BABAYENG minyo nga dunay samad pinusilan sa walang abaga napalgang patay kagahapon sa buntag sa kanal daplin sa karsada samtang ang motorsiklo nga iyang gimaneho nahanaw. Naglibog pa ang kapulisan sa unsa gyud ang motibo sa pagpatay sa biktimang giilang si Joan Larosa, 31, minyo, taga Deca Homes, Brgy. Tungkil, Minglanilla, apan ang iyang pink nga motorsiklo nga Mio nakit-ang gisakyan sa usa tulo ka mga killer. Tulo ka mga lalake, duha nag-angkasay sa motorsiklo samtang ang usa nagsakay sa motorsiklo sa biktima ang nakit-an nga dali nga nipalayo sa dapit. Nagsul-ob pa sa iyang crash helmet si Larosa dihang napalgan sa mga tawo nga nangagi sa Sityo Inamonan, Brgy. Pangdan, dakbayan sa Naga. Si PO1 Jason Panilag, 1st responder ug sakop sa alert team sa Naga Police nga nahinabi sa dySS Super Radyo/Sun.Star Superbalita, nagkanayon nga nagpaabot pa sila sa resulta sa eksaminasyon sa Crime Scene Investigation (CSI) sa Cebu Provincial Police Office (CPPO). Gawas sa pinusilan, dunay daghang mga garas sa lawas samtang gamay ra ang dugo. Usa ka tawo nga nagpakabana maoy nipahibawo kanila kabahin sa usa ka babayeng patay nga napalgan daplin sa dalan. Siya niingon nga tulo ka mga anggulo ang ilang gisubay. Una, posibling dunay nasuya kaniyang tawo tungod sa pagkamatinabangon. Ilang nahibaw-an nga abroad ang bana sa biktima base sa gibutyag sa mga igsuon niini dihang ilang gidu-aw sa ilang balay sa Minglanilla. Ang mga kabanay nibutyag nga si Joan nigikan niadtong Martes sa alas 5 sa hapon kay naghatod og kuwarta sa ilang paryente sa Don Andres Soriano, dakbayan sa Toledo alang sa beauty pageant nga siya ang sponsor. Ilang kuhaan og mga pamahayag ang mga paryente niini aron masubay unsay gibuhat sa biktima sa wa pa ang hitabo. Ikaduhang anggulo kon wa ba kini gikarelasyon nga posibling rason sa pagpatay sa biktima. Ang ikatulong anggulo nga posibling ang biktima gi-tripingan sa mga batan-ong adik nga way lingaw hinungdan nga gipatay ug gidala ang iyang motorsiklo. Gisalikway nila ang anggulong tulis kay ang mga butang sa biktima intact sama sa gamay nga backpack nga didto ang iyang pitaka, kwarta, I Pad, cellphone ug mga alahas. Wa sab hilabti ang pagkababaye niini ka yang gipangsul ob sa biktima wa maunsa. Si Supt. Eduardo Saavedra, hepe sa Naga Police nga nahinabi sa dySS Super Radyo/Sun.Star Superbalita nagkanayon nga di tulis ang motibo sa krimen. Nagtuo siya nga mas dunay lawom nga motibo ang krimen kon nganong gipatay. Matod niya nga posibling kaila sa biktima ug angkas ang killer dayon human sa pagpatay gihimong gateaway vehicle ang motorsiklo niini. Posibling Martes sa gabii pa gipatay ang biktima samtang padulong mopauli nga sakay ang mga suspek sa motorsiklo ang mga killer. Kini human nigawas sa post mortem examination nga ang lawas sa biktima gibana-banang 12 ka oras nang patay. Sa nakuhang kasayuran sa kapulisan, duha ka mga motorsiklo nga paspas nipadagan ang nakit-ang nipalayo sa lugar paingon sa Poblacion, Naga City. Ang duha nag-angkasanay samtang ang usa maoy nagsakay sa kolor pink Mio nga motorsiklo sa biktima.
Posted on: Thu, 11 Jul 2013 04:42:09 +0000
Trending Topics
Recently Viewed Topics
© 2015