India fights back fight back teng: Mizoram ei tur buhfai chawk luh tumin kan supply minister Burma-ah a zin chho. tihin bul han tan daih mai ila a thupui nen a inmil awm lo! Tun hnaiah mipa pakhatin a chhung leh khat hmeichhia khawnvartuiin a leih a, a hal tih thu chanchinthar lamah kan hmu a, a pawi khawp mai. Ka rilruah mizote hian eng tik lai atang nge hetiang tih hi kan chin tih lam a lo lut daih a. Ka hriat sual loh chuan mizo society-ah mimal hmelma emaw thisen zawmpuite emaw khawnvartui/petrol-a theh a hal dur dur ching hi ka la hre ngai lo. Khaw dang chu ka hre lo a, Kasauti atanga Kum Kum, Mein Ho Na atanga Shavdhan India in tin maia kan en rik chuah chuah atanga hetiang tih nachang hria hi kan ni ang em? Heng serial chhungkua kuaa zankhaw tairek thlenga kan en thin hian kan khawtlang leh kan fate ngeiah pawh eng nghawng nge a neih ang tih hi ngaihtuah tham a ni. Vaiah pawh a chekhnawk ho, a awmthei pawl pawh ni se Ram-a leh Hanuman-a aia sum Pathiantute chanchin chhe ber ber lai ang phuaua en thup zel hi eng nge a tangkaina ni ang aw ka ti. Puitling tan chuan a la zia deuhah ngai hram ila, pain a fanu nawhchizuar tura a tirh luih thu, pain a mo pawngsual thu, mahni pasala naute thah thu, unaua ro inchuh vanga tura inhrai hlum thu tih vel ena ngaihthlak fo mai hian naupangah eng chi nge a tuh ang aw? Vai telh telhna, a sap tawngin, Vaiism hian mi hi a luhchilh thuk tawh viau a ni ang, thalai khawmpui drama-ah te hian kan stage zahawm tak takah vai hla, vai lam a ri chhung chhung ta fo mai. Kut benga kan nuih hluah hluah lai hian chhungrilah min luhchhuah viau tawh tihna a ni long maw? Vai huata huat hrim hrim tur tihna lam chu a ni lo, mahse kei ka ngaina lo a ni. Kan dam ang a khawvela ek in thui ber rel kawng pawh mizoramah a rawn lut thuai dawn a. Hma kan sawn sawt ang nge kan phakar sawt ringawt ang tih pawh hi ngaihtuah tham a awm. Hmasawnna hi transportation vang nge rorelna dik vanga awm tur ni ang. Vai hrim hrim, ka hmuh ve phak chin hi chuan Ram-a leh Hanuman-a aiin pawisa hi an Pathian zawkin ka hre tlat! Khawvela pa hausa ber Bill Gates-a te nupa din Bill & Melinda Foundation chanchin a khat tawka kan hriat fo chu midang an tanpui thu a ni. Dollar maktaduai tel hi ram hnuaihnung leh harsatna tawk tan vawi tam an theh chhuak tawh a. Tun laia hri lar Ebola beihna atan pawh dollar maktaduai 500 an pe leh tawh. Heti chung hian a hausa ber chu an la ni reng tho si. India hausa ve ho hi- Tuna Reliance Company tia kan hriat lar hi kum 1966 vela pu Dhirubai Ambanian a din a ni a. Kum 2005-a a thih khan a fapate pahnih Mukesh-a leh Anil-a inkarah neuh neuh a awm nghal zat mai a. An nu, pi Kokilabenin theihtawp a chhuah hnuah a pa thihsan ro chu an insem thei ta hram a, an kal hrang ta. Hetia an intei tet hret hnu pawh hian pu Ambani-a chu India rama pa hausa ber a ni zui ta tho a. Khawvel huap erawh chuan 41-na te a hauh thung. Mumbai-a a in, Antilia tia a vuah chu khawvela in man to bera sawi a ni. Ani bakah hian khawvel pum huapa hausak lama 49-na te ni zuk zuk pu Lakhsmi N Mittal-a te pawh an la awm bawk. Reuters tarlan danah chuan India mi hausa hi an kawm hle tih a ni tawp mai. Charity zawnga an hming a lan chuai chuai hi hriat tur a vang. Bible thu awiha, I kut lehlamin hre suh se. tih vel lai kha an lo nunpui ru viau a nih chuan le kan hre phak lo ni se la. Nau hnuchham chawmna lam an vei viau thu hi ka la hre lem lo. Hei hi vai zia, Vaiism chu niin kei chuan ka hria. August, september thla chhoah khan Kashmir-ah tui a lian a, ram hruaitute lu tihai khawpin chhiatna a thleng a. Hengah pawh hian India rama mi larte leh mi challangte chet chhuah thawm hriat tur a awm lo khawp mai. Cricketers leh Bollywood star ten football match an khelh tuma fet zet, Salman Khan-a berin rin loh zetin Rs. Nuaih 50 a rawn sik chhuak hlawl a, a tiropui khawp mai. A enga pawh chu ni se kei, Vaiism hi ka lawm fahran lo a, a theih ang anga Mizoism hi chawi nun zel hi ka duhthusam a ni. Dikna, rinawmna leh taimakna te, Finland ho chauhin a tlukpui thumal (Sisu) min neihpui Tlawmngaihnate, ram hmangaihna thinlung nen hma lam i pan ang u. Ram leh hnamte hi Anthurium Kut (Dawl Par Kut emaw ni zawk) a, Teuh lo mai, a teuh lo mai! tinam hum hum chunga humhalh chi pawh a ni chiah lo. Nunah a awm a ngai.
Posted on: Tue, 07 Oct 2014 06:04:47 +0000
Trending Topics
Recently Viewed Topics
© 2015