Khawvela sipai tha le huoisen Blackwater USA - foxjournal.net/index.php/articles/367-khawvela-sipai-tha-le-huoisen-blackwater-usa FJ Articles | Oct. 5, 2014: Blackwater USA hi mimal company le Security service kum 1997 kuma Erik Prince le Al Clark haiin an lo indin a nih. US state North Carolina hmunah an hmunpui innghatin training na hmun tha tak hai leh. Hi training na hmun hi khawvel a a lientak a nih an tih. Hi Company hin mi 40, 000 neka tam Security service le agency dang dang a mi hai training a pek hlak a nih. Hi Company hi professional military le peace keeping tiengpanga khawm khawvela tha taka insal an ni ang hrimin an ni tluk ding hi an um ring a um nawh. An sum hmuna chu Sawrkar Contract a inthawkin 90% an hmu a, hmun thuma thea hmun hni lem chu bid ruollo an nih. Tuhin hi Company hin thawktu mi 10,000 a nei mek. Cofer Black, company Vice Chairman ni lai zing hi President Bush a hun, 9/11 hun lai a firfiek pawl hai beitu hai laia a lukhaitu pakhat ve a nih. Blackwater hi a hung hlawtling hrat khawpela sawrkar le mi dang dang hai innghatna ang deuin a hung inthang tung pei a. CIA le Pentagon a Security official lien tak tak hai tlu lutna a hung ni ta pei. Robert Richer, Associate Deputy Director of Operations le CIA Near East Division lu tak lo ni hlak chu Blackwater a Intelligence tienga Vice President a hung chel ve ta nghal a nih. Blackwater training na hmun North Carolina hmuna acre 7000 a lien a um a. Silai kap inchukna, in-sung le in-puo le training na dinga hmangruo le hmun pawimaw dang dang hai sie sa vawng an nih. A bul tienga ei lo zieklang ta angin khawvela training na hmun lien pawl tak ni a hriet mek a nih. Company literature chun hi company hi mimal company a silai kap inchukna facility lien tak a nei a nih tiin a hril. Kum 2006 khan Blackwater USA chun Chicago sim tieng pangah Mount Carroll, Illinios hmun ah ram acre 80 a lien an chawk chu Blackwater North ti a hming inbukin kum 2007, April thla khan hi lai hmun hi sukhring tan a ni ta bawk. Blackwater hin California tieng khawm training na hmun hi la hawngsa a tum. Kum 2003 khan Blackwater chun contract insang takel a laka chu chu Civilian Administrator L. Paul Bremer, Iraq hmuna venghimna sin a nih. Paul a venghimna sin an thaw a an pawisa hmu zat chu $21 Million thla sawm pakhat sungin an hmu a nih. Ei hriet awlsam dan dingin an hire man a nih. Kum 2004 a inthawk khan buoina hmuna haia US Official um hai le foreign Official thenkhat venghimna sin an thawna Worldwide Personal Protective Service le Five Year state Department Budget le inzawmin $320 Million pek an ni tah. Kum 2006 chun Blackwater chun Iraq hmuna US Embassy venghimna sin pe dingin contract a hmu nawk a nih. March 21, 2004 khan Iraq helpawl Fallujah hai chun Blackwater USA hai chu fak le dawn semtu ding hai an escort laiin mi an lo ambush a. Hitaka hin Blackwater sipai pali Scott Helvenston, Jerko Zovko, Wesley Batalona le Michael Teague hai chu grenade le silai hmangin an that a, an ruong hai chu Euphrates vadung chunga leilaka hai khai khang an nih. Hi hi thil hin Blackwater le America hmalakna nasatakin a tawkbuoi hiel a nih. Investigation hai khawm duthusam anga a fe hrat thei naw le thil inthup um anga an lang leiin namenin an buoi nawh. April 2005 khan Blackwater sipai paruk Mi-18 Helicopter a chuong hai chu an Helicopter kapthlak a ni leiin an thi vawng bawk. January 23, 2007 khan Baghdad, Haifa kawtthler chungah Blackwater sipai panga hai chu an chuongna H-6 Helicopter chu kapthlak pek an ni nawk leiin an thi nawk vawng a. A thi hai hi silai chawi hel haiin an tlak hnunga an kaphlum am an tlaknaa an thi vawng ti hriet thei lova um a nih. State Department thusuok in a tarlang dan chun December, 24, 2006 khan Blackwater sipai pakhat chun Iraq Vice-President venghimtu sipai pakhat a kaphlum tiin thusuokin a tarlang. Kum 2007 May thla chun Blackwater sipai hai chun ni hni sung vawi iemanizat khawlaidung ah an silai an hmethrut el leiin Iraq Commando le Official hai le inhmu thiemnaw na a tlung pha.Chun, May 30, 2007 in Blackwater sipai hai chun Iraq civil mi pakhat chu an motor escort State Department Convoy bul hnai bek beka motor a hung khal leiin an kap bawk. September, 17, 2007 chun Blackwater hai chun US State Department motor iemanizat Baghdad simtienga United States Agency for International Development official hai le meeting nei dinga an escort chu Nissor Square an tlung chun car side indik naw zawnga damte a hung tlan chu Police officer in lam lo inken dinga a hril uksak loa a um chun Blackwater hai chun warning shot pein silai hai an hang hmetpuok chun Iraq sipai lo um hai le chun inhrepaw lovin Blackwater hai le chun in hmelma khawm ni lovin an inkap ta zek el a nih. Hi thil tlung zo hin September 19 chun US chun Baghdad khawpui sunga Green Zone ti lo hai reng reng a US Diplomat le Civil Official hai hrim hrim chu motor a inlawn a sukchawl vawng nghal a nih. American mi le sa hai chu 3.5 Km square sunga inhnaia umkhawm dingin thu a pek nghal bawk a. Blackwater hai hi an huoisen a suol khawm an suol bawk leiin sumfai an hlaw baka hin civil mi hai sawisel khawm nasatakin an hlaw sa bawk a nih. Khawlaidung le kawtthlera hai an nuom nuom thawin an nuom nuom an vuok vel el hlak a nih. Baghdad khaw mi Halim Mashkoor chun hieng ang hi America annawleh Britain rama hai tlung sienla America President, a ram mi haiin an pawm chie ding am tiin AP Telvision News haiin an inbiekpui huna chun zawna a pek. Iraq lawyer pakhat Blackwater hai kuthnunga hliem chun anni Blackwater hai dangna ding hin tukhawm hma an lak nawh tiin charge a siem a. Chun, ei zuk ngha kir leh hnung tienga inthawkin motor an hung kap vawng hlak bawk tiin a hril. Iraq Interior Ministry thutlukna chu Iraq Minister thenkhatin an hung thlawp leiin Blackwater hai hmanga Iraq hmuna US Operation le an Contract chu suktawp dingin Iraq PM Nuri al-Maliki chun US sawrkar tlungpui chu anhriettir ta a nih. Nisienlakhawm, Spetember 21 chun CNN chun Blackwater hai Operation an sunzawm ding thu chu a hung puong zawm nawk nghal a nih. September, 22 chun Iraq investigator hai chun Blackwater haiin a san mumal um lova civil hai an kapna Video an nei thu an hung puonglang ve taa. Blackwater hai chu Civil mi pawitawklo tamtak hai thina an nih tiin thiemnaw an inchang pei taa. September 24 chun Iraq Interior Ministry chun Blackwater staff hai chungah case a file khum ding thu a hril a. Blackwater hai chu civil chunga nunrawng taka che hlak firfiek pawl hai ang an nih tiin thusuok a siem ta bawk nih. September 17, 2007 chun Iraq sawkar chun Blackwater hai Iraq a an um theina License chu a hlip pek taa. Chu a hlip pek chu Kum 2008 chun America in hung sukhring pek tumin Iraq sawrkar a hang intlun nawk chun Iraq sawrkar chun License chu sukhring nawk a nuom ta naw thu lo hrilin a lo hnawl pek tah a nih. An hming lo sie met sienlakhawm America ta ding lem chun Blackwater hai hi an tangkai bek bek a nih. Ei ziek lang hi Iraq rama hun tawite sung a mi chau a nih a, America ram le hmun dang dang a mi hai ei zieksa naw a nih. Hi Blackwater hi kum 1997 kum Erik Prince in a lo indin a nih a. Tuhin an Service hi khawvel pumpui a huop an tah. Kum 2009 in Xe Services tia a hming thlak a hung ni a, chu zo kum 2011 chun Academi ti inbukin a hung um nawk a nih. Tuhin hril dan chun Prince hin a hming hi Blackwater ti bawkin a hung inbuk nawk ta a nih ti dam hril langin a um. Ama hin hieng ang Security Service tho hi company dang a siemsa bawk a nih. An sum laklut hi a tha em em a, hmangruo le thuom hai khawm an nei tha a nih ti ei hrietchiengna chu America meuin a iruoi nuom hai an ni tlat. Tuhin Blackwater hin sipai 10000+ a nei mek a. An din tu Prince in a hril dan chun Iraq rama venghimna sin an thaw sung hin US Official hai pakhat khawma thina an tuok naw thu a hril lang.
Posted on: Sun, 05 Oct 2014 16:50:58 +0000
Trending Topics
Recently Viewed Topics
© 2015