Aw Kan Hmarram: Inthim-Tlâng Dum Duoi! “A ram le a felna zawng hmasa lem ro, chuongchun, chuong po po chu a pêk sa ding cheu a nih” (Matthai 6:33) Hmarram hi an thim am? ti inla, “Inhma khan chu an thim a, tuhin chu an thim ta nawh” ei ti tawl deuh fur ka ring. Chanchinṭha zar chauvin “Hmar thimpui” chun khaw êng chu a hmu ta ngei a. Chu khaw ênga ei hung dâk suok hin, hmatieng thlîrin beiseina hringin a mi ṭhuoi am or hnungtieng ngaiin ei kûr inkûk zing ti ruok chu hrietthiem an tak êm êm. Vawisûn ni chena ei hmasâwn dân, thu-le-hla tienga ei hmasâwn dân bîka hang thlîr chun, thu thar hla thar leh hmatieng ei pan mêk laiin, khingtieng panga chu hnungtieng ngainain nasatakin ei lungrilah thu a la tû niin ka hriet. Amiruokchu, hieng kâr laka hin thu-le-hla tieng nasatakin hma ei sâwn ti (thei) dingin a um a. Thu-le-hla tienga ei hmasâwnna hin ei hausakna chi khat nasatakin a a suklang bawk a nih. Hnam ropuina pakhat chu thu-le-hla a nih. Mihriem ieng angin tamin, hrât hle sien khawm, thu-le-hla tieng hmang ding le sawr ding a nei naw chun, chu hnam chu hnam hausa ti an tak a. Hnam hmasâwn amanih, hnam ropui ti thei ding an um meuh ngai nawh. Hmarhai ei vângneina tak pakhat chu, thu-le-hla, abikin hla tienga ei hausakna hi a nih. Chanchinṭha’n a mi hung elvar hnungin, ei khaw nghat dân ding khawm a mi siemṭha (danglam) pêk a. Mani ram le hnam ngainatna châng hrietna dâm, ei hnam ro thilhai ngaihlut nachâng hrietna kawnga dâm, ram ngai hla le Siemtu inpâk puma a thil siemhai ngaihlutna kawnga dâm ei mit a sukvar a. Hnam hla, ram ngai hla ei tihai khawm tamtak a suok tah a nih. Pathien thu le ân kalna a um chuong nawh. Hi tak hi hnam danghai nêka ei hausakna niin ka hriet. Hnam Ro: Hnam ro laia hlutak pakhat chu HLA hi a nih. Thlarau rama ei rawngbâwlna Pathien hla tamtakhai chu thu hranah sie ta inla, thlarau ram tieng thil (ding) an ni bawk leiin. Khawvêla ei châm sûnga pawimaw ve êm êm chu, ram ngai hla le hnam ei nina anga ei inpholangna le Thilsiemhai ei inpakna Hlahai hi an nih. Abîkin Hmarhai hi hla ngaina mi, hla mi tak ei ni a, lunglêng thei tak ei ni bawk leiin hnam danghai nêkin hla khawm ei hau lem a, einia inthawka suok hi a tam rêng bawk a nih. Pathien thu-le-hla ni lova chu, Hnam Hla ei tihai, ram ngai hla dâm, hnam thila inenfiena ding le lungawinawna dâm, lungdumna thuhai dâm hi ei hau êm êm a. An mawina le hlutna ang huin ei chawimawiin ei ngaihlut tâwk naw am a ni aw, ka ti hlak. Hnamin Ro ei humhal theina ṭhatak pakhat chu thu-le-hla vawnghim hi a nih a. Ei hnam ro thil, thu le hlahai khawm hi ṭhang le thar peihai ta dinga lo vawnghim hi Hnam Ro ei humhalna pakhat a nih. Abîkin Hmar hlahai lem hi chu an nal thei êm êm a, hnam dangin ei nei ang hi an nei ve nawh. Hmar hnam hla ṭha deuh deuh, vawisûn ni chena mi châwmtu le la hring êm êm ṭhenkhat, ka ngaithlak zâta thisen sukso dut dut khawpa thlarau chen thema phûrna dangdai tak mi pe hlaktu, lungril taka uongpui khawp tlinga ka hriet hlak, ṭha ka tihai chu hienghai hi an nih. 1. Dâr ang Lêngna Kan Tlângram Mawi – L. Keivom 2. Kan Tlângram Mawi – Rev T Khûma 3. Aw Kan Hmarram – Lalkhum Keivom 4. Hmar Puonzâr Khai Ei Tiu – Rev T Khûma 5. Ṭhangruolin Lungruolin – Lalrawngbâwl 6. Mani Ṭawng Ei Hrâtna – Rev T Khuma 7. Sinlung Khawpui – Lalhmingthang Abîkin Rev T Khûma hlaphuok hai hi an ṭha bîk a. Zokai Thlifîm damtea hrângna le fiertui luonga, hring le hriem tinrêng lâwmna ram chu khawvêla khawm hin a vâng hle ka ring! Sâppui nun ngai lova dâr ang lêngna ding chun ram ṭha taluo a ni ringawt a nih! Pu L Keivom-in “Kan tlângram mawi, hring dum dûr hi, lêngtu sâwlthing tin an vul chie. Thlîrin a mawi salung a awi, zo thlifîmin damte’n mi thawi” a hung ti nâwk a. Dâr ang ei (lo) lêngna, zai tin rema ei chawi ram a ni mieu si a, lung chu a dum hle ti a chieng a nih; par ang vul chie ta naw sienkhawm! (Silai khu le pilvut khu an vul chie chie an tah naw’m a nih?!) Hieng ang lâwma lungdumtu ram mawi le ngaium hi, atak ram nêk hmain ei lungril ah a châm (tah) ni’n ân lang a. Hmarram hi atak (Physical) nêk hmanin lungril le thlarau (Spiritual) rama um lem niin an lang tah. A tak ram inchangna umsun chu hlahai hi ni tahin ka hriet a. Chuleiin, hieng ei hnam hla ropui tak takhai hi document ṭhataka sie dân um sienla aw, ka ti zing laiin tulai hin Hmar Documentary hmu ding a hung um zeuh zeuh a, lâwm a um hle. Tuta Music Video Album-a hin a ṭhang nawh a chu, “Fahrel Tawk Lâm” (Lêngi Kân Rawh) ti hla kher lem hi chu a ropui a nih. Khawvêlah hieng anga nal hla le lâm inkawp hi a nei an um nawh! Bangkok-a khan UNO hotuhai ka’n entir a, ropui an ti hle. Ṭhenkhatin a lâm an copy a chu a hla an nei ve nawh! Copy-paste mei mei an thaw a nih! Sinlung Entertainment Hmalâkna: Hienga ngaituona tamtak ka lo sêng ve hlak laiin, Pu Ringsan F Tusing, Muolvaiphei ṭhahnemngainain, Sinlung Entertainment hmingin ei hnam hlahai hlu tak tak, ei hlasakthiem hluihai insaklâwrtirin Video digital document ngeiin a hung document a. Hun sâwt taka inthawka a lo buoipui tah chu tlângzar thei dingin a hung um el ta hi a ropui hle. Ṭum hni zet a mi hung pan tah a, a thei tâwk tâwka ei hnam rothil, abîkin hlahai a lo document ve, lo thlîrpui ve dingin a mi hung ti hlak a. Thiemna le varna, sum le expertise a nei ṭhat bîk leia a thaw chu a ni naw tawp a. Hnam ta dinga a ṭhahnemngaina leia mâni pawisa sêng huoma a thaw a nih ti ka hrietna hin ngaisâng a um zuol ka tih a. Hlasakthiem hran hran haiin Hmar hla mawi tak tak an sak, album-a siem chu a Trailer lo en ve dingin copy a mi hung pêk a. Ka hang en chu, a chunga hla ṭha ka tihai khi an ṭhang vawng bâkah, hla dang dang khawm a la ṭhang sa ta rawp a. Chuong laia hnam hla hlu tak tak chu; Sinlung Suok Zalêng Tinrêng (Pu Buonglienkûng), Zalênna Ni (Rev Lalhmingthang) le Indin Thar Nâwk Ei Tiu (Upa Lalnuntluong Faiheng) hai phuok inlâr tak tak khawm an la ṭhang ta rawp a nih. A saktuhai ka hang en a, Vânlalhriet, Lalhringpui, Sharon F Tusîng, Lalpârzo, Janet L Varte, James Pakhuongte, Thanglienṭhuom, i suongvâwr êm êmhai vawng an ni nâwk a. Tulaia ding chun ṭhenkhat lo ṭhang hlui deuh ta hai sienkhawm, an râwl mawina a la chuoi chuong nawh a. Tulai ṭhangthar hlasakthiem tamtak nêk chun ngaithlâk a lân hawi lem a nih! (A hla haiin an zir lei khawm ni ta vêng a tih!) Sinlung Hills Development Council, Mizoram-in an buotsai “Sinlung – A Documentary of The Hmar Tribe” ti kha ka lo preview tah a. A hlutna kha ân sâng hle a. Tuta Hnam hla document Music Video Album khawm hi Hla chauh a nia chu a hlutna a duoi bîk nawh. Hieng ang documentary Music Video ei nei thei hi ei vângnei a, an tlângzar pha chu nei ngei ngei dinga inchâwk seng chi niin ka ngai. Ṭhang la hung thar peihai ta ding khawma documentary pawimaw tak la hung ni ngei a tih. Asan chu, Lenruol Hlabu ei lo nei taa chu, ṭhangthar tamtakin ei hnam hlahai thlûk dâm an theinghil zo tah a. Pronunciation thua dâm, hla thlûk vawnghimna kawnga dâm a la hung ṭangkai hle ka ring. Ei hnam hla poetic wording hai hi English (Sâp) ṭawng khawma a mawina thlukpuia inlet intak hle’ng an tih! Hang ziek sei rak khawm ṭûlin ka hriet nawh a, hang ena a hlutna hmaih ruol lo a ni leiin, tlângzar ni vat vat sien, mi tinin nei inla, promote sup sup inla ti hi a nih ka thlâkhla ta chu! A buoipui hun sûng, sum le pai, tha le zung sêngso po po ngaituo chun chêng za hni vêl chauva inchâwk thei ding chun a hlu êm êm a. Tulai khawvêla ding chauh ni lo, khawvêl la hung um pei dinga khawm Hnam Ro hlu tak a la hung ni pei ding a nih ti hi a nih ka hmudân chu. Chuong ang taka Hnam Ro hlu tak a hung ni pei a, Hmar nauhai mi keihartu le inthuruolna ṭha lem mi petu a hung ni pei ka beisei!
Posted on: Sun, 28 Jul 2013 07:31:20 +0000
Trending Topics
Recently Viewed Topics
© 2015