BPL : Swansea 2-2 Liverpool Nizan zanlaia khelh BPL-ah season bul tan tha tak leh point hmu sang berte zing ami Liverpool leh Swansea City inhnehtawk mah se, Liverpool in table-ah hma an hruai chhunzawm zel. Swansea 2-2 Liverpool (Jonjo Shelvey 2’ ; Michu 64’) (Daniel Sturridge 4’; Victor Moses 36’) Tute nge khel? Swansea : Vorm, Rangel, Chico Flores, Williams, Davies, Britton, Shelvey, Michu, Dyer (Guzman), Routledge, Bony (Pozuelo). Liverpool : Mignolet, Wisdom (Toure), Skrtel, Sakho, Enrique, Lucas, Gerrard, Henderson, Coutinho (Aspas), Moses (Sterling), Sturridge. Swansea leh Liverpool tana mi pawimawh ‘Shelvey’! Swansea City-in Liverpool lo mikhualin 2-2 in an inhnehtawk a, he inkhela langsar ber chu Liverpool player hlui Jonjo Shelvey a ni a, goal li ah te hian a inrawlh vek a, goal khat thunin goal khat a siamsak a, an goal hnih chhuahah te hi a tihsual vang a ni bawk. Shelvey hi Liverpool player hlui niin kum 2 chhung Liverpool tan a khel a, tun season-ah hian Swansea City a zawm chauh a. Mi tam takin mahni club hlui lama goal thun an chak chu ani pawn ti hlawhtlingin inkhelh tan atanga rei lote, minute 2 na lekah Liverpool defender Mamadou Sakho bumin goal a thun a. Nimahsela a club hlui zah lantirnan a goal thun hi a lawm tha duh lova, ban a phar ringawt a ni. Swansea an phur dawn chauh tihah Shelvey hian tisualin Liverpool player Daniel Sturrdige a pass palh a, ani hian a lo pet goal a, Premier League-a goal li a thunna chiah a ni bawk. Liverpool-in inkhel an thunun zawk a, minute 36 naah Shelvey tihsual atang bawkin Liverpool-in goal an thun leh a, Chelsea atanga Liverpool-in an hawh Victor Moses chuan goal a thun a ni. Liverpool an phur a, an chak anih chuan a zawna match 4 an chakna tur niin 1990-1991 hnua season bul an tan that leh berna tur a ni a, chak ngei an tum hle a. Nimahsela minute 64 naah Shelvey thawhrah sengin Swansea lamin goal an thun a, fing taka Shelvey tauh pial chu Swansea goal thunkhawl - Michu chuan lo lain ani hian a pet goal a, goal dang a luh belh tawh loh avangin 2-2 in an inhnehtawk a ni. Sawi zui ang Tihian Liverpool hian match 4 khelhah point 10 an hmu a, table hmahruaitu an ni chhunzawm a. Chutih rualin striker Daniel Sturrdige chu Liverpool striker Premier League match hmasa palia goal thun thei vek awmchhun a ni bawk. Nimahsela Premier awm hma 1987 khan John Aldridge chuan match hmasa - game 8 ah a zawnin goal a lo thun tawh a ni. Tin, Liverpool lama Shelvey goal thun kha minute 419 hnua Liverpool-in Premier League-a an goal chhuah lehna chiah a ni bawk. Liverpool hi history neitha tia sawi anni fova, sap thufingin “History repeats itself’ a ti a. Chuvang chuan history hi a rawn inher leh dawn em? tih hi mi tam tak zawhna a ni. Nimahsela match li chauh khel a la ni a, engmah sawichian theih erawh a la ni lo. Hei erawh Liverpool tantute beiseina leh duhdan chauh a ni thung. zofooty/news/bpl-swansea-2-2-liverpool.html
Posted on: Tue, 17 Sep 2013 04:55:27 +0000
Trending Topics
Recently Viewed Topics
© 2015