Hi Bongani Aritaveeeleni Chuma Ku tlangeriwa ka nhenha leyikulu emisaveni Tatana Nelson Mandela swi ya emahlweni hi mintlangu leyi yi nga ta va hi Mugqivela 17 2013 eFNB Stadium. Matimu ya ta endliwa ro sungula loko hi vona swipano swa rixaka swa bolo ya milenge na ya rugby swi tlanga erivaleni rin’we hi siku rin’we. Siku leri ra matimu ri ya tiveka tani hi Nelson Mandela Sports and Culture Day leyi yi nga ta khomiwa lembe rin’wana na rin’wana. Bafana Bafana vs Burkina Faso. Mabokoboko vs Argentina. SA Legends vs Italy Legends. Mintlangu leyi yi ta landzeriwa hi vunanga bya tinqambi ta laha kaya na va le ntsungeni wa malwandle. Hi ri mi nga kayeli. Bafana va hluriwile hi Nigeria 2-0 hi Ravunharhu eka ntlangu lowu va nga tikomba ku tsandzeka ku howisa na ku pfumaleka ka ntokoto eku sirheleleni exikarhi ka Tower Mathoho na Thabo Nthete. Vona Tukelo Rantie na Parker ku katsa na vatlangi va le xikarhi va ta fanela hi ku lota matlharhi ya vona ku ri hi ta vona tigolo. Ku pfumaleka ka vatlangi va Orlando Pirates naswona swi ve na xiave eku hluriweni ka Bafana hi Nigeria. Eka mintlangu ya 6 hi nga yi tlanga na Burkina Faso hi hlurile kanharhu hi hluriwa kan’we. Ntlangu lowu wu ta tika hikuva va na fomo ya kahle endhaku ko fikelela ti fayinala ta 2013 Afcon nakona va tile na xipano xo tiya swinene. Bafana va fanela ku tikomba leswaku va tlanga ekaya hikuva va nga kombeti ku hlonipha xipano lexiya. Ndzi navela ku vona Gordon a nga chavi ku cinca loko swi nga fambi kahle. SWI TA TIKA SWI NGA RHWALIWANGA. Orlando Pirates yi ta dya byi horile nakambe. Minkitsikitsi ya le Egypt yi ya emahlweni yi dlaya ntlangu wa bolo le Egypt. Zamalek leyi nga na matimu lamakulu e Afrika, laha yi nga tshama yi humesa Kaizer Chiefs eka Champion League hi 1993, sweswi liki ya vona yi yimile nakona a va kumi mali ku suka eka liki ya vona. Leswi swi endla leswaku va nga koti ku holela na vatlangi na mudzaberi loyi sweswi a nga tshika a tlhelela e Brazil. Va lahlekeriwile hi vatlangi vo fana na Sabri Rahil, Ibrahim salla na El shannawy. Pirates yile malembelembeni ya logo hi 4 wa tipoyinti lero loko vo hlula va ta va va ri kusuhi swinene na ti semi-final xikan’we-kan’we na xinyeletani xa vumbirhi. Hambi leswi Collins Mbesuma na Thandani Ntshumayelo va nga vaviseka Pirates va languteka va lulamile swinene loko hi langutisa na vo Lennox Bacela na vo Andile Jali leswi va nga fomisa swona. A ndzi kanakani ku ri Pirates yi ta hlula loko Roger De Sa o kota ku hlasela ku suka eka minete wo sungula. Lowu hi wona nkarhi wo tlangela nhenha......
Posted on: Fri, 16 Aug 2013 14:51:11 +0000
Trending Topics
Recently Viewed Topics
© 2015