COMET ISON: BLACK DEATH 333 YEAR CYCLE? 1. BLACK DEATH: Kum 1347 khan Simeikhu (comet) pakhat, a hming ‘Comet Negra’ tia an vuah chuan hnai ang reng takah Lei a kal pel a. He Simeikhu hi thla eng emaw zat chhung chu Lei atanga hmuh theih a awmin Vanah a lang a ni. Chu Simeikhu a kal liam hnu lawk atang chuan Europe ram pumpuiah hripui, ‘black death’ an tih chu a leng zui ta bawk a, 1348-1350 kha a Europe-a a hluar lai ber a ni. Asia leh China ramah te chuan chu hripui hlauhawm tak ‘black death’ an tih chu a leng zui ve ta zel a. He hripui hi Central Asia atanga 1346 a lo leng tan nia ngaih niin, kum 12 chhung zet leng zuiin mihring maktaduai 75-200 zetin an thih phah ang a chhut a ni. He natna hi zakhnuai leh kap vela thawk a ni ber a. Khatih hunlai khan natna hi engvanga thleng nge tih an hre lova, tin, hriselna leh thianghlimna lam ngaihthah vanga natna hrik puang vak thin a ni tih pawh an la hre ngai hek lo a ni. He natna hri lenna chhan hi an hre mai lova, puh tur erawh an haihchham hauh lo, “Judate thiltih a nilo theilo” tiin Judate chu an kawh rawn ta luai luai mai a nih chu! Judate’n ramhuai setana hnen atanga tûr la in Christian-te tihlum vek nàn an tuikhur leh boruakah an thehdarh a ni, tiin thu puarpawleng an thehdarh chiam a, tunhma zawnga ‘pathian thattu’ tia an puh thinna chu behchhah nana hmangin Judate huatna a alh leh ta hluai mai a ni. Hei hi chu duhtawk phawt ila. 2. GREAT PLAQUE OF VIENNA: Comet Negra a lan atanga kum 333 hnu, 1680-ah chuan Simeikhu pakhat, C/1680 emaw, ‘the Great Comet of 1680’ an tih, 14 Nov., 1680-a a hmu chhuaktu Gottfried Kirch a hming chawia ‘Kirch’s Comet’ an tih bawk chu a lo lang leh a. He Comet hi kum zabi 17-naa Simeikhu eng ber a ni a, chhun en lai pawha hmuh theih hial khawpin a eng a, a mei hi a sei em em bawk a ni. He Simeikhu hi a en zual ber ni chu 29 Dec,1680 kha a ni a, 30 Nov.ah Lei atanga a lan theih hun hnuhnung ber chu 19 March,1681 kha a ni bawk. The Great Plaque of Vienna an tih, hripui rapthlak zet chu 1679 khan Austria khawpui Vienna atangin a taidarh tan ta bawk a. Hei pawh hi black death ang bawka thal thoh natna niin a thlentu pawh bacteria chi khat ‘Yersinia pestis’ an tih a ni a, Uihli te’n pu darhin Sazu te’n an kai chhawng a, chuta tang chuan mihringte’n an lo kai chhawng ve leh ta zel a ni. He natna avang hian Vienna-ah chuan mi 76000 zet ten an thih phah a ni. Heta tang hian he hri hi a darh chho ta zel a, 1680 ah Dresen ah a leng a, Czech Repulic khawpui Prague (‘Praha’ tia lam tur) ah 1681 khan mi 83000 in a thih phah ve leh ta bawk. Magdeburg leh Halle-ah te leng chho ve leh in, Halle-ah hian mi 4397 te an thi leh ta a, German hmar lam ramte pawhin nasa takin an tuar chho ve leh ta zel a ni. Heta kan tarlan tum ber chu- ‘Comet Negra’ kha 1347 ah a lo lang a, black death kha 1346 atangin a rawn intan a nih kha. Hetiang chiah hian C/1680 (Kirch’s Comet) kha 1680 ah a lo lang a, the great plaque of Vienna kha 1679-ah a rawn intan veleh ta bawk a..Heng hripui lengte leh Simeikhute hian inkungkaihna a nei em? tih hi ngaihtuah zui tur a ni e. 3. COMET LEH HRIPUI HIAN INKUNGKAIHNA A NEI EM? 3.1. Black death (1346) hnu-ah hripui leng hi 1650 khan a lo awm tawh bawk a, hemi hripui len chhoh zel lai hian Simeikhu C/1652 Y1 an tih, 16 Dec, 1652 a hmuh chhuah chu a lo lang zui a, China, Europe leh Africa atangte in an thlir a ni. Chinese hoten an record dan chuan Dec 22 khan tuihu (steam) rawng dal tak angin an hmu a, khawthlang lam pana kalin Tauras (Bull) a kal tlang a ni. Europe atang chuan 18 dec.1652- 1 jan.1653 thleng a lang a ni. Poland atang chuan 20 dec- 8 jan. thleng a lang thung a, Cape of Good Hope atanga an record dan chuan 17 dec.khan chhak-chhim-chhak hawi zawnga kalin tlai ah a hmuh theih an ti. Chhohreivung chhim lamah he Simeikhu lu lam hi awmin a mei lam chuan hmar lam a hawi bawk. 24 dec.ah chuan a lu chu siruk atanga degree khat ah a awm a, a mei lam chuan chhimchhak lam hawiin a hmuh fiah theih hle bawk. 3.2. The Great Plaque of London an tih chu 1665-1666 khan lengin, mi 100000 zet ten an thih phah a. 1665, march 27 khan simeikhu pakhat a lo lang bawk a, China, Korea, Japan leh Europe atang tein a hmuh theih a ni. March 27-April 20 khan Europe atangin an thlir a. March 28 ah khan China atanga hmuh theih ve niin, Aquarius hmar thlang lamah a awm a. April 17 khan Pisces hmar lam hretah a awm a ni. 1664 khan Simeikhu pakhat a lo lang tawh bawk a, China, Korea, Japan leh Europe ram atang ten zing lamah hmuh theihin a lang a, 17 Nov.1664- 20 Mar.1665 thleng khan a lang thei a. 17 Dec.1664 khan Arsi bawrkhawm pakhat ‘sea serpent’ khawthlang lamah awmin, a mei chuan hmarlam a hawi bawk. 29 Dec.ah Gemini (Twins) a kal tlang a, 1 Jan. 1665 khan Tauras thlanglam a thleng a, zan hnih hnuah a mei lam chuan hmarchhak a hawi lehin Aries (Ram) hmarlam pangah a kal tlang leh ta a ni. 8 Jan. ah chuan Aries hmar thlang lamah a awm leh a. 20 Jan.ah chuan Pisces (Fish) hmarlam kal tlang lehin a mei sei zawng hi degree 3 vel a ni. 3.3. Netherlands ah pawh 1667-1669 chhung khan hripui a leng a, France ramah 1668 khan a lo leng tawh bawk. 3 March, 1668 khan Simeikhu a lo lang tawh bawk a, China,Korea,Japan,India,Africa leh Europe atang tein a hmuh theih a. He Simeikhu hi Cape of Good Hope atanga hmuh theih tan niin, 3 March,1668 khan a lo lang a. Ni 2 hnuah Brazil,Lisbon (Portugal) atangin a hmuh theih leh bawk a, a hmuh fiah theihna ber chu southern hemisphere lam atangin a ni. Arsi bawr khawm ‘Whale’ atangin ‘Eridanus’ (River) lai hawl thleng a awh a, a mei hi degree 30 zeta sei a ni. Goa,India atangin 9-21 March chhung khan a hmuh theih bawk. 3.4. 1675-1684 inkar khan Turkey leh Balkans area velah hri thar a leng bawk a, N.Africa, Bohemia, Poland, Hungary, Austria leh Saxony te a tuam kim vek a ni. 1672 , 2 March khan Simeikhu a lo lang tawh bawk a, April ni 22 thleng a hmuh theih a, Chhohreivung (Orion) hmar lam pangah a lang a ni. 1677, April 27 khan Gdansk atangin Hevelius an simeikhu thar a hmu chhuak bawk a, May 8 thleng khan a hmuh theih a ni. He simeikhu hi Europe atanga hmuh theih a ni a, May 3 khan a mei chu 6 degrees vela sei a ni. 1678, Sept.11 khan Philippe de La Hire chuan Aquarius chhungah Simeikhu pakhat a hmu chhuak bawk a, Europe atanga hmuh theih a ni. Pisces lam panin a kal a, 7 Oct.khan Pisces chhungah a hmuh theih a ni. 4. COMET ISON: ‘The Great Comet of 1680’ ( C/1860 or Kirch’s Comet) lo lan atanga a kum 333-naah chiah Comet ISON a lo lang leh ta e.. Comet Negra a lan atanga kum 666-na chiah a ni e. Tun hma kha chuan khawsak changkan loh vangin hri a leng a, mi tam tak an thi puk puk mai a. Tunah chuan khawsak changkan leh science lam thiamna avangin hri leng puk puk a awm tawh kher lo mai thei.. Mahse Science thiamna hi mihringte thih puk puk theihna a lo ni ve ta thung a..Comet ISON avang hian hrehawmna, thih zawih zawihna hi a lo thleng ve thei mai ang em tih hi kan ngaihtuah a ngai a ni. Chutiang thleng tur chuan ngai ila, lo inbuatsaih lawk ila, a lo thleng ta a nih chuan kan inbuatsaih fuh a ni ang a, a lo thleng ta lo a nih leh eng em em kan chan chuang lovang. Chutiang thil lo thleng tur engmah a awm lovang, kan ti a, kan inbuatsaih lo a nih chuan, engmah a lo thleng loh tak tak a nih tak leh ngai kan awh a ni ang a, thil hlauhawm tak a lo thleng ta thut a nih erawh chuan ‘kan che chhe viau thung ang’…thih leh dam inkar a hril thei tlat…chatuan thihna hial kan tawk thei a ni.. Thutlukna chu I kutah khan a awm e. He Comet chanchin chu kan sawi ngun tawh a, ‘mihring fapa chhinchhiahna’ a ni thei ang em? tihte pawh kan lo khel bap bap tawh thin kha a ni e. Nov.28,2013 ah mit lawnga hmuh theihin a lo awm ang a, Dec 26 ah Lei a kal pel ang. Lei a kal pelh fel hnuah a mei lam hi Lei nen a inhnaih hle dawnin mithiamte’n an sawi nghe nghe a, he comet hian a zinkawng (course) pawh vawi hnih a thlak tawh tih kan sawi tawh nghe nghe kha.. Hetia a course a thlak a vang leh kan lei hi a orbit pangngaia a kal reng si avang hian ‘duh aia hnaiah’ a mei lam hi kan hmu mai thei bawk. I lo thlir zel phawt mai teh ang. Nov.17&18 hian star sign ‘Virgo’ (nula thianghlim) nau hrinna kawng (birth canal) entirtu Arsi eng tak ‘spica’ a rawn kal tlang ang a, hetih rual chiah hian Thla bial (Full moon) chuan star sign Tauras the Bull (Bawngpa) a lo kal tlang ve dawn chiah a ni. Helena Lehman, Astrologer sawifiah dan chuan, Virgo hi nula thianghlim ‘Mari’ entirtu a ni a, ‘Krista mo’ entirtu a ni thei tho bawk. Heng entirna atanga lo lang ta chu, he comet ISON hi Virgo in a entir, Church of Judah (Messianic Jews) leh Ephraim (Christian) chhungkaw hnih atanga ‘mihring fapa’ lo kal chhuak entirtu a ni thei dawn a ni. Hetih hun lai tho hian Thla (moon) chu Siruk (Pleiades) leh Hyades (arsi bawr khawm hnai ber, V-shaped ang deuha lang) inkarah a awm ve chiah ang. Taurus- hi star sign ah chuan bawngpa (bull) tih a ni a, pleiades leh hyades te hian an siam a, pleiades hi bawngpa taksa entirtu a ni a, hyades hi bawngpa hmai/lu entirtu a ni. Hei hian Astrology ah pawimawhna a nei a, THLA (moon) hi Kohhran entirtu atan hman a ni a, thla eng bial pap (full moon) hi ‘thlarau lama Kohhran eng’ entirtu a tan an hmang thin a ni. Hemi awmzia chu, ringtu diktak, thlarau lama puitling tawh, Kristaa awm tlat leh a nuna Pathian eng lan chhuahtirtu, Thupuan-a Philadelphia Kohhran entirtu kha a ni. Tichuan, Nov.18 ah chuan Comet ISON chuan spica a kal tlang ang a, Thla chuan Taurus a kal pel ve thung bawk ang a. Simeikhu dang (Comet Lovejoy) chuan Ursa major (the big sheep pen) an, ringtute entirtu atana an lo hman thin tawh chu a lut ve chiah ang. (Comet Lovejoy hi pahnih a awm a, pakhat zawk chu 27 Nov.2011 a Terry Lovejoy-a hmuh chhuah C/2011 W3 Lovejoy a ni a, veus-chawngmawii ang tluka eng a ni. Tuna kan sawi hi chu Lovejoy-a thovin 7 Sept.2013-a a hmuh chhuah, C/2013 R1 an tih zawk hi a ni. 1Nov,2013 khan mit lawnga hmuh theih a ni a, 19 Nov.hi Lei a hnaih hun ber tur a ni) Chubakah Comet LINEAR chu Bootie ah a awm ang. Bootie hi pasaltha(hunter) entirtu, great bear (zangkhua) hnu chhui a sapel anga peltu tur anga sawi thin a ni a, a bula arsi pahnih lo langte khi a uisathiam hruai niin an sawi thin. Hemi chanchin zirtu Helena chuan Berampu tha entirtu a tan a hmang thung. (comet linear an tih hi simeikhu rual/huho sawina a ni mai a, tuna kan sawi bik hi chu simeikhu panga, eng tha tak tak tun hnaia an hmuh chhuahho sawina a ni e) Hetih lai vek hian Comet Encke chu Mercury bul hnai tak, Virgo ke bulah a awm ang a, Saturn chu Libra (bukna) chhungah a awm leh bawk ang..Libra hi bukna a nih angin mi fel leh fel lo tehna/bukna entirtu a ni thei nghal dawn a ni. (Comet Encke hi 1786-a Pierce Mechain’an a lo hmuh chhuah tawh, kum 3 dana lo lang ziah thin a ni e) Saturn leh Comet Encke awmdun hian setana’n Yahshua leh A ringtute entirtu Comet ISON tihboral a duhzia a entir bawk a ni. Comet Ison chanchin hrechiang duh tan link-ah te hian luh tur a ni. 1. Comet ISON: //facebook/lka.chawngthu/posts/394464644014807 2. Hmeichhia Ni (sun) a inthuam (Thup.12): //facebook/lka.chawngthu/posts/395292147265390
Posted on: Sat, 16 Nov 2013 10:29:17 +0000
Trending Topics
© 2015