INTHAWINA AIIN THUAWIHNA A PAWIMAWH ZAWK Hmeichhe naupang Judithi chuan a pa pek tangkaraw thi (silver necklace) chu a duh em em mai a, a mut lai leh a inbual lai pawhin a phelh phal lova, englai pawhin a awrh reng mai a ni. Ni khat chu a pa’n a ko va, “Bawihte, min hmangaih em?” tiin a zawt a. “Aw, ka pa, ka hmangaih che, “ tiin a chhang a. “Ti tura ka hrilh apiang che thuawih takin i ti duh ang em?” tiin a pa chuan a zawt leh a. “Aw, ka pa, ti tura min duh apiang chu ka ti ang,” tiin a chhang a. Chutah a pa chuan a silver necklace chu kang ral vek tura thuka paih turin a hrilh ta a. Judithi chuan mak a ti em em mai a, a fiamthu mai mai emaw a ti a. Mahse, a pa chuan a ti tak tak tih a hriat chuan a thi chu a phelh a, meiah chuan a paih lut ta a. A ui lutuk chu a mittui a tla zawih zawih mai a. Ni a ral a, thla a ral a, Judithi chuan a thi chu a ui em avangin a nun pawh chu a ngui riai mai a. Mahse, a pa lakah chuan a vui duh miah lo va, thuawih takin a awm zel a, tun hma ai mahin a pa chu a ngaina zual a, a pa bulah chuan awm reng a duh a, a pa chu a kawmngeih zual sauh a. Chu chuan a pa chu a tilawm em em mai a ni. Kum khat a ral ta a, Judithi birthday chu a lo inher chhuak ta a. A pa chuan bawm te reuh te hi birthday gift atan a pe a. Phur deuhin Judithi chuan bawm chu a hawng a, a chhungah chuan a rin loh deuhin rangkachak thi (gold necklace) nalh leh man to em em mai chu a lo awm reng chu niin!!! A lawm lutuk chu a au vak vak a, thi awrh chung chuan a pa chu a kuah chuk chuk a, lawmthu a hrilh mawlh mawlh a. A pa chuan, “Ka thu awih avanga i thi duh tak i rawh ral phal leh rawh ral tura ka hrilh che avanga ka lakah thinrim duh miah lova min ngainat phah zawk avangin ka lawm em mai a, he rangkachak thi hi ka pe che a ni,” a ti a. Joba anga, “LALPA’N min pe a, a la leh ta a ni, LALPA chu fakin awm rawh se,” titute tan Pathianin engmah ui a nei ngai lo.
Posted on: Tue, 03 Dec 2013 16:31:40 +0000