera di NO haña VI of ‘Gratis pa stranhero’, tambe tin e problema di e kastigunan disproporshonalmente haltu kontra imigrante kompará ku lokalnan. Cuero su kaso por sirbi komo ehèmpel. El a haña un kastigu di 5 aña pa un maltrato no hopi serio. Sin VI e tin ku sinta 5 aña. Un detenido lokal a haña 3 aña pa asesinato (of homosidio). Ku VI e detenido lokal lo sali liber ku 18 luna. Kada kaso ta otro, naturalmente. Pero por menshoná mas ehèmpel (mi mes sa di un otro ehèmpel, pero mi no tin pèrmit pa menta nòmber). Un solo ehèmpel no ta prueba nada. Pero Cuero no ta keha por nada. Korte di Hustisia lo por tuma nota di esaki i investigá si e keho aki tin algu aden. Mi ta kere ku un investigashon lo demostrá un patronchi diskriminatorio. Nada straño, pasobra nos ta mira e diskriminashon aki tur kaminda den nos komunidat. For di unda e ta bini i di kon, nos no sa. Pero bo mester ta siegu si bo no ta mir’é Kon ku sea, Sr. Cuero ta terminá su wèlga di hamber. Mi tambe a inform’é ku mi tatin kontakto ku San Martin (prizòn di Point Blanche). A sali na kla ku for di 10-10-10 San Martin tambe a introdusí e regla straño i diskriminatorio aki, esta e regla di NO duna VI ni ‘Gratis pa Stranhero’ na detenido di afó. Aparentemente e pagadó di belasting na San Martin tambe tin sufisiente sèn pa gasta na e diskriminashon inesesario i inhustu aki. Pero e bon notisia ta ku detenidonan di SXM a hiba kaso kontra esaki ku éksito. Mi no tin tur detaye ainda, pasobra e abogado di SXM ta den eksterior algun dia. Nos lo trata pa haña kopia di e hurisprudensia aki i nos ta spera ku esei lo ta sufisiente base pa Boneiru legumai e diskriminashon kontra imigrante aki. Un remarke tokante e karta di e Servisio di Prizòn di Hulanda di 26 di aprel 2013 (athuntu). Tur hende por lesa kon e Servisio aki ta informá nos ku Korte di Hustisia na Kòrsou tin tur informashon tokante e prosedura di ‘Gratis pa Stranhero’ na BES. Esei kier men, segun mi, ku aparentemente ta eksistí un prosedura asina. Sin embargo, ora m’a chèk a sali ku Korte di Hustisia na Kòrsou no sa di nada. E adrès di e-mail menshoná den e karta aki Korte tampoko no konosé. Sigur ta ku un k’e otro no ta bon reglá! Nos ta spera ku e korespondensia lo empuhá e.o. e Servisio aki pa traha seriamente riba e asuntu di ‘Gratis pa Stranhero’ i pa bin ku solushon.
Posted on: Thu, 27 Jun 2013 21:52:52 +0000
Trending Topics
Recently Viewed Topics
© 2015