Kawlram zathang Nu Van Dawt Cin (Moe Moe) he Biaruahnak Ram Lian Sang Tin Thei Perth, Western Australia 12 August 2014 Australia Chin Federation timhtuahnak in October 3-5, 2014 chungkhi Australia Chinmi Civui cu Melbourne khua i vawlei lei ihruainak asimi bu Australia Chin Comminty (Eastern Melbourne) nih inntek sinak in tuah asi lai. Cu Civui tuahnak i phaisa kawlnak fundraising caah hlasanak (live Show concert) cu Australia State 3 hna; Melbourne, Adelaide le Perth hna ah an tuah kho. Hlasatu dingin Kawlram lei ah sawmmi cu Van Dawt Cin (Moe Moe) asi. Moe Moe hi Thantlang peng Thau khuami Pu Thawng Ling le Saikah khuami Pi Sung Len hna i fale 6 laknak Moe Moe hi 4 nak asi. A aw that lawng hlah, a mui lawng hlah, a tungtai zong zoh cimlo in a tlinh dih. Mi chawnhbiak dan le umthut ning zong a thiam i uar a um taktakmi zohchunh awk tlak kan Laimi nu asi. Kawlrampi ah minthang pakhat asinain uahnak thinlung ngeilo tein mikip hi aa ruang tein a kan chawnhbiak. Australia a um chung cu Australia Laimi cu a mah kong ceih in kan dai lo. Atu Perth ah Hlaskank a dih hnu in biaruahnak caan tawite a ka pek i a cungah lunglawmhnak tampi ka ngei. Halnak: Moe Moe.. Na chuahkehnak le na sianginn kainak te hna na ka chim kho hnga maw? Moe Moe: Hakha ah ka chuak. Kum 1 ka si holh ka thiam hlan in Mindat ah kan ithial. Cun Mindat in Mandalay, Myitethila, le Pyine Mana te hna ah kan um. Khoika theng ah ka thangtihi chim a har ngai. Ka pa hi Cozah riantuan asi i hmunkip ah kan ithial i, kawl lei deuh ah ka um tinak asi cu. Kapa hi Thantlang peng Thau khuami asi i kanu tucu Saikah in Bung Tlang khua ah a pemmi an si. Fimcawnnak lei ahcun, 2009 ahkhan Bachelor of Arts (Psychology) in degree ka hmuh. Cu hnucun hlasak lei deuh hi caan ka pek caah zeihmanh ka kai chap tilo. Halnak: Kaalawm tuk. Na hngakchiat lio ahhin fimcawnnak leiin maw pawcawmnak dingah na rak itimh, asilole a tu na tuah cuahmahmi hlasak lei hi dah na saduhthah a rak si? Moe Moe: Ka hngakchiat lio tein hi hlasak lei hicu ka rak itimh balmi asi hrimhrim lo. Asinain Pathian nih hi hlasak lei ah lam a ka hruai i, a ka khokhihmi asi tiin ka ruah. Ka rak itimhmi cu zung ah dai tein cozah rian tuan hi ka rak duh balmi cu asi. Hibantuk hlasak in ka paw kaa cawm la tihi cu ka rak ruat bal lo. Halnak: Asitak e. Cuti sicun hibantuk tiangin Kawlrampi theih in hlasatu dirhmun tiang na phak tik ahhin, zeibantuk hlasak lei cawnnak dah na rak ngeih? Zeitluk in dah na rak itimhtuah ning asi? Moe Moe: Avoikhatnak mipi sinah hla ka sak kaa theih hi cu; singinn taang 4 kakai lio ah Khrihfa Biaknak lei bukip fonh in hlasaknak a rak um. Mah lio ahcun ring-awn lei a thiam tukmi Saya A Bawi timi pa nih hla a rak ka chimh i hla fungkhat a rak ka sak ter. Mah cucu a voikhatnak mibu sinah hla ka sak cu asi. Cun Khrihfa kan si caah biakinn te hna ahcun ka sak tawn ko. Cun biatak tein hlasak kaa awtnak hi cu 2008 lio ah Pu John Tial Ceu nih a kan sponsor i“ Zaihla in kan in Tlawng Hna” ti min bunh in Malaysia ah kan rak kal. Cucu Laihla zong a voikhanak ka sak asi i, stage cunginn a voikhatnak mibu sinah ka sak zong asi fawn. Cun Kawlram ka rak tlun hnu in Kawlrampi hlasak zuamnak “The Best of Melody World” timi ah ruahlo piin ka rak izuam i Pahnihnak ka rak hmuh. Cun Kawl lak ah biatak tein hla kaa chuah i Album ka zamhnak cu 2010 ah asi. Hlasak zuamnak kha kumkhat chung (2009) chung asi caah 2010 hnu lawngin Album hlaphel cu ka chuah. Halnak: Asi ahcun 2008 i Pu John Tial Ceu nih Malaysia ah sponsor a rak in tuah hna lio ahkhan na rak itel ve kha; na aw that an theih ruangah maw asi? Zeibantuk timhtuahnak in dah a rak in telh ve ning asi? Moe Moe: Kei ka ruahning ahcun; kanmah chung Thitumhnak (wedding) lio ah Biakinn ah hla ka rak sak piak hna. Mah lio ahcun hla ka sakmi zong a tlam a tlinlo nain Pathian nih Pu Tial Ceu thinlung ah rian a tuan i asi lai cu. Cu hnucun kaa ruahlo tuk bu le ka tlamtlin lo tuk buin Malay ah hlasak dingin ka u Zachi John te, Siang Meng Sung te, le kanmah unau tiin kan zapi 4 a rak kan kalpi. Halnak: Asi tak… Kawlram i “The Best of Melody World” i hlasak na rak izuammi kha teh, nangmah nih na duh caah maw naa zuam? Mi nih maw an in sawm maw? Mi nih an in tuahpiakmi dah asi? Moe Moe: Mi nih an ka forh tuk ruangah asi. Keimah hi ka huam tinak zong asi theng lo ka ti lai cu. Minung cu mah le huam phun cu a um i hlasak hi cu ka huam tuk ko. Asinain zuam ding tiangtiang kha cu ka ngamh lo hrimhirm, ka ral a chia. Ka hawinu Hay Man timi nu nih izuam dingin min hna a ka pek piak, form te hna a rak ap, hla zong a ka thim piak viar, zeizong vialte a ka timhtuah piak dih. Zeitluk in dah thazaang a ka pek ti ahcun; pakhatnak na hmuh hnu lawngah form man te hna hi ka cham te a ka ti. Form te hna hi a mah nih a phit dih, a ap dih. Ka huam lo ka ti zong ah a rak ka forh chih. Mah kaa zuammi kha a mah Hay Man thawngin asi ka ti ahcun ka palh lailo. Halnak: Mah na hawinu cu Kawl miphun maw asi? Moe Moe: Aw… Kawlmi bak asi. Ka hawikom tha tuk asi, a mah nih a rak ka forh tuk caah ka rak izuam. Cuticun zuamnak ahcun Pahnihnak cu Pathian thawngin ka hmuh i Album chuahnak tiangah kaa tel kha asi. Haltu: Aw…… Asi tak. Thleidan ruangah a phichuak cungah lungtlin lonak tete zong a rak um kha kan rak theih i kan lung a rak fak cio. Asinain Kawlrampi chungah minlang lak tiangin na vun izuamnak cungah kan in lawhpi cio i Chinmi vialte zong kan hmai a hngal dih ve. Moe Moe: Kaalawm tuk ve. Halnak: A tu tah hla lei ahhin cawnnak na ngeihmi a um maw? Cun hla na sak lio ahkhan na aw lawng siloin na cawlcangh ning le na lam dan hna kha zoh na rem tuk. Cu he pehtlai in acting, modelling lei hna vocal lei hna na cawn chapmi a um maw? Moe Moe: Cawnnak ka ngei lem lo. Inn ah ka sakmi le biakinn ah solo ka sakmi dah tilo cawnnak ka ngei lo. Cun hmum tampi le kakip ah hla ka sak tih ah, hmuhtonmi experience nih bia a chim kan ti lai cu, mah caah cun asi. Halnak : Kawlram dirhmun in siseh, Laimi dirhmun in Vawleicung ah Ring-awn leiin zeibantuk dirhmun ahdah kan um tiah na hmuh? Moe Moe: Kawlram dirhmun cun kan za ngai cang ko tiin ka hmuh. A thiammi cu an thiam lawlaw ko. Theory leiin cun ramdang kan tluk rih hna lo. Ramdang cu phaisa an ngeih caah theory lei cun an kan tei ngai. Kawlram hi cu tlawmpal cu hnu ah kan um rih ko. Laimi dirhmun bel cun ramdang ah tampi kan phan cang hna i a palh zong ka palh kho men. Keimah hmuh ning ahcun kan chambau tuk rihko tiah ka ruah. Hmai lei ahcun hinak tampi in kan thangcho ko lai tiah zumhnak ka ngei. Halnak : Mah cucu zeitin kan tuah ahdah kan thancho deuh lai tiin na hmuh? Moe Moe Laimi cu kanmah pawcawmnak ca dingah rian dang kan tuan tik ah thiamhlei professional dingin ring-awn (music) lei ah caan kan pe kholo. Kawlmi tucu ring-awn in pawcawmnak ca dingah an izuam tik ah caan an pek kho taktak. Anmah bantuk in kan izuam ahcun kan phanh ko hna lai. Cun Laimi dirhmun in ring-awn in pawcawmnak taktak dingah tuan awk a tlak lo, kan zuarnak hmun a bi tuk i rian dang kan kemh tik ah ring-awn lei ah caan kan pe kho tilo. Halnak: Mah cucu Kawl lakah na rak than hi na van tha tinak asi cu. Laimi sinah rak thang law Kawlrampi na huap kho lailo i ring-awn in pawcawmnak tiang na phan kho hnga lo ti ko? Moe Moe: Mah ticun chim khawh asi. Asi ko. Halnak: Kawlram ahhin kan hmuh theumi hna cu; ringawn lei in a hnu ah lemcang muicawl (drama) lei ah a pialmi kan hmuh theu hna. Cu caah khi bantuk lei ahhin vun in sawm hna sehlaw na cohlang lai maw? Moe Moe : hehe.. keicu lemcang lei ahcun ka ti kho lailo tiah kaa ruah, kaa timh balmi zong asi lo. Abik in cun i titer (tah chuahlo bui in tah) te hna ka thiam lo. thang ngai in a ni pah. Cu caah hlasak dah tilo cu lemcang leicu ka ti kho lailo. Keimah tein kaa zum lo, cun Pathian nih a ka pekmi gift (laksawng) asi rua lo. Halnak: Atu hi kum 4 leng Hlasak lei ah na vun iphum cang i, thazaang petu hna tampi na ngei lai va si kaw, cu cungah hla na sak lio te hna ahhin thapetu sinin hnahnoktu te hna an um theu lai. Cu caah Laimi sinah na sakmi maw a har deuh, Kawlmi sinah na sak ahdah? Moe Moe: Hla kan sak ahhin aa dang ngai. Kawlmi sinah ka sak ahhin hi bantukin pangpar pek te hna hi a umlo ti awk asi. A um caan te cu a um ve ko nain a tlawm tuk caah hnahnawhnak cu a um tuk lemlo. Laimi sin bel ahcun kanmah miphun chung asi caah pangpar peknak te hna kan tuah, fundraising asi tik ah pakhat le pakhat ibawmh chan cio asi. USA ka kal lio ahkhan hla ka sak lio ah Laimi cu zu an rit cang tik ahkhin “ ka Kut tlaih an duh, an kan tlaih hnu ah an kan dawh beh, cu tik ahcun a har ngai ko”. Khi bantuk khi cu minung phung asi ko i ka lungrawh tuk tiang cun a um hraw lo. Halnak: Na kum cu kan hal lailo. Innchungkhar ser dingin na za ve cang si kaw, va ca ding hi innchungkhar family leiin duh piakmi maw naa thim lai, nangamh duhmi dah? A pahnih ningin na ti ko lai.. ka theih ko. Asinain vun ikhat sual hlah sehlaw zeitindah bia na khiah lai? Moe Moe: Va ca dingah hin cun, keicu Innchungkhar family nih duh piakmi hi kaa thim deuh ko lai tihi atu tiang ahcun keimah tein ruahnak ka ngei. Mah nih duhmi kan ithimi hi cu a caan ahcun a dikmi a um kho ko, asinain kanmah minung pakhat lawng thimnak cu caan tampi ahcun kan palh kho. Innchungkhar lei dihlak nih duhpiakmi cu minung pakhat ruahnak lawng asi tilo, Minung tampi ruahnak asi cang caah a tha deuh lai tiah ka zumh. Atu tingah kaa ruah chihmi cu innchungkhar leiin duhpiakmi hi ka thim ko lai timi hi asi. Halnak: Bia pahnih kan hal lai i pakhat lawng naa thim lai mu. Nangmah pumpak cungah thim ding vun um sehlaw zeidah naa thim lai. Biaknak/Pathian rian maw? Ramkhel/ Mipi ca riantuan dah? Moe Moe: 2012 ahkhan hrinthannak ka hmuh, Pathian sin in fiannak ka ngei. Mah hnu cun zeithil poh nakin Pathian lei hi kaa thim deuh lai ka ti. Va ca ding zongah Pathian lei aa pemi kaa thim lai. Fimcawnnak lei maw? Chawkarh/Rumnak lei dah? Moe Moe: Keimah caah cun chawkarh/ rumnak lei kaa thim lai. A tu tiang ah Fimcawnnak lei cu a thim zong kaa thim tilo i chawkarh/rumnak lei hi kaa thim deuh ko lai. Va ca ding bel ahcun Fimcawnnak a ngeimi hi ka duh deuh. Halnak: Atu ahhin Kawlram Uktu President hei si law zeidah na tuah hmasa bik hnga? Moe Moe: Ramkhel politics lei hi zei hmanh ka thiam lo le. Ummmm…. A tu lio ahcun Lam hi ka remh viar hnga. Khual tlunkalnak lam le sul hi Kawlram chung siseh Laitlang chung vialte ka remh viar hnga. Mah cucu ka duhbikmi asi. Halnak: Atuhi Laimi umnak ram zeizahdah na kal cang i, khoika ram nihhin dah thazaang an in pek bik i, khoika ram kha dah na lung an in tlinh bik na ka chim kho hnga maw? Moe Moe: Laimi umnak ram hna USA, Australia voi 2nak, Malaysia, Singapore le Mizoram (India) hna ka kal cang. Laimi cu kanmah le kanmah kan icawisan caah ka kalnak poh ah kaa nuam viar ko. Asinain ka ruahnak pinlei tiang in a ka nuamhtertu cu Lawngtlai, Mizoram kha asi. Lawngtlai lei kal ding a rak si lio ahkhan lam umkalnak a rak har i kal ka rak huam hrim lo caah ka kal ti lailo tiin kaa ruah. Asinain ka va phak taktak tik ah, an ka conglawmh ning le an ka zohkhenh ning kha ka ruahnak leng piin asi. Thapetu hna sinin Laiholh a thiamlomi Mizo holh lawng a thiammi an tampi. Keizong cu Mizo holh kaa khat hmanh ka thiam ve lo nain ka ruahnak lengpi tiangin tha an ka pek. Ka holh an ka theihlo buin tha an ka pek i an ka dawt. Cu lak ah pakhat kaa lawmhkhunmi cu; keimah ka kalnak thawgin kan Laiholh le Laica thanchonak caah hi nak in kan izuam lai tiah ka sinah an ka rak chimh tik ah kaalawm khun. Sianginn hrimhrim ah Laica cawnnak kan thawk lai tiah an ka chimh fawn caah lunglawmhnak tampi ka ngei. Kaa ruahning leng zongin timhtuahnak an ngeih caah kaa lunghmuih khun. Halnak: Thlanglei Laimi le Chaklei Laimi a kan funtomtu le lam sialtu na rak si tinak asi cu. Moe Moe: Cuti zongin chim khawh asi. Kaa ruahnak ahcun an An Conference ah hla ka sak sawhsawh lai tiah kaa ruah. A taktak ah ka chim cang bang khan, Chaklei Laimi le Thlanglei Laimi ifuntomnak caah rak timhtuahmi asi caah kaa lawmhnak ka chim cawk lo. Halnak: 2011 Melbourne, Australia ah na rak ra cang va si kaw; mah lio i na rak rat lio le a tu na rat ahhin aa dannak na hmu maw? Bianabia ah Laimi thutdir ning, mi chawnhbiak ning siseh, riang-awn lei i an itimtuah ning te hna na hmuh ning ka chim law ka duh ko. Moe Moe: Aa dannak cu tamtuk in ka hmu lemlo. A voikhatnak ka rat kha cu ka U Sung Tin (Sung Tin Par) he kan si. Atu an ka conglawmhdan zong hi aa khat ko tiin ka hmuh. Asinain Ring-awn tumtu bel hi hlan lio kan rat lio ahkhan cun a thiammi a lenglei mi an hlan hna. A tutan cu kanmah Laimi (ACC) chungin an si hna i chambaunak tete cu a um ve ko. Asinain an izuamnak thawngin a zeipoh tlam a tling ko. Atulio Australia lei i ka theihmi kaalawmh tukmi cu, keimah pumpak ka um lo tik ah a taktak cun ka thei dih ve lo. Thawngpang ka theihnak ahcun “Evangelist le Phungchimtu tampi an ra hna i an piangthar tuk hna. Love Song hmanh hi an ngai duh tuk lo” timi thawngpang ka theih tik ah, cucu asi taktak ko ahcun ka lungtak tein kaalawm tuk. Zeiruang ti ahcun; Laimi le Khrihfa cu aa then ding kan silo cu mu. Cu caah Biaknak lein an thangcho i Love Song lei tha an peklo ti ahhin ka rak ilawm ve. Keimah hi Love Song ka sa i Love Song hlaphel zong tampi ka zuar ko nain an duhlo ahcun kaalawm ko. Pathian lei ah an tan ruangah an cawk duhlo ahcun kaalawm thiamthaim ko. Minung cu kan tling dihlo i mu Tlangval pawl bel zurit bu, lungfimlo buin an ka len ahhin kaa harh ngai (fak tuk in a ni). A dang cu kaa lunghmuih ngai ko. Halnak : Lai nu dirhmun in, Lai miphun hi a huap ning piin na hmuh ning. Kan thatnak lei siseh, kan chiatnak lei siseh, naa uanpinak, na zahpinak tipawl khi hei chim chunh tuah hmanh. Moe Moe: Kawlmi kan si ah, Laimi kan si ah chiatnak le thatnak cu a kalti peng ko i mu chim awk khi a tha thlu lo. Laimi cu ka ningzah tertu cu asi hrimhrim lo. Kan thatnak zong siseh kaa uanpi tukmi cu’ Laimi le Laimi tiin kan itanpimi hi asi. Keimah zong hlasak in ramdang ah tambik ka phaknak hi Laimi nih an ka sawm ruangah hin asi ko. Laimi pakhat le pakhat an idawt peng ding hi ka saduhthah zong asi. Halnak: Hla na sak ka ahkhan Moe Moe tiah kawl min deuh in kan in theih i, zeitindah Laimin Van Dawt Cin tihin na vun I bunh than ning asi? Moe Moe: 2008 Malay kan rak kal lio ahkhan Van Dawt Cin tiin ka rak tial ko. Moe Moe tihi ka minkep asi. Kapa nih a rak ka sak taktakmi cu Van Dawt Cin asi ko. Ka hngakchiat lio i sianginn ka rak kai lio ahhin ka min hi Khin Moe Way ti asi. Cu caah kan innchungkhar le hawile nih Moe Moe tiah an ka auhnak hi asi. Ka Lai min hi Kawl Sayamah te nih an ka auh kholo, a tial zong an tial thiam lo caah Khin Moe Way tiin an rak ka sak. Atuting hi ka ID le Passport ahhin Khin Moe Way tiin asi lan. Nain hlasak kaa zuamnak ahhin Hmak Petu Judges pawl nih ka min fawi deuhnak in Cin Cin ti hna in ikhumh ko tiah ruahnak an ka pek. Nain ka duh lo, ka min an theih bakin zei miphun dah asi ti thei hna seh timi lungput ka ngei. Kan hngakchiat lio in Kawl lak ah a thangmi kan si tik ah Kawlholh kha kanmah holh bantuk ah a cang i Kawlmi ah an ka ruah. Cucu kei nih ka duh hrimhrim lo. Kawlmin le Kawl biaknak hi aa pehtlaimi asi. Sianginn khan chung i zingka Buddhist an Pathian biak caan ahkhin ka rak bia duhlo i chimh ngailomi ah an rak ka ruah, zei ruangah na biaklo tiah an ka ti. Buddhist ka silo Khrihfa ka si tiah ka rak ti hna. Cu hnucun ka min ruangah hin Laimi ka si le Khrihfa ka si an theih lo hi ka thinlung ah a caam tuk. Taang 9 ka kai lio ah ka min thlen ka rak itimh nain thlen ding tuktak a tam caah ka rak thleng thai lo. A hnu i hlasak lei ka vun ithawk hnu hin Van Dawt Cin hi ka hmanhun than. Ka min a har pek, an ka auh thiam pek/ thiamlo pek ah ka min an theih bakin Laimi ka si hi thei hna seh tiin Van Dawt Cin hi ka hmannak asi. Halnak: Na ruahnak hi uar a um tuk. Laimi tampi nih icawn cio ding asi tiin ka hmuh. Laitlang a thangmi hmanh nih Kawlmin an uar lio ah hibantukin Laimin na dirpi caah uar na um tuk. Hmailei khuasaknak caah khoika dah naa thim hnga? Lairam maw? Kawlrawn maw? Ramdang ram 3nak dah? Ramdang hna in vun in sawm hna sehlaw zeitin? Moe Moe: Atuhin ka thim ahcun ka palh kho hnga. Kan khuaruah ning hi minutes 5 hmanh ah aa thleng kho. Lairam le Kawlrawn zong kan duh kan ti kho hnga, cun hmailei ahcun US, Australia le ram dangdang hna asi kho tik ah ka chim ngam rih lo. Atu lio bel ahcun Kawlram chungah khuasak dingin kaa ruahchan rih ko. Halnak: Ramdang ah a ummi Laimi vialte hi teh hmailei ah Kawlram ah rak kir dih hna seh timaw na duh? Mah ka hin um ko i itlawng lengmang usih ti dah? Moe Moe: Keimah duhnak taktak ka chim ahcun; kan hnu lei ahkhan Bung Tlang le Thau khuate pawl tiang ka va phan. Kan Laitlang hi, hinak in thangcho deuh seh ti cu ka duh tuk ko. Hakha/Thantlang tiang cu a tha tuk ko. Asinain khuate lei cu a rocar kho tuk. Kan ram in zeihmanh a chuak lo. A rocar tukmi hmun ah kan ibenh peng i fale tampi zong fimnak lei ah kan karhlanpi khawh hna lo ahcun zeihmanh a thahnem lo tiin ka hmuh. Minung timi cu ram hrinnak le tihnah thatnak kan panh hi cu ka cohlan ko. Cu caah ram dang ah kan pem hna hi hmeilei kan tefa hna caah fimthiamnak leiin siseh a dangdang lei in kan thangcho deuh lai, kan mit au deuh lai i international level ah kan dir kho lai tiah ka ruah. Halnak: Parcel an timi ramdang leiin nupi rak cah hi teh zeitindah na hmuh ning asi? Moe Moe: Aa thiummi hna nih an lung tlin ahcun a tha ko tiah ka hmuh. Laimi le Laimi kan ithi ko i aa um mi nuva hna an pahnih lungtlin ahcun a tha tuk tiah ka hmuh. Minung cu pawngkam neihniam deuhmi he iduh i a thit hi a fawite. Cu caah pawngkam i Miramdangmi he i thitumh nakcun mah Laimi le Laimi ithitumh hi ka lungtling deuh ko. Halnak: Atu cu a donghnak lei hei sisehlaw; atubantuk in Australia ratnak dingah an autu Australia Chin Federetion tang ummi hna; Australia Chin Community (Eastern Melbourne) si hna seh, Chin Community of South Australia (Adelaide) le International Chin Foundation ( Perth) hna si hna seh, nangmah an tanhtu hna le thazaang an petu hna sinah biacah na duhmi vun chim law. Moe Moe : Hibantuk in Laimi le Laimi kan icawnsan hi kaalawm tuk. A ka zohkhenhtu dihlak cungah kaalawm tuk fawn. Hmailei caah ka duhpiakmi hna cu; kha hlan i hlasak an auh tik hna ahhin minung 2 in an auh tawn hna. Atu hi keimah lawng ka si caah, keimah ca zongah ka re a thei, cun thapetu le a zohtu hna zong hi hlasatu 3, 4 an si ahcun an lung hmuih deuh lai tiah ka zumh. Kawlmi nih an tuah tawn ahhin hlasatu hi atlawmbik 7 tal hi cu an sawm hna i miung 25 tiangin an sawm hna. Mah cu tiang cu ka ti duhnak siloin, mi tam deuh in an auh hna naklai ka duh piak hna. Hmailei zongah Lai hlasa pawl hi, Love Song in siseh Pathian hla leiin siseh minung tampi an auh khawh hna lai i hinak in thawng chinchin in an karhlan naklai ka duh piak fawn hna. Cun hi bantukin an timhtuahnak cungah lunglawmhnak tampi ka ngei. Cun hibantuk in Innterview nan ka tuah tik ah kaalawm tuk i, hinak kau deuh chinchin in hmailei ah kan Laica le holh kilvennak ah izuam chin uh. tiah bia kan cah duh hna. mah vial
Posted on: Sun, 07 Sep 2014 10:41:19 +0000
Trending Topics
Recently Viewed Topics
© 2015