FUN. New York City a inkulh, indie pop band Fun. hian chuti teh chiamin hriat an hlawh ngai lem lo a, mahse 2013 Grammy Awards ah an hla pakhat ‘We are young’ chu Song of the Year atan an thlang a, hei mai hi a la ni lo - Best New Artist atan thlan an ni bawk a, mi tam zawkin an hmelhriat ve phah ta a. ‘Record of the Year’ nomination hmu mahse tluk loh an nei ta hlauh a ni. He band hi vocalist Nate Ruess chuan 2008 khan The Format chhuahsanin a din a, multi-instrumentalist Andrew Dost (Anathallo a tel thin) leh guitarist Jack Antonoff (Steel Train a tel thin) te chu sawmin bul an tan ve rawih mai a. Rimawi lama mithar an ni lem lo bawk a, hla an phuah nghal char char a, August 25, 2009 khan an album hmasa ‘Aim and Ignite’ chu an tichhuak nghal zat a. ‘Aim and Ignite’ hi Sputnikmusic Top 50 albums of 2009 ah 26 na niin, US album chart ah 71 na a ni bawk a. Fun. hian band hrang hrang an zui ve nual a - Paramore, Panic! At the Disco leh Jack’s Mannequin te chu a langsar zual an ni a, Expedia faknaah an hla ‘Walking The Dog’ an hmang bawk a ni. November 7, 2011 khan album thar an buatsaih thu an puang a, February 21, 2012 khan an album pahnihna ‘Some Nights’ chu an tichhuak a. An album tilar tur hian North American tour an nei zui nghal zat bawk a. March 7, 2012 khan an single ‘We Are Young’ chu Billboard Hot 100 chart ah No. 1 a ni a, December 2001 hnulama a vawikhatna atan hla tharin No. 1 dinhmun a luah theih leh hmasak ber a ni a. A hmain Nickelback hla ‘How You Remind Me’ chu hetiang dinhmunah hian a lo ding ve bawk a ni. ‘We Are Young’ hian kar 6 chhung zet chu Billboard Hot 100 ah hian dinhmun chungnung ber a luah zui a, kar 7 chhungin vawi nuai 3 chuang an download hman hial a, hetiang taka hla download nasat hi a la awm ngai lo nghe nghe a ni. He hla hi a lar ang huin a rawn pianchhuah dan erawh a ho angreng phian lawi a. Vocalist Nate Ruess chuan a hla thu hi zan khat, a ruih deuh tuma a thil tawn atanga a phuah chhuah a nih thu sawiin, “Ka hun tawn tawhah chuan ka la ruih ber zan ania. Taxi in ka haw a, a chhungah ka luak teuh mai a, taxi driver chuan min pet chhuak lehnghal a. Chuan man min dil pawhin bang kilah ka ding a, ka lu chuan bang chu ka nawr ran mai a, a bak chuan ka che thei tawh lo hrim hrim. A tukah pawh ka la harh chiang lo nileng a ni ber a, tlai lamah chuan hla thu hi ka ziak thei ve chauh,” a ti. A thu ber a awm takah chuan a thluk an siam zui leh vat a, chutah he hla bik atan hian American Alternative Soul singer-songwriter Janelle Monáe an sawm tel bawk a, an han tlangzarh chiah chu khawvel a deng chhuak chiang hle a, anni pawhin an beisei phak bak a ni tih an sawi hial. ‘We Are Young’ hi Pop, Rock leh Alternative chawhpawlh niin, Elton John, Queen leh Ben Folds Five tih vel lo ngaisangtute chuan an duh hle mai a. A tirah chuan hla hi drums leh piano in a kaihruai hnem hle a, second 50 hnu velah chuan a style an thlak leh a, arena-rock song lam a hawi leh daih thung a. A hla hi a fuhna em em chu zawm deuh dual dual rem chi a nihna hi a ni. A thluk a fuh bawk a, a lar chak hle a. TV series Gossip Girl, 90210, Glee leh Chuck te bakah fakna - Chevrolet leh Apple tih velah te an hmang a, Judd Apatow film This Is 40 trailer ah pawh an hmang bawk a. 2011 Pacific-12 Football Championship Game ah pawh an hlapui berah an nei bawk a. Hei bakah hian 2012 chhung khan Facebook lama hla ngaihthlak hlawh ber a ni bawk. An single dang pakhat ‘Some Nights’ pawh a dinhmun a chhe vak lo hle a, June 2012 khan an tichhuak a, Hot 100 ah pathumna a ni phak a, United States ah platinum dinhmun a thleng pha bawk a ni. An album ‘Some Nights’ ah hian style hrang hrang an chawhpawlh nasa hle a, a tlangpuiin indie pop, theatric rock leh hip-hop lam an hrut ber a. ‘We Are Young’ ah khan an album-a hla hrang hrang style chu an zep kim thawkhat viau niin guitarist Jack Antonoff chuan a sawi. “Kha hla kha kan tan chuan a laimu ber a tih loh theih loh a. He album buatsaihna kawngah pawh hian a bulpui ber a ni chiang a. He hla hi a pawimawhna em em chu mi hnena kan puanchhuah duh ang zawng zawng kha a keng kim nghal vek a ni,” tiin Jack hian a sawi. Janelle Monáe chuan Fun. nen an thawhdun chungchang hi sawiin, a album ‘Archandroid’ kha Fun. member te hian an ngaisang hle niin a sawi a. “A tlangpuiin midang hi ka thawhpui zen zen lo a, mahse an hla min rawn thawn khan ngun deuhin ka ngaithla a, ka beisei sang khawp mai a. We Are Young hian mi tam tak thinlungah hmun a chang nghet thei dawn a ni tih ngaihdan kha ka nei nghal a ni,” a ti. Rimawi khawvela a zuanluh hma hian lead singer Nate Ruess hi law firm ah a thawk thin a, a patea chu Broadway performer ni mahse Ruess hi chu zai a zirtir ngai lem lo a. Tlema Ruess hrechiangtute chuan rimawi khawvelah hlawhtlinna hmel a hmuh an beisei loh thu an hrilh thin a, mahse Nate hian an sawi chu thudikloah a chantir ta a ni. Fun. an din hnu hian recording contract ziahpui tur an zawng nasa hle a, Nate hian Hip-Hop producer Jeff Bhasker chu hmuh a tum thin a, vawi 2 chu Jeff hian a lo hnar tawh a. Hei vang hian New York City a bar pakhatah Nate Ruess hian Jeff Bhasker hi a dangbet lui tawp a, Jeff pawh chuan minute 10 hun pek a intiam ve ta nge nge a. Hemi tum hian Nate chuan ‘We Are Young’ thunawn chu Jeff hi a ngaihthlaktir a, Jeff Bhasker chuan Fun. ho chu studio luhpui vat a tha tih ngaihdan a neih phah a ni. Band an din tirh hian tum bik em em an nei lem lo tih sawiin, guitarist Jack Antonoff chuan an hla te chu miin an ngaithla ve a nih phawt chuan lungawi an tum thu a sawi a. “Mi engzatin nge ngaithla ang tih lam kha chu kan vei vak lo, mi 100 an ni emaw, mi 10,000 an ni emaw, an lo ngaithla ve hrim hrim a nih chuan kan lawm tawk ang kan ti thin,” a ti. ‘Some Nights’ album a hla thu tam zawk hi chu an singer Nate Ruess-a te chhungkaw boruak behchhana phuah a ni hlawm a. “Eng thil pawh ti ila, ka rilruah ‘Tunge ka nih a, eng vanga ka thil tih lai hi ti nge ka nih’ tih zawhna hi a awm reng a. Heng thil zawng zawng hi ka chhungte vang a ni tih ka ngaihtuah chhuak thin a. Hetiang taka ka thinlunga kan chhungkua a tlak nat avang hian hlaa phuah teuh mai hi ka duh dan a ni,” a ti a ni.
Posted on: Wed, 19 Jun 2013 09:32:50 +0000
Trending Topics
Recently Viewed Topics
© 2015