Eling kudu tansah semende marang pepesten. Eling kudu tansah pasrah ing Allah. Eling kudu rumangsa mung dadi titah. Eling kudu rumangsa saderma nglakoni. Eling kudu tansah sabar narima. Narimo ing pandum. Eling kudu tansah lila legawa, bisa gawe seneng atine liyan. Eling kudu mulat salira/tepa slira. Eling kudu welas asih ing sapada - pada, nguwongke wong. Eling kudu bisa ngregani marang liyan, sumanak lan sumadulur. Eling kudu ngerti lan tansah nganggo tata krama, tata susila, unggah ungguh, tata basa. Eling kudu tata, tangguh, tanggap, tanggon, alon - alon waton klakon. Eling kudu taberi, nastiti, ngati - ati, tlaten. Eling kudu tansah ngugemi janji, ora mencla - mencle. Eling kudu seneng tetulung, seneng dedana marang kang merlokake. Eling aja nganti lali marang Gusti Allahe. Eling aja gawe seriking liyan. Eling aja kumentus, umuk, keminter, arep menange dewe. Eling aja dumeh, sumakeyan, adigang, adigung, adiguna. Eling aja nguthuh, mbeguguk nguta waton, srakah, dremba, kemaruk, aluamah, ngangah angah, ngaji mumpung. Eling aja gampangan, gumunan, bingungan, gampang gumuyu. Eling aja ngaya, ngangsa, nggresula. Eling aja kurang ajar, dahwen, juweh, drengki, srei, jahil metakil. Eling aja ma lima, madat, main, madon, mangan, maling. Eling aja nganti kliwatan seneng, kliwatan susah utawa samubarang kang kliwat wates. Eling aja gawe kapitunaning liyan, clemer, colong jupuk, laku juti, ngapusi. Eling aja grusa - grusu, aja briga brigi, ngawur. Eling aja dadi tukang goroh, cidra janji, ngapusi, mlincur. Eling sing sapa ngapusi bakal kaweleh. Eling wong urip bakal mati. Eling sing sapa nandur bakal ngunduh. Eling sing sapa salah mesti bakal seleh, sing goroh growah. Eling sing becik bakal ketitik sing ala ketara. Eling wong urip kudu samad sinamadan. Eling jer basuki mawa beya.
Posted on: Sun, 23 Jun 2013 16:45:17 +0000
Trending Topics
Recently Viewed Topics
© 2015