Grasia ta un di e kapasidatnan di Dios ku semper bai ta aktivo. Grasia di Dios ta grátis i algu ku Dios ta duna inkondishonalmente. Bo mester mira grasia di SEÑOR komo e wowo di Dios ku ta mira solamente loke ta bon den bo, hasta ora bo mes no por mira esei. E man di Dios ku suavemente ta limpia e lágrimanan di bo wowo. E bos di Dios ku ta papia kubo den bo momentunan di soledat i ku ta hibabu na bon akshonnan. E pensamentunan di Dios ku ta penetrá bo mente, generando ideanan kreativo presioso. E orea di Dios ku ta skucha bo súplikanan den orashon, sin tene kuenta kon kòrtiku òf largu bo orashon ta. E mannan di Dios ku yen di amor ta brasabu ora bo mester di sosten. E milager ku a sanabu ora tur siensia a bisa ku bo no por kura. E kadena ku a trese dos kurason bek na otro, ora hende a bisa ku no tin rekonsiliashon. Ku no tin hasimentu di bon. E ta sonrisa di Dios ora bo bis’E , “danki SEÑOR”. Grasia di Dios ta e parti di Dios ku ta konmovebu dje profundo ei, ku bo no tin palabra pa deskribí esaki, pasobra Su grasia ta trasendé kualke palabra òf pensamentu. I tòg, grasia di Dios ta un kos real. Mas real ku hopi kos ku nos konosé den bida. Pa grasia di Dios, e gran mayoria di nos a lanta bibu awe; ta bai drumi awe ku e speransa di un mañan mihó ku awe. P’esei bisa awe: “Mi ta gradesido pa e grasia di Dios ku ta hasi milager den mi bida”. (Loke ami a siña di bida)
Posted on: Fri, 21 Jun 2013 02:56:06 +0000
Trending Topics
Recently Viewed Topics
© 2015