KORINTH KHUAA MITE HNENA TIRHKOH PAULA LEHKHA THAWN PAHNIHNA: ( Nangni hi kan lehkha, kan thinlung a ziak, mi zawng zawng hriat leh chhiar chu in ni e: Krista lehkha, keimahni min ziaktir, lehkhatui a ziak ni lo, Pathian nung Thlarau a ziak zawk, lung phek a ziak ni lo, tisa thinlung phek a ziak zawk chu in ni tih chiang tak a lantir a ni si a.) 3:1 Mahni insawimawi kan tan leh dawn ta maw? A nih loh leh, in hnen a pek tur emaw, in hnen ata emaw sawimawina lehkha, mi thenkhat tan a ngai angin kan tan a ngai ve dawn maw? 3:2 Nangni hi kan lehkha, kan thinlung a ziak, mi zawng zawng hriat leh chhiar chu in ni e: 3:3 Krista lehkha, keimahni min ziaktir, lehkhatui a ziak ni lo, Pathian nung Thlarau a ziak zawk, lung phek a ziak ni lo, tisa thinlung phek a ziak zawk chu in ni tih chiang tak a lantir a ni si a. 3:4 Tin, Pathian lamah chutiang rinna chu Krista zar a kan neih a ni; 3:5 engpawh keimahni atang a chhuak a ruat turin keimahni ngawtin kan tlin kan ti lo a; kan tlin theihna chu Pathian hnen ata a ni zawk. 3:6 Amah bawk chuan thuthlung thar rawngbawltuahte min tlintir a; a lehkha thu mai rawngbawltuahte ni lo-in a thlarau rawngbawltuahte a ni zawk e; lehkha thu mai chuan a tihlum si thin a, thlarau erawh chuan a tinung thin a ni. 3:7 Mosia hmel a ropui avangin Israel fate chuan a hmel an en reng thei lo a (chu ropuina chu a ral ta riai riai a) thihna rawngbawlna lung a hawrawp a ziak mah, chuti khawp a ropuiin a thlen chuan, 3:8 Thlarau rawngbawlna chu engti tak a ropuiin thleng ang maw; 3:9 Thiam loh chantirna rawngbawlna mah a ropui chuan, felna rawngbawlna chu ropui lamah chuan a nasa zawk em em tur a ni. 3:10 Tihropui a awm tawha chuan he mi lamah zawng ropuina reng a nei ta si lo, ropuina nasa zawk chuan a khum avangin. 3:11 Ral ta riai riaia mah ropuiin a thlen chuan awm reng tura chu ropui a tuamin a awm zawk em em tur a ni. 3:12 Chutichuan, chutiang beiseina kan neih avngin engkim kan sawi chhuak thin a ni. 3:13 Mosia tih ang khan kan ti lo e; ani chuan ral ta riai riai ral tawpna chu Israel fate chuan an en reng lohna turin a hmai chu hmaikhuhna-in a khuh a: 3:14 an rilru erawh chu tihkhauh-in a awm ta zawk a; vawiin thleng pawh hian thuthlung hlui chu an chhiarin khuhna pangngai chu hlim loh-in a awm reng si a, chu khuhna chu Krista-ah chuan tihbo-in a awm ta a. 3:15 Nimahsela, vawiin thleng hian Mosia Lehkhabu an chhiar apiangin an thinlungah chuan khuhna a awm thin. 3:16 Nimahsela, an thinlung chu Lalpa lam a a hawi tik apiangin khuhna chu lak bo a ni tawh ang. 3:17 Tin, Lalpa chu Thlarau chu a ni a; Lalpa Thlarau awmna apiangah chuan zalenna a awm thin. 3:18 Chutichuan,keini chu kan za-in hmai khuh lo-in darthlalang ang a Lalpa chhun enin, ropuina atang a ropui zelin, chu mi anpui ngei a awm turin tihdanglamin ka awm thin, Lalpa (Thlarau) ata chu kan hmuh ang zelin.
Posted on: Mon, 20 Jan 2014 02:18:18 +0000
Trending Topics
Recently Viewed Topics
© 2015