Chin Mino ZERO Ihsin HERO Si Dingah Na Man ( Ready ) Zo Maw ? Kan rampi khal democracy lamzin ah a feh rero bangin, ram sung um minung pawl ih nuntu khawsakdan pawl khal a thleng danglam aw vivo a si. Tui ni khal ah Association for Southeast Asian Nations ( ASEAN ) ram 10 komkhawmin rampi hruaitulubik pawl le ASEAN si lo mi ramdang hruaitu thupizet pawl khal in ngai poimawhin thu an rel rero lai. Curuangah kan rampi hi hmailam ah cakzetin a feh rero kan ti thei lo hman ah a ding ( stop ) lo ih nuamten a feh rero ti cu kan theih a ttha. 2015 ah ASEAN ram mipawl zaten pursum lam ah zalenzet ih sumdawnnak a um ding ih ASEAN ram 9 pawl cu kan ram ah ra in nasazetin sumdawnnak an tuah thlang ding, ram sung um mipawl in teh cui zuamawknak zin hrangah kan man cia zo maw? Sumdawnnak cu ti bangin a luang ding ih zo hman ih kham theih a si lo ding. Hi thu pawl ruah tikah Chin miphun hrangah thinphanza cu a si ko, sumpai kan nei lo, thiamnak le theihnak kan nei lo tikah mi kuthnuai ih hna ttuan hlawhawk ding lawng a tang thlang aw, curuangah thin a nuam lozet. Asinan tu ni ah can ttha kan nei lai, thinnau ding kan si lo, kan umnak cio ah zuamnak thawn kekar ding kan si, Bible zirtu in pum cawmawknak tlak dingin zir ding, Business lam zirtu khal hi pum cawmawknak dingin zir ding, Political Science zirtu khal in cu thotho a ttul. Doctor, Engineer khal cu thotho cu a si ttul. Cuti lawngah hmailam kan ton dingmi hi raltthazetin kan tong dingin kan neh thei ding a si. Cule Chin mino tamzetin kan tuah dingmi cu khui ram le khui hmun nuam khal ih kan um tik ah kan thinlung sungah Chinram hi um ring ring hramseh. Ccucu na ti dingmi le ka ti dingmi a si. Cuti lawng ah Chinram cu a thin a nuam ding ih hmailam ah ruahsannak thawn ke a kar thei ding. Ziangahtile Chinram hrangah Chin mino pawl an um lai ti hi a thei ring ring ruangah. Chin mino pawl in ramthukhel ( Politics ) khal kan zir a ttul, kan ruah a ttul ih tuah ding khal a si. Pathian thu lawng lawng in rampi hi tthangsozet le dikzet ih hruai khal a theih cuang lo, rampi ih ttulmi sawn cu rampi thu feh dan lamzin theitu pawl ih tuah ttuannak sawn hi a si. Cule ramthukhel hi zovek khal ih tuah theih a si, zir theih khal a si. Kan rampi khal ah an zir vivo zo. Miliam pawl lawng ih tuah ding a si lo, Mifim zirsang pawl lawng ih tuah ding a si lo, ram mi sinak neitu zate ih tuah ding a si, cucu kan covo diktak khal a si. Pastors pawl ih tuah ding mi a si lo ti khal a si lo, pastors pawl khal in miphun duhdaw tu an si ahcun a diknak zawn ah raltthazet ih ramthukhel an tuah ding mi sawn a si. Curuangah Bible sung ih kan siar ttheu vekin ziangtin kim nan tuah tikah Pathian sunlawinak hrangah tuah uh a tivek in kan zirnak, kan theihmi le tuahmi pawl hi Pathian hrang le miphun hrangah ih sunlawinak le tthahtnak si ding ih kan tuah ding hi a si. Cucu kan tuah hrim hrim dingmi khal a si. Anetnak ah kan rampi hi a thlengaw rero mi can ( transitional period ) ah kan si ih hmailam ih kan hmuh leh thei ding cu simrel dik a harzet. Dunglam ah a kir ding maw hmailam ah kan pan vivo ding ti hi tulai mithiam pawl khal ih an buaipizet mi thil a si. Ziangkhal sisehla Chin mino pawl ih kan zir le tuah ttulzetmi pawl tar lang sehla. 1. Political Science 2. Social Science 3. Human Rights 4. Transitional Justice 5. Democracy le Federalism 6. Constitutional Reform le a dang subjects thupizet zir ding a tamzet ding. Asinan hi a tlun ih tarlan mipawl hi kan rampi thlengawknak ding ih kan tel duh a si ahcun kan zir le theih teng teng ttulmi an si. Tui ni ah kei khal zero in ka zir thok ve a si, kan theih cio vekin kan ram ah hivek subjects pawl kan zir dah lo tikah zero ih zirsal a ttul. Asinan na beidong hlah aw Chin mino, tui hi ih HERO pawl khi ZERO ihsin zirtu pawl an si. ZERO ngan na thiam ta locun HERO cu na si thei dah lo ding. Chin mino ZERO ihsin HERO si ding ah na man ( ready ) zo maw? Lungawi
Posted on: Wed, 12 Nov 2014 16:48:17 +0000
Trending Topics
Recently Viewed Topics
© 2015