Djabièrnè 2 di ougùstùs 2013 den oranan tempran di mainta a drenta un informashon na Warda di Polis Otrabanda ku riba e tereno di Colon na Otrabanda un hòmber lo ta hinkando un señora ku kuchú. Patruya di Otrabanda mesora akudí na e sitio pero na nan yegada ya e sospechoso a bandoná e sitio. Nan a topa ku e señora víktima di 49 aña di edat ku vários hinká i skèrf na su kurpa i tabata sangrando bastante. Patruya a transportá e dama pa poliklínika pa tratamentu médiko pa e heridanan ku e tabatin na e.o. bèl di pia, brasa, frenta i orea. Despues di tratamentu a bai warda kuné pa sigui ku e investigashon. For di e investigashon a resultá ku aki ta trata di un pareha ku resien a separá for di otro. E hòmber E.J.J., nasé na Kòrsou, di 50 aña di edat, awe mainta a bai buska e señora na porta di skol den área di Otrabanda na unda yunan di e señora ta bai skol, pero no a topa ku e señora. El sigui buska den besindario i a bin topa e señora ta kana riba tereno di Colon. Aki E.J.J. a saka un kuchú i hinka e señora na vários parti di su kurpa. Despues di su akto e sospechoso a bandoná e sitio. Polis a bai en buska di e sospechoso i alrededor di 8.35’or di mainta a bin topa kuné pará na un snèk den Piscaderaweg. Den su saku di karson e tabatin e kuchú ku probablemente el a kometé e akto kuné i a konfiská esaki. A detené e sospechoso E.J.J. i a present’é dilanti di un fiskal ouksiliar ku a ordená su enkarselamentu pa mas investigashon. E investigashon ta kontinuá.
Posted on: Fri, 02 Aug 2013 23:48:30 +0000
Trending Topics
Recently Viewed Topics
© 2015