Cardap Banjar: Patandingan Akhir Bakantut (Siri 20) GOUK! GOOUUKK! GOOOUUUKKK! Kadangaran ilun burung tagaguk sing hangkuian. Mamburinjing saawakan, ilunnya mamacah kahawaian malam. Tangah malam ngitu dingin manganyim. Hujan hanyar imbah tamandak. Baal sabumian dilapai banyu hujan. Ilun katak jaung mahiyau hujan baumpatan jua mawarnai kakadapan malam. Sasakali bailun suara kucing marau maningas, bakakaratan di barumahan. Bujur ujar tutuhanya, amun siang ari ngitu hangat mambarangat, patanda kaluku malamnya hujan sing labatan. Guri nang ditanaii banyu hujan, talimbah. Tulamak kauyuhan. Saawakan singkal. Saharian maulah gawian di bandang, malamnya pulang taampar sadinan. Bakalambu habang, bakalumbun gabang kuning Tulamak janak guring. Dewan Banjar Kerian liwar hibak awan para pangunjung nang bajurut datangan handak maniring Patandingan Akhir Bakantut. Papasingnya ada nang datang awan kakawanan, saparanakan wan bubuhan kulaan. Para media matan pipar, talibisin wan radiu gin umpat jua datangan hagan maulah liputan sacara langsung wan bahabaran ka saluruh Malaysia. Dewan Banjar Kerian sasain bajajal awan urang. Ramai urang nang tapaksa badiam di luaran wan muhara lawang batutunjulan. Patandingan pugaan diulah nangini pada paringkat saringan diumpati ramai urang. Tagal, pada paringkat akhirnya tabuat dua urang nang layak dihiau juhara bagi kataguri Bakantut Banyak Babangat, Bakantut Haruk Babangat, wan Bakantut Hangkui Babangat. Tulamak, Asid Guri wan Usin Mitak hudah basisiap sadia hagan Patandingan Akhir Bakantut nang akan diulah dalam masa babarapa minit haja lagi. Pada paringkat saringan, Tulamak, Asid Guri wan Usin Mitak nang sasaja baramian maumpati sakalinya kada tapikir ngaran tabuat ka paringkat akhir. Arai babanar, takurihing simpak. Ujar urang tutuha Banjar bajari, alang-alang manyaluk guri wadi, maraha sampai tajapai hulatnya. Tulamak, Asid Guri wan Usin Mitak baniat handak maulah nang tabaik hagan bulihi juharanya. Hadiahnya gin liwar harat wan lumayan. Juhara satiap kataguri akan balalah ka Banjarmasin, duit tunai wan piala ganal. Juharanya jua kaina akan mawakali nagari Perak bagi paringkat Kabangsaan. Banyak jua urang nang mambarii sukungan padu ka Tulamak, Asid Guri wan Usin Mitak. Bilang satabukan. “Tulamak handal bakantut, Asid Guri juhara bakantut, Usin Mitak gancang bakantut!” Bakukiciakan urang-urang nang mambarii sukungan. Tulamak, Asid Guri wan Usin Mitak wayah mandangar kuciakan ngitu asa samangat nang batuyuk didada sasain baganal. Tulamak, Asid Guri wan Usin Mitak sawat maulah saikit sanaman ringan dihiau ‘kimutan wan hajanan taguh’ sabalum patandingan ngini diulah. Hantalu bajarang, patai, jaring, bigi tiwadak bajarang antara hidangan utama dibantas Tulamak, Asid Guri wan Usin Mitak. Di Bilik A Dewan Banjar Kerian, tampaian Asid Guri wan Mail Timpas rahat balawanan hagan juhara Patandingan Akhir Bakantut kataguri Bakantut Banyak Babangat. Juri mambarii masa 30 minit wan satiap urang dikahandaki bakantut sabarapa banyak nang hingkat. Urang nang bakantut tabanyak dihiau juharanya. Kantut nang bailun wan didangar juri haja akan dikira, tagal gamat kada tadangar ilunnya kada dikira. Urang nang umpat maniring patandingan ngini tuhuk mahadangi salama 30 minit. Suasana ranai, ilun bakantutan didangari bubujur. Ada jua nang mambawai kalkulatur hagan maumpati juri mangira barapa kantut hudah bailun. Bilang kauyuhan Asid Guri mahajan kalimutnya. 10 minit awal, Mail Timpas mandahului kiraan kantut awan 3-2, 20 minit dudi Asid Guri mandahului pulang awan 7-6. Akhirnya, masa 30 minit talah. Asid Guri arai wayah dipadahi sabagai juhara awan kiraan kantut tipis 17-16. Mail Timpas kalah, tasandar di tawing. Batisnya talunjur. Muhanya marista. “Bah, kada rugi aku mambantas bigi tiwadak bajarang sapinggan bajubung,” ujarnya di dalam hati. Urang ramai baampikan kaaraian wayah ngaran Asid Guri dipadahi sabagai juhara. Gigir Bilik A Dewan Banjar Kerian. Di Bilik B Dewan Banjar Kerian, Usin Mitak rahat bajungging hagan malapasakan kantut pugaannya bagi Patandingan Akhir Bakantut kataguri Haruk Babangat. Saurang juri badiri cagat tataian Usin Mitak. Lawan Usin Mitak bangaran Usop Hirang. Usin Mitak wan Usop Hirang dibarii juri hagan bakantut ampat kali. Satiap kantut dihiut wan dinilai juri. Bau kantut nang paling haruk babangat akan dipilih dalam ampat kali kantutan ngitu. Kantut pugaan Usin Mitak kada bailun, tagal baunya bilang haruk. Mingar hidung juri mahiut. Samunyaan urang nang maniring papasingnya bakatup hidung kada taarit lagi hagan dihiut. Ada jua batuping hidung wan muntung jarubu. Mandingur sabilikan. Tumbar, saurang laip imbah mahiut kantut Usin Mitak. “Umai, mahing haruknya leh! Banyakkah bantas patai?” Takun juri. Usin Mitak takurihing baungah. Dudi, Usop Hirang pulang bajungging bakantut. Juri sabar mahadangi. Imbaham, baunya liwar haruk bainguh hantalu bajarang. Juri gin mahiut gagamat. Cagat bulu hidungnya. “Bah, sama handal! Asa manjalujuk rakungan!” Ujar juri. Arai Usop Hirang mandangar. Dikilarnya muha Usin Mitak. Imbah 35 minit, patandingan gin talah. Usin Mitak wan Usop Hirang akhirnya talah bakantut sabanyak ampat kali saurang hagan dinilai juri. Bilik B sasain baharuk. Imbah juri bapadah juharanya, urang arai baampikan wayah ngaran Usin Mitak disambat. Usin Mitak diambung ulih para panyukungnya. “Pang pang put bakul buruk, siapa bakantut bau haruk!” Kuciak para panyukung Usin Mitak. Di Bilik C Dewan Banjar Kerian pulang, Tulamak batanding awan Jali Sisingut bagi kataguri Kantut Hangkui Babangat. Satiap saurang dibarii paluang sakali hagan mahajan. Ilun kantut nang dihajan akan dinilai juri. Jali Sisingut gin bajungging. PROOTTT! Ilun kantut Jali Sisingut handap tagal sing hangkuian. Urang nang badiam jauh atawa tulian gin hingkat mandangarnya. “Sunying gagandang talingaku,” ujar juri wayah manilai kahangkuian ilun kantut Jali Sisingut. Jail Sisingut arai sambal mamusuti sisingut tabalnya ngitu. Giliran Tulamak pulang bajungging. Wayahitu parut Tulamak asa sakitan. Angin di dalam parutnya mulai bagarak mancarii saluran kaluwar. Tulamak gin hancap manarik pahinakan. Angin di dalam parut sasain baparak ka muha lawang lubang kalimut. Lima saat dudi, Tulamak mahajan sagancang hati. Matanya takijim, kaning bakaradut. PREETTT! Samunyaan urang di sakuliling takipik mandangar ilun kantut Tulamak. Balain saikit ilunnya, kada pati hangkui. Juri maitihi salawar Tulamak. Tampaian tagak balain. “Kawo bakantut atawa tacirit?” Takun juri. Tulamak asa kada nyaman hati. Dijapai salawarnya. Imbaham, Tulamak tacirit baliir. Sabalum Tulamak batulak ka Dewan Banjar Kerian, inya sawat mangilau sapiring hantalu iwak sapat barandang. “Tulamak tacirit, kada bakantut. Jadi, Jali Sisingut juharanya!” Padah juri ka samunyaan urang nang maniring patandingan ngitu. “Aku tacirit ohhhhh kadaaaaaaaa!” Kuciak Tulamak marista tadangkak. “Tulamakai! Napang kawo ngini maigaukah?” Takun Makacil Amah matan luar kalambu. Tulamak tailan. Awaknya limbui bapaluh. “Napa uma?” Takun Tulamak pulang. Diitihi jam di tawing. 11.58 malam. “Kawo bakuciak sambat ‘aku tacirit’ napang? Tulak batamus muhamu hulu len.” Ujar Makacil Amah. “Bapala, aku bamimpi rupanya!” Garunum Tulamak di dalam hati. Bisukan, Tulamak gin mangupian awan Asid Guri wan Usin Mitak di kadai. Inya gin bapadah kayapa mimpinya, samalam. “Bah, bujurkah kawo mimpi kayaitu? Aku gin bamimpi kayaitu jua Tulamakai, samalam.” Ujar Usin Mitak imbah mahirup banyu kupi hangat. “Aku gin sama. Mimpi kita sama!” Padah Asid Guri pulang. Tulamak wan Usin Mitak mandaman. Cardap Banjar ditulis: Mohd Akmal Mokhtar
Posted on: Fri, 05 Jul 2013 16:19:46 +0000
Trending Topics
Recently Viewed Topics
© 2015