ELOMZALI ALIWELI PHANSI 12 Kusenzeka kanje abantu basebethwelamehlo ,sebebukele lokho okwasekusenziwa nguVela umuntu eseqa abambe lapho lalapho. Umfana wayengaselandaba lokuthi abeqembu likaEva babekhona babezabona ithumbu lakhe wayekhipha kuphela kwazise wayesizwa lukhulu. Ngale uSiziba umakhanda,wayelokhe ekhangele phakathi kwebhavunyana eyayilamanzi wasefaka isibuko kanti njalo konke okwakusenziwa nguVela wayekubona ahleke aze alale phansi uSiziba ebona uVela ngesibuko sakhe. Wathi esekhanda futhi uVela wayengasekho lapho,wonela ukubhoda ngemva kwebhawa wakhulula ibhulugwe wasala ngentenhene wadla phansi umfana ithumbu lilwapuzela kuphela egwedla eqonde ngakibo. Umfana madoda wayezenzizinto kodwa isimanga wayengelasibindi sokuzimela lezozinto. Bathi abaziyo oginya amaganu ngolomphumelo obanzi,kanti pho Velandini wena ke okwasekukwehlula yikuphi nanko phela wagijima waze walahla ibhulugwe umfana eqonde kunina. Wafika wazithela phakathi emkulwini umaDube ehlezi labantwabakhe abangamankazana bathi bebona umhlolo baphuma bebangisana. Mama,ngafa mina kubuhlungu lapha, lapha mama,nguVela lowo, ngemva kukanina ongazange abaleke okuyaphi ngoba kwakungasavumi esemdala. Unina wavala amehlo ngesandla wasephosa izambiya yakhe umfana wathandela basebekhuluma. Kuyini Vela,sekutheni usuhlanya yini utshele abantu bakuhambise kubosiyazi?. NgumaDube lowo ngokumangala. Mama kubuhlungu lapha,la kubuhlungu bakithi sizani phela ngingafa?. Namuhla awusatsho ukuthi masalu usungibiza mama sekutheni,ngatsho mfana ngathi uzahlangana labosowenu. Sebekwenzile abaziyo uzayifunda ivaliwe ibhayibhili mfana wami nxa ungabazi abantu. Mina pho ke ngizakusiza ngani ngingasi nyanga noma umbholofitha kodwa lokhu. Ngabe walalela amazwi ethu abadala ngabe konke lokhu awukuboni. Ube ufundile ke ndodana ,Elomzali aliweli phansi njalo inyembezi zomzali wakho ziyakuthelela amabhadi. Uyihlo wafa ekhala ngani bafana bami alikakuboni kukhulu okuzayo ngiqinisile?. NgumaDube ebhula izidwaba laye esetshe amathe umfana ekhala ngosizo. Ngabe umaDube wayeyinyanga noma engumthandazi wayezamsiza umfana wakhe phoke wayezazela isihaqa lesinyayi kuphela nje zwi. Kasazange apholise amaseko umuntu wakoDube waqhubana lomntanakhe belubangise enyangeni ayeyazi khonale eMlowezi. Inyanga yafike yabhula yathi abayelabhela koSiziba. Bathi sebebuyela uVela wabona sebephuzile ukuthi bayefika ayebonana loSiziba axolise indoda lendoda ngobuso. Ngabe wayehamba yedwa wayezahamba egijima okwenqina livuswe yizinja esixukwini phoke lokho wayehamba lesalukazi esingunina iqolo elalingasasivumeli ukuthi sigijime. Lakhona ukuthi atshiye unina kwakungenzi nanko phela impisi yayisidla umniniyo sekumnyama tshu. Bangcenga baze bayafika kodwa ke bafika sekuzakusa kwazise wawumkhulu lowo mango. UVela kasazange alale wilinda kwakhanya wangena eya koSiziba. Wathola besalele ngoba nje mhlalokho kwakungolwesithathu kungayiwa emasimini. Wafike walinda ephambi kwendlu kaSiziba, umdala wathi evuka wathola uVela ethe kho okomthakathi obanjwe yizikhonkwane zomuzi.*** Asiphinde sihlangane njalo kusasa. Abaphile abantu kuwowonke amagumbi amane omhlaba ngoJesu Amen. Watch out for chapter 13 Pls like and share my page Mathanzima Dube - Writer/Ndebele Novels
Posted on: Fri, 31 Oct 2014 17:40:01 +0000
Trending Topics
Recently Viewed Topics
© 2015