BC Roy Trophy : Mizoram in Final lut! National Referee kan nei bawk. (Report kimchang) 49th Junior National Football Championships for BC Roy Trophy khelh mekah vawiin chawhnu dar 2 khan Mizoram chuan 3-1 in Punjab an hneh a, final an lut. He inkhelah hian Mizoram tan Chanmari FC player Malsawmzuala chuan goal hnih thunin FC Bethlehem player Jonathan Lalmuansanga’n goal khat a thun bawk. Mizoram 3-1 Punjab (Malsawmzuala 31’,38’ ; Jonathan Lalmuansanga (penalty) 45+1’) Mizoram player-te an te zawk a, Punjab player-te hi an lian hle a. Mizoram player erawh an cherang zawk a. Minute 31 naah Malsawmzuala (Sawmtea)’n goal hmahruai a thun a, minute sarih hnuah Sawmtea vek hian goal a thun leh a. First half tawp dawnah Jerry Mawihmingthanga’n penalty hlawhchhuakin Jonathan Lalmuansanga’n a pet goal a, 3-0 in first half a tawp a. Second-ah erawh Mizoram Team an talbuai a, double yellow card vangin striker Vanlalduatsanga leh midfielder Vanlalruata-te hnawhchhuah an ni a. Goal hnih thuntu Sawmtea an pet a, a inhliam phah a, thlak a ni nghe nghe. Ball tel lova Sawmtea pettu hi hnawhchhuah anih loh avangin Mizoram Team an lungawi lo hle bawk. Mizoram-in player pakua chauhva an khelh tawh avangin minute 68 naah Punjab-in goal khat an thun ve hram a. Mahse, Mizoram lamin goal thun aiin goal ven a pawimawh zawk tih an hria a, an goal an venghim thei a, 3-1 in chak a ni. Manager thukhawchang Mizoram Team Manager Hmingsanga chuan “Kan naute an khel tha a, pakua chauhva khel chung pawha kan chak thei hi ka lawm hle. Player leh coaching staff chungah pawh lawmthu ka sawi a. Chutih rualin player pahnihin red card an hmuh avangin final an khel thei dawn lova nimahsela anmahni thlaktu tur chu kan nei thova, kan champion thei ngei ka beisei” tiin ZoFooty a hrilh Tlangkawmna Mizoram junior team hian an match hmasa berah 5-2 in Uttar Pradesh hnehin an match hnih naah 9-0 in Haryana an hneh a. Pool match tawp berah 7-2 in Orissa hneh lehin Semi Final an lut a. Match li khelhah goal 24 thun tawhin match tina goal 6 thun ang an ni a. Goal 5 chhuah tawhin match tina goal khat leh tlem chhuah ang an ni thung. Jerry Mawihmingthanga (Chanmari FC) chuan goal 7 thun tawhin Vanlalbiaa Chhangte (Chanmari West FC) leh Vanlalduatsanga (Aizawl FC) te’n goal 6 ve ve bawk. Mizoram team coaching staff leh player-te an fakawm takzet a. Zantin tawngtai rualna neiin vawiina an chak chiah phei kha chuan field chhungah an tawngtai a. “Hnehna chu Lalpa ta a ni” tiin an au rual a, an chakna Pathian anih thu an puang a ni. Hei vang hian team boruak pawh a tha a, chutih rualin inhliam ta, Sawmtea erawh a dinhmun ala hriat theih mai lova, Damdawi inah hruai a ni a, final a khel thei lo mai thei a. A dam thuai theih nan Mizo mipuite’n i tawngtaipui ang u. BC Roy Trophy hi U-19 tana siam a ni thin a, nimahsela he trophy hi kumin atangin U-17 level-a thlak a ni a. Mizoram hian a vawikhatna atan champion an tum hle. AIFF-in a kalphung thlakin U-19 tana siam ai chuan U-17 level-a siam a, a tha zual lakkhawma, U-19 tana chher a duh vang zawk a ni. He tournament-ah hian scout an tam hle a. Mizoram player pawh duhtu an tam viau a nimahsela coaching staff lam chuan tournament khelh laia an rilru la peng theitu anni thei tih hre rengin an naute an la hupbet rih a ni. Thu lawmawm dang Mizoram atanga National Referee pratical exam neia kal Jonathan Lalngaihawma (Champhai) leh Lalfakzuala (Electric Veng,Aizawl) te chuan exam hi pass-in National Referee-a puan an ni a. Anni pahnih hi ZoFooty chuan a lawmpui tak zet zet a, an kal zelna turah pawh duhsakna a hlan bawk. Jonathan-a leh Faka hi MPL-a referee nilai an ni. zofooty/news/bc-roy-trophy-mizoram-in-final-lut.html
Posted on: Fri, 27 Sep 2013 13:55:55 +0000
Trending Topics
Recently Viewed Topics
© 2015