Katapu sang Philippine Army ginluthang sa KTV bar, patay ROXAS CITY – Dead on the spot ang katapu sang Philippine Army matapos luthangon sang wala pa nakilala nga suspek sa isa ka KTV bar sa Arnaldo Boulevard, Roxas City. Pilas sa dughan nga naglapus sa nalikod nga bahin sang lawas ang naangkon ni Private First Class Eldrin Bornales, 38-anyos sang Barangay Dulangan, Pilar, Capiz kag na-assign sa 301st Infantry Brigade sang PA nga nakaba-se sa Dingle, Iloilo. Pilason naman ang bayaw nga seaman sang biktima nga nakilala kay Marlon Palencia, 40-anyos matapos ginkastigo sang grupo sang mga kalalakinhan. Sa imbestigasyon sang pulisya, nagaguwa nga nagsugod ang kinagamo sang mangin magahud kag masabad na ang biktima bangud sa tuman nga kahulugbon. Nakaangkon sang rambol sa sulod sang Paraiso KTV bar matapos magwaras ang biktima kag mahabuyan sang baso ang isa ka customer. Sa kaakig sang iban nga naga-inum ila ginpalapitan ang bayaw ni Bornales kag ginkastigo kag makaligad ang pila ka minuto nakabati sang duha ka lupok sang armas, tobtob nakita na lamang ang duguan nga lawas sang biktima sa tunga sang center island sang karsada. Samtang, tatlo naman ka mga kalalakinhan nga nagatrabaho sa nasambit nga KTV bar ang gin-imbitahan sang pulisya para magpaidalum sa paraffin test. Sa karon igapaidalum sa otopsiya ang bangkay sang nasambit nga katapu sang PA.
Posted on: Mon, 07 Oct 2013 11:21:16 +0000
Trending Topics
Recently Viewed Topics
© 2015