KOMUNIKADO DI MFK Willemstad, 12 novèmber 2013 Minister-presidente di Gobièrnu di Kòrsou Señor drs. Ivar Asjes P/a Fort Amsterdam # 17 Presente Tópiko: Informashonnan infundá suministrá dor Minister plenipotensiario na órganonan i representashonnan internashonal i e konsekuensia di esaki pa ku relashon europeo i internashonal. Apresiabel sr. Minister-presidente Asjes, Den prensa Hulandes, entre otro, e kadena televishon di notisia NOS, e korant di kalidat NRC Handelsblad i tambe den otro medionan di komunikashon internashonal i lokal a sali e informashon ku e aktual Minister plenipotensiario di Kòrsou sra M. Wiels ta suministrando informashonnan inkorekto den aserkamentu di institutonan Hulandes, Europeo i Internashonal. For di informashonnan aki ta saliendo na kla ku e Minister plenipotensiario den aserkamentu di mandatarionan (ministernan) di Konseho di Minister di Reino na Hulanda i tambe den aserkamentu di ambasadornan i representantenan di paisnan representá na munisipio di Den Haag, a indiká di tabata responsabel den mandato di e Hunta di Maneho na e prestigioso banko ABN-AMRO pa un proyekto di un suma di 73 bion euro (168 mil mion florin). Mas aleu e Minister plenipotensiario a indiká ku entre e periodo di mart 2001 te ku mei 2005 su persona tabata konsehero di Hunta di Maneho di ABN-AMRO BANK i responsabel pa 300 trahadó. Entre e diferente informashonnan inkorekto, i a lo menos pretensioso, tin tambe ku e minister en kuestion a indiká ku e a terminá un estudio di nivel haltu universitario. E embergadura di e informashon i e forma ku Gobièrnu di Kòrsou su reputashon i nòmber ta wòrdu tachá den e órgano mas haltu di Reino, manera Konseho di Minister di Reino, i tambe mirando e daño hasi na nòmber di pueblo di Kòrsou i yunan di Kòrsou den munisipionan na Hulanda, ta enorme. Banda di esei e Minister plenipotensiario tin kontakto direkto i kontinuo ku ambasadornan, konsuladonan i miembronan di e paisnan ku ta forma OCTA (Overseas Country Territories Association) di Union Europeo. Mester tene na kuenta ku e Minister plenipotensiario den su kalidat ta komuniká na nòmber di Gobièrnu di Kòrsou, bou responsabilidat di e Minister-presidente ku tin e kartera di asuntunan general. Informashonnan inkorekto, di karakter mentiroso i/o infundá ta debilitá e posishon di pais Kòrsou i tambe e konfiansa di Gobièrnu di Kòrsou den eksterior. Mirando esaki ta imperativo pa determiná ku informashonnan inkorekto a wòrdu suministrá dor di e Minister plenipotensiario i mester determiná tambe e embergadura di e daño okashoná i prinsipalmente kon ta bai hasi pa drecha i restablesé e konfiansa tachá aki bek. Den e kuadro aki nos ta aserka bo persona komo esun ministrialmente responsabel pa ku e funshon di Minister plenipotensiario ku e siguiente preguntanan: 1. Minister-presidente ta na altura ku e minister plenipotensiario tabata responsabel pa un proyekto di un suma di 73 bion euro (169 mil mion florin) manera ta bini dilanti den e Curriculum Vitae di e Minister plenipotensiario? Si e kontesta ta afirmativo, Minister-presidente por suministrá evidensia ku por sostené Minister-presidente su kontesta? 2. Minister-presidente ta na altura ku e Minister plenipotensiario a manda su CV konteniendo e informashon menshoná den pregunta # 1 pa Konseho di Minister di Reino via di e sekretariado, indikando ku e informashon aki ta korekto i konfiabel? 3. Minister-presidente a informá serka Konseho di Minister di Reino, pa medio di e presidente señor Mark Rutte of e minister di asuntunan di reino, señor Ronald Plasterk, ku e Konseho di Minister di Reino manera ta usual a risibí un CV di e Minister plenipotensiario i kiko kontenido di e CV tabata? 4. Minister-presidente por a informá mi e fecha ku Minister plenipotensiario a manda su CV pa e sekretariado di Konseho di Minister di Reino? 5. Minister-presidente ta di opinion ku e informashonnan relashoná ku estudio, abilidat i konosementu suministrá na Konseho di Minister di Reino dor di e Minister plenipotensiario ku ta miembro di e konseho aki mester ta korekto i konfiabel? 6. Minister-presidente ta na altura kuantu minister, kuantu burgemeester, kuantu wethouder, kuantu ambasador i kuantu representante di kuantu pais i empresarionan a risibí e CV enkuestion di e Minister plenipotensiario? 7. Minister-presidente ta na altura ku e Minister plenipotensiario a manda su CV, pa entre otro embahada di Argentina i Dinamarka, den kual e estudio, abilidat i kapasidat di e Minister plenipotensiario ta inkorekto? 8. Minister-presidente ta dispuesto pa na nòmber di Gobièrnu di Kòrsou rektifiká serka e paisnan menshoná den pregunta # 7 ku e informashonnan suministrá dor di Minister plenipotensiario tabata den e kaso aki aparentemente inkorekto? 9. Minister-presidente ta dispuesto pa na nòmber di Gobièrnu di Kòrsou manda un diskulpa ofishal i públikamente na señor Rijkman Groenink (ex direktor di ABN-AMRO Bank) kende e Minister plenipotensiario aparentemente a kopia i usa partinan di su CV? 10. Minister-presidente ta dispuesto pa informá tur e Ministernan di Konseho di Reino huntu ku nan Sekretarionan di Estado, Burgemeesters, Wethouders, i Ambasadornan ku e informashon suministrá dor di e Minister plenipotensiario tokante su estudio, eksperensia, i abilidat tabata inkorekto, si dado kaso resultá asina? 11. Minister-presidente ta dispuesto pa na nòmber di Gobièrnu di Kòrsou manda un diskulpa ofishal i públikamente na Konseho di Minister di Reino via su Presidente señor Mark Rutte si den dado kaso resultá ku e kontenido di e CV di e Minister plenipotensiario tabata tin informashonnan inkorekto den dje? 12. Minister-presidente ta dispuesto pa na nòmber di Gobièrnu di Kòrsou manda un diskulpa ofishal i públikamente na pueblo di Kòrsou si den dado kaso resultá ku e kontenido di e CV di e Minister plenipotensiario sra M. Wiels tabata tin informashonnan inkorekto den dje? 13. Minister-presidente ta kompartí e opinion ku di e forma aki e Minister plenipotensiario na Hulanda sra M. Wiels a kaba ku su reputashon i kredibilidat, i ku e Minister plenipotensiario enkuestion no meresé e konfiansa di pueblo di Kòrsou i ku e no ta apto mas pa sigui ehersé e funshon? Atentamente, Amerigó C.M. Thodé Miembro di Parlamento di Kòrsou Frakshon di MFK
Posted on: Tue, 12 Nov 2013 23:20:29 +0000
Trending Topics
Recently Viewed Topics
© 2015