IS HELHAI BEINAA ARAB STATE-HAN US AN THLAWP DING Arab ram 10-hai chun US-in Iraq le Syria-a Islamic State helhai a beinaah US an thlawp ding thu an hril. Arab ram thuoituhai chun Saudi Arabia-a Jeddah-ah meeting neiin, US Secretary of State John Kerry khawm a thang a, Arab ramhai chu helhai beiletnaah thang dingin a fiel a ni. Meeting zoa an thusuok siemah chun, Arab ramhai chun Islamic State helhai beiletna kawngah a thei angin an thawk ve ding thu an tarlang. Meeting-ah hin Saudi Arabia, Bahrain, Egypt, Iraq, Jordan, Kuwait, Lebanon, Oman, Qatar le United Arab Emirates an thang a ni. Turkey khawm thang ve sienkhawm, thusuok an siemnaa ruok chun a thang ve naw. Zani khan Turkey ram thuoituhai be dingin Kerry chun an ram a pan nghal. Arab ramhan helhai an beiletna dingah hin Iraq le Syria kawl vel rama inthawkin IS pawl zawm dinga lut ding hai lo dang, ISIL le an zawmpui hel pawlhai sum chetvel ding lo dang, midanghai theida zawnga thu an fepuihai hnawlpek a, ISIL leia ngirhmun tium a um ram, thangpui tihai a huom a ni. US official chun Arab ram thangruol laia Turkey a thang ve naw chu asan tha tak a nei niin a hril a, Turkey mi 49-hai chu IS hai hin an hreng mek a, hi lei hin Turkey hi ngirhmun inkhir taka a ngir mek a ni. Helpawlhai beiletna kawngah Turkey chu thawpui dinga pawimaw tak ni sunzawm pei ati, a ti. Hienglai hin Central Intelligence Agency (CIA) chun IS helhai hi a hmaa an lo ringlawk nekin a let thum zetin an tam a ring thu a hril. Iraq le Syria-ah helhai hi 10,000 vel an um ring a ni laiin, CIA chun 20,000-31,500 vel an tling niin a hril thung. Hieng laia 15,000 chu Syria-ah umin, ramdang mi, a bikin khawthlang tienga inthawka hel pawl zawmtu hi 2,000 vel an tling nia hril a ni bawk. IS helhai hin tulaihnaiah Iraq hmartieng le Syria-ah ram lien tak an laka, ram lak sa pei tumin an bei mek a ni.
Posted on: Sat, 13 Sep 2014 10:27:20 +0000
Trending Topics
Recently Viewed Topics
© 2015