India team-ah Mama leh Didika India National Coach Wim Koevermans chuan Tajikistan nena friendly match an khelh hun ami tur player 20 a thlang fel tawh a, Mizo player pahnih Lalrindika Ralte (Didika) leh S. Malsawmtluanga (Mama) te an tel ve a ni. India hian August 14, 2013 hian Khujand,Tajikistan-ah Tajikistan nen friendly match an khel dawn a, India team hian August 9 hian New Delhi atangin Tajikistan an pan ang a, August 16 ah India rawn an let leh ang. India team hi Bangalore-ah an tlang dawn a, SAFF Championship atan Preparatory Camp an nei nghal ang. Hetah hian player dangin an rawn zawm leh bawk ang a, anmahni rawn zawm leh tur player-te erawh puanzar an la ni lo thung a ni. Wim Koevermans hian a tirah player 30 a thlangchhuak phawt a, heng atang hian mi 20 a thlangchhuak leh a, Didika leh Mama an tel ve a. Mama phei hi chu senior team-a a vawikhat telna a ni nghe nghe. Tin, Mama mai bakah East Bengal defender Arnab Mondal leh Sporting Clube striker Dawson Fernandes te chu senior team-a an vawikhat telna ve tho a ni. Chutih rualin probables-ah hian Mizo tlangval Jeje Lalpekhlua awm mah se a inhliam fo avangin season liamta khan match a khel tlem hle a, hei vang hian Coach paw’n a awltir rih niin a lang a, SAFF Championship-ah erawh a tel ngei tawh a beiseiawm. Jeje bakah India goalkeeper rinawl Subrata Pal leh AIFF Player of the Year Syed Rahim Nabi -te chu squad-ah an tel lo bawk. India leh Tajikistan inkhel turin ESPN lam chuan live-in an pechhuak mai thei a, ESPN lam hian Tajikistan FA lamin phalna an pe anih chuan live telecast an duh thu an sawi a ni. Mama kan lawmpui e Mama hi Senior team-a a vawikhat telna niin ZoFooty chuan a lawmpui hle a. India tan junior level-ah a fehchhuak fova nimahsela senior level-ah erawh a fehchhuak meuh lova. Proabables-ah han telin beiseina sang tak nei thin mah se chhawk a ni leh thin a. Beisei tawh lo hnu tih theih turah Pathianin Mama leh football hmangaih tute tawngtaina a chhang ta a ni. Zofooty chuan Mama kan be nghal a. Mama chuan heti hian a sawi. “Hetianga beisei tawh lo hnua senior team-a ka tel thei hi ka lawm a, Pathian vang liau liau a ni tih ka sawi duh a, Pathian chungah lawmthu ka sawi a ni. India ram chhung leh pawna tournament khelh theih angte chu ka khel kim thawkhat viau a, senior team squad-a ka awm avangin tunah chuan ka tum ram ka thleng a tih theih a. Mahse, hmasawn zel tur leh hei aia sang thleng turin theihtawp ka chhuah chhunzawm ang. Ka chak em em leh ka dream - India senior team squad-a awm chu ka hlen ta a, ka lawm khawp mai.” tiin ZoFooty a hrilh. Head to head Tajikistan hi FIFA ranking-ah 106-na niin India hi FIFA ranking-ah 146 a ni thung a. Tunhnaiah tum thum lai intum tawhin vawikhat ve ve an chak a, vawikhat an inhnehtawk thung a ni. An intum hnuhnun ber tum chu AFC Challenge Cup 2012 niin Tajikistan hian 2-0 in India a hneh a. Tin, AFC Challenge Cup 2008 khan Group khatah awmin group stage-ah an inhnehtawk a, final-ah intum lehin 4-1 ngawtin India an chak a, an champion a ni. India squad Goalkeepers: Karanjit Singh, Sandip Nandy, Subhasish Roychowdhury. Defenders: Denzil Franco, Nirmal Chettri, Arnab Mondal, Gouramangi Singh, Raju Gaikwad, Gurjinder Kumar. Midfielders: Mehtab Hossain, Lalrindika Ralte, Arata Izumi, Lenny Rodriguez, Jewel Raja Shaikh, Francis Fernandes, Shylo Malsawmtluanga, Clifford Miranda. Forwards: Sunil Chhetri, Robin Singh, Dawson Fernandes.
Posted on: Mon, 05 Aug 2013 08:33:58 +0000
Trending Topics
Recently Viewed Topics
© 2015