LA VALISA DI RICÒRD L’alter dì seri sù, nel spazzacà per fà on ciccin d’ordin, per mett a pòst quand m’è vegnuu in la ment de cercà quell che tanti ann fa avevi nascòst ‘na valisa veggia e tutta ròtta l’hoo troada, di scatolon a l’era sòtta. L’era lì tal e qual l’avevi mettuda ligada anmò col naster adesiv el mè coeur l’ha ciappaa ‘na stringiuda tutti i mè ricòrd andavi a riviv l’avevi missa via quand seri fioeu dess la memòria proeuvi andà a toeu. L’era tutta quanta impolverada polver depositada in tanti ann ‘na vòlta verta gh’hoo daa on oggiada sentivi on gran calor, di scalmann ‘me d’on film hoo rivist el mè passaa la scòla, el laorà, moros e soldaa. Gh’era denter la mia vita, i ricòrd de fioeu, de bagaj, poeu diventaa òmm a rappresentà de la strada, el raccòrd tutt quell che m’è capitaa i success e i tòmm la fòto de la prima morosina Minni l’era tosa d’ona visina. Hoo troaa on sbiadii album di figurin con tutti i animai, ch’eren ben sescent per comperai svojavi el borsin, ma andavi dasi, stavi attent ne mancava voeuna a l’hoo mai finii raccòlt n’hoo faa pù, seri tròpp ferii. Hoo troaa la mia divisa de soldaa quand seri sergent di granatier quindes mes sòtta la naja hoo passaa period senza rògn, senza penser dess la leva l’hann tòlta la gh’è pù e a l’è staa on mal per nòstra giuventù. Gh’era denter anca ‘n’altra divisa de lettighier de la Cros Bianca guardavi curios la valisa ricòrd? Ghe n’era ancamò ‘na branca seri lì cont on ciccin de magon la vita, la via, con tanti stazion De tanti ròbb me ricordavi pù tutt quell che m’è success in gioventù. Renato Colombo
Posted on: Sun, 25 Aug 2013 20:02:59 +0000
Trending Topics
Recently Viewed Topics
© 2015